ગુજરાત ભાજપના અધ્યક્ષ પદે જીતુ વાઘાણીની ટર્મ આમ તો પૂરી થઈ ગઈ છે. પરંતુ રાજ્યમાં વિધાનસભાની પેટાચૂંટણી, નગરપાલિકા અને પંચાયતની ચૂંટણી પૂરી થાય ત્યાં સુધી જીતુ વાઘાણી જ પ્રમુખ પદે રહે તેવી સંભાવના છે. રાજનૈતિક વર્તુળોમાં હાલ નવા પ્રદેશ પ્રમુખને લઈને પૂરજોશમાં ચર્ચાઓ ચાલી રહી છે. જો કે સૌથી વધુ કોઈ વાતને લઈને અટકળો અને વાતો વહેતી થઈ હોય તો તે એ છે કે, જીતુ વાઘાણીની જગ્યા કોને મળશે?
કોની કોની પ્રદેશ પ્રમુખની ટર્મ થાય છે પૂરી
ઓગસ્ટ 2016માં જીતુ વાઘાણીની વરણી થઈ હતી
પેટાચૂટણી બાદ પ્રદેશપ્રમુખ બદલાશે
ગુજરાતમાં ભાજપ પ્રદેશ પ્રમુખની ટર્મ પૂરી થતા નવા પ્રદેશ પ્રમુખની વરણીનો સમય પાકી ગયો છે ત્યારે જીતુ વાઘાણીની જગ્યાએ નવા પ્રદેશ પ્રમુખ કોણ આવશે તે અંગે જાતભાતની ્ટકળો લગાવાઈ રહી છે જો કે, જ્યાં સુધી આ અંગે દિલ્હીથી કન્ફોર્મેશન ન આવે ત્યાં સુધી ગુજરાત ભાજપ મગનું નામ મરી પાડવા તૈયાર નથી.
કોની કોની પ્રદેશ પ્રમુખની ટર્મ થાય છે પૂરી
જૂનના પહેલા અઠવાડિયામાં દિલ્હી, છત્તીસગઢ અને મણિપુરના ભાજપ અધ્યક્ષનો કાર્યકાળ પૂરો થતાં પક્ષના મોવડી મંડળે આ પદે ફેરફાર કર્યા હતા, ત્યારે ગુજરાતમાં જીતુ વાઘાણીના સ્થાને અન્ય કોઈ પ્રમુખ પદ સંભાળશે તેવો ગણગણાટ શરૂ થયો હતો. જો કે, રાજ્યસભાની ચૂંટણીમાં ભાજપના ત્રણેય ઉમેદવારોની જીત થતાં ચર્ચા છે કે, વાઘાણી હજી થોડા મહિના સુધી ગુજરાત ભાજપના અધ્યક્ષ તરીકે કાર્યભાર સંભાળશે.
પેટાચૂટણી બાદ પ્રદેશપ્રમુખ બદલાશે
ભાજપના આંતરિક વર્તુળોમાં ગણગણાટ છે કે, ગુજરાતમાં ભાજપના પ્રદેશ પ્રમુખ હાઈકમાન્ડ અને PM મોદી તેમજ અમિત શાહની મહોર વાગ્યા બાદ જ બદલાઈ શકે છે. રાજ્યમાં વિધાનસભાની પેટાચૂંટણી, મ્યુનિસિપલ કોર્પોરેશન, મ્યુનિસિપાલિટી, જિલ્લા અને તાલુકા પંચાયતની ચૂંટણીઓ યોજાવાની છે ત્યારે સંગઠનમાં મહત્વના ફેરફાર આ ચૂંટણી પછી જ થશે તેમ કહી શકાય.
ઓગસ્ટ 2016માં જીતુ વાઘાણીની વરણી થઈ હતી
રાજનૈતિક વર્તુળોમાં ઉઠી રહેલી ચર્ચાઓ મુજબ સીએમ વિજય રૂપાણીના કાર્યકાળનું ત્રીજું વર્ષ પૂરું થાય પછી કેબિનેટમાં ફેરફાર થઈ શકે છે. સૂત્રના જણાવ્યા મુજબ, જીતુ વાઘાણીને ગુજરાત ભાજપના પ્રમુખ પદેથી હટાવીને મંત્રી મંડળમાં મહત્વની જવાબદારી સોંપાઈ શકે છે. ઓગસ્ટ 2016માં જીતુ વાઘાણીની વરણી થઈ હતી અને તેઓ ગુજરાત ભાજપના સૌથી યુવા પ્રમુખ બન્યા હતા. વિજય રૂપાણીને મુખ્યમંત્રી બનાવાતા ભાજપ અધ્યક્ષ તરીકે જીતુ વાઘાણીની પસંદગી કરાઈ હતી.
જીતુ વાઘાણીનો ઈતિહાસ રસપ્રદ
જીતુ વાઘાણી પ્રથમ ધારાસભ્ય હતા જેમણે પ્રદેશ ભાજપ અધ્યક્ષનું પદ સંભાળ્યું હતું. ભાવનગર શહેરથી રેકોર્ડ માર્જિનથી તેઓ 2017ની વિધાનસભા ચૂંટણી જીત્યા હતા. ભારતીય જનતા યુવા મોરચાના પ્રમુખ તરીકે જીતુ વાઘાણીએ રાજકીય કરિયર શરૂ કર્યું હતું. પ્રદેશ અધ્યક્ષ બનાવાયા તે પહેલા તેમણે પાર્ટીની કોર ટીમ સાથે રહીને કામ કર્યું હતું. ગુજરાતમાં જ્યારે પાટીદાર અને અન્ય જ્ઞાતિઓના આંદોલનો ચરમ પર હતા ત્યારે વાઘાણીને અધ્યક્ષ પદ સોંપાયું હતું.