અસારવાના ધારાસભ્યની દાદાગીરી વીડિયો વાયરલ થયાં બાદ ASI ઉદયસિંહએ VTV સાથે ખાસ વાતચીત કરી હતી અને ભાવૂક થયાં હતા.
અમદાવાદમાં અસારવાના MLA પ્રદીપ પરમારની પોલીસકર્મી સામે દાદાગીરી
ASI ઉદયસિંહ વીટીવી સાથેની વાતચીતમાં થયાં ભાવૂક
કહ્યું- ધારાસભ્યએ આ ભાષામાં વાત ન કરવી જોઇએ
ASI ઉદયસિંહે ભાવૂક થઈને જણાવ્યું હતું કે, અમે અમારું કામ કરી રહ્યા હતા અને ધારાસભ્ય કહી રહ્યા હતા કે અમે પ્રજાને હેરાન કરી રહ્યા છીએ. તો અમે કોઈ ગાડી ત્યાંથી ઉપાડી પણ ન હતી.
આવી ભાષામાં ધારાસભ્યએ વાત ન કરવી જોઇએ : ASI
પોલીસ કર્મીએ વીટીવી સાથેની વાતચીતમાં જણાવ્યું હતું કે, જે ભાષામાં ધારાસભ્યએ વાત કરી, તેમ ન કરવી જોઈએ. ઘટના અંગે મેં મારા ઉપરી અધિકારી સાથે વાત કરી હોવાનું પણ તેમણે જણાવ્યું હતું અને આગામી સમયમાં અધિકારી કહેશે તેમ કાર્યવાહી કરવાની વાત કરી હતી.
શું બની હતી ઘટના ?
અસારવાના ધારાસભ્ય પ્રદિપ પરમાર શાહીબાગ વિસ્તારમાંથી પસાર થઈ રહ્યા હતા ત્યારે ટ્રાફિક પોલીસ દ્વારા વાહન ટોઈંગ કરવામાં આવી રહ્યા હતા. આ દરમિયાન ધારાસભ્ય પોતાની કારમાંથી નીચે ઉતર્યા અને પોલીસકર્મી પર લાલઘૂમ થયાં હતા અને ફરજ બજાવી રહેલા પોલીસકર્મીને 2 મિનિટમાં સસ્પેન્ડ કરાવવાની ધમકી આપી હતી.
ધારાસભ્યએ જમાવ્યો રોફ
ધારાસભ્ય પોલીસ કર્મચારીનો હાથ ખેંચીને કહે છે કે, અહીં ઉભા રહો હાથ શું બધુ પકડીશ. જાણો રોફ જમાવતા હોય તે રીતે ધારાસભ્ય કોઇને ફોન કરીને કહે છે કે, અહીં મારી સામે એક વ્યક્તિ દવા લેવા ગયો અને તેનું વાહન ટોઇંગ કરી લીધું. દિસમાં 50 વખત અહીં જ ટોઇંગ કરવા કેમ આવે છે ?
હું કહું એટલે ઉભા રહી જવાનું નહીંતર 2 મિનિટમાં સસ્પેન્ડ થઈ જશો
ત્યારબાદ ધારાસભ્યએ પોતાની સાથે આવેલ વ્યક્તિને પોલીસકર્મીનો ફોટો પાડવા જણાવ્યું હતું. બાદમાં ભાજપના ધારાસભ્યએ ધમકી આપતા કહ્યું કે હું કહું એટલે ઉભું રહેવાનું, નહીંતર સસ્પેન્ડ થઈ જશો 2 મિનિટમાં, ઓળખો છો મને? આ સમગ્ર ઘટનાનો વીડિયો વાયરલ થયો હતો.