ગુજરાતમાં રેલીઓનો ભાજપને રેલો આવ્યો છે ત્યારે હવે ભાજપના પ્રદેશ પ્રમુખ સી.આર. પાટીલનો કોરોના પોઝિટિવ આવ્યો છે. ત્યારે હવે ભાજપ પ્રદેશ પ્રમુખના કાર્યક્રમમાં જોડાયેલા ભાજપના નેતાઓ અને કાર્યકરોમાં ફફડાટ મચી જવા પામ્યો છે. સૌરાષ્ટ્રમાં પણ સી.આર. પાટીલના પ્રવાસ બાદ કોરોનાનો રાફડો ફાટ્યો હતો. એક પછી એક ભાજપના નેતાઓ કોરોનામાં સપડાયા હતા.
ભાજપ પ્રદેશ પ્રમુખ સી.આર.પાટીલનો કોરોના પોઝિટિવ
એન્ટિજન રિપોર્ટ નેગિટિવ આવ્યા બાદ હવે RT-PCR રિપોર્ટ પોઝિટિવ આવ્યો છે.
ગુજરાતના અનેક વિસ્તારોમાં કર્યો પ્રવાસ, રેલીઓ અને સભાઓ
એપોલો હોસ્પિટલમાં ગઇકાલે ભાજપ પ્રદેશ પ્રમુખ સી.આર. પાટીલનો કોરોના રિપોર્ટ કરવામાં આવ્યો હતો. જેમાં તેમનો એન્ટિજન રિપોર્ટ નેગેટિવ આવ્યો હતો. જ્યારે આજે તેમનો RT-PCR કોરોના ટેસ્ટ રિપોર્ટ પોઝિટિવ આવ્યો છે. જેને લઇને ભાજપ અને પાટીલના આગામી દિવસોના તમામ કાર્યક્રમો રદ્દ કરવામાં આવ્યા છે. તો બીજી તરફ તેના સંપર્કમાં આવેલા નેતાઓ ચિંતામાં મુકાયા છે.
ગઇકાલે તેમણે ટ્વિટ કર્યું હતું કે, 'મારી તબિયત સારી છે. મારો એન્ટીજન ટેસ્ટ નેગેટીવ આવ્યો છે. RT-PCRનો રિપોર્ટ પેન્ડીંગ છે. અત્યારે હું સંપૂર્ણ સ્વસ્થ છું.' ત્યારે હવે આજે તેમનો RT-PCR રિપોર્ટ પોઝિટિવ આવ્યો છે.
સી.આર. પાટીલની સૌરાષ્ટ્ર મુલાકાત બાદ પણ અનેક નેતાઓના રિપોર્ટ પોઝિટિવ
તમને જણાવી દઈએ કે કોરોનાનું સંકટ હોવા છતા સી.આર. પાટીલે કાર્યક્રમ યોજાયા હતા. સૌરાષ્ટ્રમાં પણ સી.આર. પાટીલના પ્રવાસ બાદ કોરોનાનો રાફડો ફાટ્યો હતો. એક પછી એક ભાજપના નેતાઓ કોરોનામાં સપડાયા હતા. તેવામાં હવે કેટલાક ભાજપના મંત્રીઓ, ધારાસભ્યો અને કાર્યકરોમાં કોરોના પોઝિટિવ આવી ચૂક્યા છે. તો હવે પાટીલને કોરોના પોઝિટિવ આવતા તેમના સંપર્કમાં આવેલા નેતાઓ અને કાર્યકરોનો રિપોર્ટ કરવામાં આવશે?
કમલમમાં 7 કોરોના પોઝિટિવ
ભાજપના પ્રદેશ પ્રવક્તા ભરત પંડ્યા ઉપરાંત પ્રદેશ કાર્યાલય કમલમના પ્રદેશ કાર્યલાયના મંત્રી પરેશ પટેલ, મહિલા મોરચાના કાર્યાલય મંત્રી મોના રાવલ, ટેલિફોન ઓપરેટર રાકેશ પંડ્યા, સફાઈકર્મીઓને લાવનાર ડ્રાઈવર, 2 સફાઈકર્મી કોરોના પોઝિટિવ આવ્યા છે. કમલમમાં કોરોનાના પોઝિટિવ કેસ આવતા કાર્યાલયની ઓફીસ બહાર રીબીનવાળા બેરિકેડ લગાવવામાં આવ્યા છે.