નિષ્ફળ / ગુજરાતની કંપનીની કોરોના ટેસ્ટ કીટની માન્યતા રદ્દ, ICMR દ્વારા આ 5 કીટને મળી મંજૂરી

• પાંચ કંપનીઓને મળી મંજુરી 
• અમેરિકા અને યુરોપની કંપનીઓને સરળતાથી મળશે મંજુરી 
• ગુજરાતની કંપનીએ કહ્યું સુધારા વધારા કરી ફરી અરજી કરીશું 

100% સાચું પરિણામ આપે માત્ર તે જ કંપનીને મંજુરી 

ICMRમાં કોરોના ટેસ્ટ કિટ માટે 20 અલગ અલગ કંપનીઓ આવી હતી જેમાંથી માત્ર 5ને મંજૂરી આપવામાં આવી છે જ્યારે 15 ટેસ્ટ કિટ પરીક્ષણમાં નિષ્ફળ રહી છે. નોંધનીય છે કે જે ટેસ્ટ કિટ પોઝિટિવ અને નેગેટિવ રીપોર્ટ આપવામાં 100% સફળ રહી તેમને જ લાઈસન્સ આપવામાં આવ્યા છે. 

ગુજરાતની કંપની નિષ્ફળ : 

ICMR દ્વારા પહેલાં જ DBT, DST, CSIR અને DAE જેવી પ્રયોગશાળાઓને સૂચના આપી હતી કે કોવિડ-19નું પરિક્ષણ શરુ કરવામાં આવે તે પહેલાં તેના દિશા-નિર્દેશોનું કડકપણે અમલ કરવામાં આવે. ગુજરાતની કંપનીને પહેલાં ટેસ્ટ કિટ માટે મંજુરી આપવામાં આવી હતી પરંતુ કંપની આ દિશા-નિર્દેશોનું પાલન કરવામાં નિષ્ફળ રહી હતી જે બાદ તેની માન્યતા રદ્દ કરી દેવામાં આવી છે. 

વિદેશોની કંપનીઓને પણ મળશે મંજુરી 

ICMRએ વધુમાં કહ્યું કે જે કંપનીને USFDA ને European Union CE તરફથી મંજૂરી મળી છે તેમને ડ્રગ્સ કંટ્રોલર જનરલ ઓફ ઈન્ડિયા તરફથી સીધી મંજૂરી આપી દેવામાં આવશે. 

કઈ પાંચ કંપનીને મળી મંજુરી

કોરોના વાયરસનું ટેસ્ટ કરવામાં જે કંપનીની ટેસ્ટ કિટે 100% પરિણામ આપ્યું તેવી 5 કંપનીને મંજુરી આપી દેવામાં આવી છે જેમાં Altona Diagnostics, My Lab, Kilpest, Seegene અને  SD Biosesnsorનો સામાવેશ થાય છે. 

શું કહેવું છે કંપનીનું?

કોસારા (CoSara) કંપનીનું કહેવું છે કે આ અમારા માટે આશ્ચર્યની વાત છે કે આવું કેવી રીતે બન્યું. અમારા ટેસ્ટિંગ વખતે અમને પરિણામ 100 ટકા વાયરસની સુસંગતતા પોઝિટિવ મળી હતી જ્યારે 88 ટકા નેગેટિવ હતી. જો કે આ ટેસ્ટ ખૂબ જ સેન્સેટિવ હોય છે જેથી અમે ફરીથી તપાસ કરીશું અને જોઈશું કે ક્યાં કાચું કપાયું છે અને તેના પર કામ કરીશું. અમે પ્રયાસ કરીશું અને ફરીથી સબમિટ કરીશું.