ગામના નિયમ મુજબ જો કોઈ વ્યક્તિ દારૂ પીતા પકડાય તો તેણે ઘટનાસ્થળે જ રૂા. 2000નો દંડ ચુકવવા પડે એ તો ઠીક પણ આખા ગામમાં જમણવાર કરવો પડે છે. એટલે જે તે માણસને એકવાર દારૂ પીવાનો ખર્છ રૂા. 20,000 થી 25000 જેટલો થઈ જાય છે.
2013-14થી અમે આ નિયમ બનાવ્યો
750થી 800 લોકોને મટન-બાટીની પાર્ટી કરાવી પડે
બનાસકાંઠાના સરહદી ગામોમાં રાજસ્થાનમાંથી દારૂ ઝડપથી મળી રહે છે
આ ગામનું નામ છે ખાતિસિતારા. તે બનાસકાંઠા જિલ્લાના અમીરગઢ તાલુકામાં આવેલુ છે. આ ગામના વડિલોએ નિયમ બનાવ્યો છે કે, જે કોઈ દારૂ પીતુ પકડાશે તેને સ્થળ ઉપર જ રૂા. 2000નો દંડ ભરવાનો રહેશે. જો દંડ ન ભરે અને આનાકાની કરે તો તેનો દંડ સીધો વધારીને રૂા. 5000 કરી દેવામાં આવે છે અને આ ઉપરાંત ગામમાં વસતા 750થી 800 લોકોને મટન-બાટીની પાર્ટી કરાવી પડે છે. જેનો ખર્છ રૂા. 20.000 જેટલો થઈ જાય છે.
કેમ નક્કી કરી આવી વિચિત્ર પ્રથા
ગામના સરપંચનું કહેવુ છે કે, દારૂનું વ્યસન એ વ્યક્તિને જ નહીં પરંતુ આખા પરિવારને બરબાદી તરફ દોરી જાય છે અને સમાજ પરિવારોનો સમૂહ છે એટલે આડકતરી રીતે તેને કારણે આખો સમાજ બરબાદી તરફ ખેંચાઈ જાય છે એમાંય 2013-14થી અમે આ નિયમ બનાવ્યો છે જેના પછી લોકો દારૂનો વ્યસન કરતા બે વાર વિચાર કરે છે.
નિયમ બનાવ્યા બાદ ઘટી ગઈ દારૂની ઘટના
અગાઉ ગામમાં છાશવારે લોકો દારૂ પીને બબાલ કરતા પણ આ દંડને કારણે વર્ષ 2018માં માત્ર એક જ ઘટના ઘટી હતી જ્યારે 2019માં તો એકેય ઘટના નથી ઘટી.
રાજસ્થાનથી મળી રહે છે દારૂ
બનાસકાંઠાના સરહદી ગામોમાં રાજસ્થાનમાંથી દારૂ ઝડપથી મળી રહે છે જેને કારણે અહિં દારૂની બદી ફુલી ફાલી છે ત્યારે ગામના વડિલો દ્વારા દંડની જોગવાઈ કરીને ગામને દારૂના વ્યસનમાંથી મુક્ત રાખવાનો પ્રયાસ કરાયો છે.