ભાટ ટોલનાકા પાસે ચૂલા ચિકન રેસ્ટોરન્ટમાંથી ગુજરાત ATSએ ડ્રગ્સનો વેપલો ઝડપી પાડ્યો છે.
ગાંધીનગરમાંથી ઝડપાયું ડ્રગ્સ
ATSએ ઝડપી પાડ્યું ડ્રગ્સ
ત્રણ આરોપીની કરાઇ ધરપકડ
ગુજરાતમાં શહેરીકરણ વધવાની સાથે સાથે યુવાનો દ્વારા નશીલા માદક દ્રવ્યોનું સેવન કરવાના પ્રમાણમાં પણ માતબર વધારો થયો છે. યુવાનો જે રીતે ડ્રગ્સના રવાડે ચડી રહ્યાં છે તેવા સંજોગોમાં આ દૂષણને નાબૂદ કરવા માટે પોલીસ અને અન્ય એજન્સીઓ પણ આ બદીને રોકવા માટે સક્રિય બની ગઈ છે.તેમ છતાં પણ ગુજરાતમાં આ દૂષણ રોકાવાનું નામ જ નથી લેતું ત્યારે આજે ગુજરાત ATSએ ગાંધીનગરની એક નામાંકિત રેસ્ટોરન્ટ માંથી ડ્રગ્સના જથ્થા સાથે ત્રણ આરોપીઓની ધરપકડ કરી છે.
ચૂલા ચિકન રેસ્ટોરન્ટમાંથી ઝડપાયું ડ્રગ્સ
મળતી વિગત મુજબ ગુજરાત ATSની ટીમે મળેલી બાતમીને આધારે ભાટ ટોલટેક્ષ નજીક આવેલી ચૂલા ચિકન રેસ્ટોરન્ટમાં રેડ કરી હતી. જેમાં નશાયુક્ત બિસ્કિટનો વેપલો કરનાર 3 નબીરાઓને ઝડપી લીધા હતા. આ ત્રણેય ઈસમો આશરે 3 એક દોઢ વર્ષથી આ નશાને વેચી યુવાનોને ગેરમાર્ગે દોરી રહ્યા હતા.
ગાંજાના છોડમાંથી બિયા કાઢી ખાદ્ય વસ્તુઓમાં નાખી નશોનો વેપલો કરતાં
હાલમાં ગુજરાતમાં ડ્રગ્સ ઝડપી પાડવાનો સિલસિલો યથાવત છે. ત્યારે એક બાદ એક તાર જોડી ઝડપાયેલા આરોપીઑ પાસેથી વિગતો મેળવી ડ્રગ્સની સિન્ડીકેટને ઉખાડી ફેકવાના પ્રયાસો ચાલી રહ્યા છે. પણ આ રેડ દરમિયાન નશાખોરીનો સમાન જોઈ પોલીસ પણ ચોંકી ઉઠી હતી. એક નવી જ મોડેસ ઓપરેન્ડી આરોપીએ અપનાવી હતી. જેમાં કેનાબીજ એટલે કે ગાંજાના છોડમાંથી જે બિયા નીકળતા હોય છે તેમાંથી તેલ નીકળતું હોય છે અને આ તેલને કુકીઝ એટલે કે બિસ્કિટમાં ભેળવીને નશોનો કાળો કારોબાર ચલાવતા હતા.
આરોપીઓના નામ
કિશન ઠાકોર
અંકિત રાજકુમાર ફુલહરી
સોનું
આરોપીઓની સાથે 1.59 લાખનો મુદ્દામાલ પણ જપ્ત
ઉપરોક્ત શખ્સો તમામ ખાદ્ય પદાર્થમાં ગાંજાનો નશો ભેળવીને હજારો રૂપિયામાં વેચી મારતા હતા. એક બિસ્કિટના 4 હજાર રૂપિયા લેતા હતા. આરોપીઓની ધરપકડ કરી તેમની પાસેથી 02 નશાયુક્ત બિસ્કિટ અને ત્રણ લાડુ પણ ગુજરાત ATS દ્વારા જપ્ત કરવામાં આવ્યા છે. તેમજ 1.59 લાખનો મુદ્દામાલ પણ કબજે કરી આગળની કાર્યવાહી હાથ ધરવામાં આવી છે. હવે આ કેસની આગળની તપાસ ગાંધીનગર SOG દ્વારા કરવામાં આવશે. રેસ્ટોરન્ટમાં એમેઝોનના બોક્સ પણ મળી આવ્યા તેમાંથી ડ્રગ્ઝ ઝડપી લેવામાં આવ્યું છે.