ગુજરાત પોલીસને આજે મોટી સફળતા મળી છે જેમા એક આરોપી અમદાવાદમાં બ્લાસ્ટનો આરોપી છે જ્યારે બીજો ગુજરાતમાં ચરસ ઘૂસાડવાનો આરોપી છે.
ગુજરાત ATSને મળી મોટી સફળતા
કાશ્મીરથી પકડાયા ગુજરાતના બે મોટા ગુનેગારો
અમદાવાદ બ્લાસ્ટનો આતંકવાદી અને ચરસ ઘૂસાડવાનો આરોપી ઝડપાયા
ગુજરાત ATSને મળી મોટી સફળતા
ગુજરાતમાં આતંકી ષડયંત્રની સામે રાજ્યની ATSને મોટી સફળતા મળી છે. પંદર વર્ષથી ફરાર ચાલી રહેલા બે આરોપીઓની જમ્મૂ કાશ્મીરથી ધરપકડ કરવામાં આવી છે અને બંનેને અમદાવાદ લાવવામાં આવી રહ્યા છે. આજે રાજ્યનાં પોલીસ વડા આશિષ ભાટિયાએ પત્રકાર પરિષદ સંબોધી હતી જેમા તેમણે આ ઓપરેશનમાં સામેલ પોલીસ જવાનોની પીઠ થાબડી હતી.
કાલુપુરમાં કર્યો હતો બ્લાસ્ટ, 15 વર્ષથી હતો ફરાર
આશિષ ભાટિયાએ કહ્યું કે ગુજરાત પોલીસને આજે મોટી સફળતા મળી છે જેમા એક આરોપી અમદાવાદમાં બ્લાસ્ટનો આરોપી છે જ્યારે બીજો ગુજરાતમાં ચરસ ઘૂસાડવાનો આરોપી છે. વર્ષ 2006માં ગુજરાતનાં અમદાવાદ શહેરમાં આવેલ કાલુપુર સ્ટેશન પર અડધી રાતે દોઢ વાગે બ્લાસ્ટ થયો હતો જેમા એક વ્યક્તિનું મોત થયું હતું. આ મામલે તપાસ કરવામાં સામે આવ્યું હતું કે કાશ્મીરથી LETના મોડ્યુલનાં આતંકવાદીઓ આ આતંકી હુમલાઓની પાછળ હતા. આતંકી હુમલા કરનારા નવ આતંકવાદીઓની ધરપકડ કરવામાં આવી હતી જ્યારે છેલ્લા 15 વર્ષથી બિલાલ કાશ્મીરી નામનો આરોપી ફરાર ચાલી રહ્યો હતો.
J&K પોલીસની મદદથી બેની ધરપકડ કરાઇ
દિપેન ભદ્રનના નેતૃત્વમાં ગુજરાતનાં પોલીસ જવાનોની એક ટીમ જમ્મૂ કાશ્મીર પહોંચી હતી જ્યાં જમ્મૂ અને કાશ્મીર પોલીસની પણ મદદ લેવામાં આવી હતી. પોલીસનાં સંયુક્ત ઓપરેશનમાં આરોપીની ધરપકડ કરવામાં આવી છે.
LETમાં જોડાઈ બન્યો આતંકી
નોંધનીય છે કે પોલીસ તપાસમાં સામે આવ્યું છે કે બિલાલ કશ્મીરી નામનો આતંકી 2006માં ભરૂચમાં આવેલ મદરેસામાં ભણતો હતો અને તે બાદ તે લશ્કર એ તોયબા નામક ખૂંખાર આતંકવાદી સંગઠનમાં જોડાઈ ગયો હતો.
POKમાં જતાં હતા ટ્રેનિંગ લેવા, નવની ધરપકડ અને એકનું એન્કાઉન્ટ થયું હતું
તપાસમાં સામે આવ્યું હતું કે આ તમામ આતંકવાદીઓને ટ્રેનિંગ લેવા માટે પાકિસ્તાનનાં કબજા હેઠળનાં કાશ્મીરમાં લઈ જવામાં આવી રહ્યા હતા. આ આખી ઘટનામાં કુલ નવ આરોપીઓની ધરપકડ કરવામાં આવી હતી એક અન્ય એક આરોપી બશીર કાશ્મીરી નામક આતંકવાદી કાશ્મીરમાં એક એન્કાઉન્ટમાં ઠાર થયો હતો.
ચરસનો આરોપી હુસૈન અલી ડાર ઝડપાયો
બીજા જે આરોપીની ATS દ્વારા ધરપકડ કરવામાં આવી છે તેનું નામ મોહંમદ હુસેન ઉર્ફે હુસેન અલી ડાર છે. ગુજરાતમાં 108 કિલો ચરસ લાવવાનો આરોપી ડાર પણ 2006થી જ ફરાર હતો. ઉનવામાં પકડાયેલા દસ કિલો ચરસનાં કેસમાં પૂછપરછ બાદ ડારનું નામ ખૂલ્યું હતું. આ જ કેસમાં પહેલા શંકરપ્રસાદ નામક વ્યક્તિની ધરપકડ કરવામાં આવી હતી જે એરફોર્સની નોકરી છોડીને તેના જ આઈ કાર્ડનો ઉપયોગ કરીને રાજ્યમાં ચરસ છુપાડતો હતો.