ગુજરાતમાં ATSએ વધુ એક મોટું ઓપરેશન સરળતા પૂર્વક પાર પાડ્યુ છે. ATSએ રાજ્ય બહારથી ગુજરાતમાં ઠલવાતા હથિયારોનો કારોબાર ઝડપી લીધો છે. 54 જેટલાં ઘાતકી હથિયાર સાથે 22 આરોપીઓને દબોચી લેતા ઉહાપોહ સર્જાયો છે. પોલીસની પ્રાથમિક પૂછપરછમાં આરોપીઓ રાજ્ય બહારથી હથિયારો લાવતા હોવાનું ખૂલ્યું છે. જે સમગ્ર મામલે ઊંડાણ પૂર્વકની તપાસ ચાલી રહી છે. તપાસ અને પૂછપરછ બાદ આ કૌભાંડમાં વધુ શખ્સોની સંડોવણી ખૂલી તો નવાઈ નહીં.
નકસલ પ્રભાવિત વિસ્તારથી હથિયાર આવ્યા છે કે કેમ?
ગુજરાતમાં ગેરકાયદે હથિયાર વેચાણના રેકેટનો ગુજરાત ATSએ પર્દાફાસ કર્યો છે. ગુજરાત ATSના વધુ એક ગુપ્ત ઓપરેશનના હથિયાર તસ્કરીના ગુન્હામાં સંડોવાયેલ 22 જેટલાં આરોપીઓ ઝડપાયા હતા. અત્યાર સુધીમાં 54 જેટલા હથિયારો મળી આવ્યાં છે. જે તમામની પૂછપરછમાં રાજ્ય બહારથી ગેરકાયદે રીતે હથિયાર ઘુસાડવામાં આવતા હોવાનું સામે આવ્યું છે. નોંધનીય છે કે પકડાયેલ આરોપીઓમાં મોટાભાગના શખ્સો સૌરાષ્ટ્રના હોવાનું પણ ખૂલ્યું છે. આટલા મોટા પ્રમાણમાં હથિયારો આવ્યાં ક્યાંથી અને શું કરવાનું હતું. તે સહિતની દિશામાં પૂછપરછનો ધમધમાટ ચાલી રહ્યો છે. નકસલ પ્રભાવિત વિસ્તારથી હથિયાર આવ્યા છે કે કેમ? તે અંગે પણ પોલીસે તપાસના ચક્રોગતિમાન કર્યા છે.
ATS ની કામગીરી આજકાલ નોંધપાત્ર
ATS ની કામગીરી આજકાલ ગુજરાતમાં નોંધપાત્ર રીતે દેખાઈ આવે છે. અગાઉ થોડા દિવસ પહેલા જ ડ્રગ્સ કેસમાં પણ ગુજરાત ATSને મોટી સફળતા મળી હતી. જેમાં ઉત્તરપ્રદેશના મુઝફ્ફરનગરમાંથી 210 કિલો હેરોઈનનો જથ્થો ઝડપી પાડવામાં આવ્યો છે. ATSની આ કાર્યવાહીમાં 2 આરોપી પણ ઝડપાયા છે.આ તપાસમાં આરોપીઓ પાસેથી 210 કિલો હેરોઈન મળી આવ્યુ છે. મુઝફ્ફરનગરના કિદવઈનગરમાં રેઈડ પાડવામાં આવી હતી. ગુજરાત ATSએ રેડ પાડી હૈદર નામના આરોપી સાથે તેના અન્ય એક સાથી ઈમરાનની પણ અટકાયત કરી લીધી છે. આપને જણાવી દઈએ કે, અગાઉ ગુજરાતના દરિયા કિનારેથી ઝડપાયેલા ડ્રગ્સનુ ઉત્તરપ્રદેશ કનેક્શન ખુલ્યુ હતુ.