ગુજરાત એન્ટી ટેરેરિસ્ટ સ્ક્વોડને સતત બીજા દિવસે મોટી સફળતા મળી છે. ગઈકાલે(શુક્રવાર) ગુજરાત એટીએસએ છોટા રાજન ગેંગ સાથે સંકળાયેલાં અને લૂંટના કુખ્યાત આરોપી હરેશ ગોસ્વામીની ધરપકડ કરી હતી. ત્યારે આજે(શનિવાર) ગુજરાત ATS દ્વારા દાઉદના ઈશારે કામ કરતાં શરીફ ખાનનાં સાગરિત મુંબઈના બાબુ સોલંકીની અડાલજ નજીકથી ધરપકડ કરી છે.
લૉકડાઉન ચાલી રહ્યું છે ત્યારે ગુજરાત ગુજરાત ATS એક બાદ એક રાજ્યમાં અન્ડરવર્લ્ડ સાથે સંકળાયેલાં કુખ્યાત આરોપીઓને ઝડપવામાં સફળતા મેળવી રહ્યું છે. આજે બાતમીને આધારે ગુજરાત ATS દ્વારા ગાંધીનગરના અડાલજમાંથી કુખ્યાત આરોપી મુંબઈના બાબુ સોલંકીને ઝડપી લીધો હતો. આરોપી બાબુ સોલંકી શરીફ ખાનનો સાગરિત છે અને શરીફ ખાનએ દાઉદના ઈશારે કામ કરે છે. આમ, બાબુ સોલંકીની ધરપકડથી ગુજરાત ATSને સતત બીજા દિવસે મોટી સફળતા મળી છે.
સાબિરમીયાની ધરપકડ બાદ બાબુ સોલંકી ફરાર થયો હતો
વર્ષ 2006માં ખંડણી મુદ્દે શરીફ ખાન અને વહાબ ગેંગ સામ સામે આવી હતી. આ ગુનાઓમાં પણ બાબુ સોલંકી વોન્ટેડ આરોપી હતો. 10 કરોડ રૂપિયા કઢાવવા માટે બાબુ સોલંકીએ 3 કરોડની ખંડણી લીધી હતી. ISI એજન્ટ સાબિરમીયા સિપાઈની મદદથી રૂપિયા કઢાવવાના હતા. પરંતુ સાબિરમીયાની ધરપકડ બાદ બાબુ સોલંકી ફરાર થયો હતો. બાબુ સોલંકી દાઉદના ઈશારે કામ કરતાં શરીફ ખાનનો સાગરીત છે. શરીફ ખાન સામે પણ નાર્કોટિક્સ, હથિયારો, ખૂન, લૂંટ અને ખંડણી સહિતના અસંખ્ય ગુનાઓ નોંધાયેલાં છે.