ગુજરાતમાં એક અવાર-નવાર મોટા પ્રમાણમાં ડ્રગ્સ પકડાવવાનો સિલસિલો યથાવત્ છે, ત્યારે ગુજરાત ATSએ વડોદરાના સાવલીના મોકસી ખાતે નેક્ટર કેમ કંપનીમાં દરોડા પાડીને 1 હજાર 125 કરોડની કિંમતનુ 225 કિલો MD ડ્રગ્સ ઝડપી પાડ્યું હતું. આ મામલે ગુજરાત ATSના SP સુનિલ જોશીએ મહત્વનો ખુલાસો કર્યો છે. તેઓએ કહ્યું કે, કેટલાંક લોકોએ ડ્રગ્સનો જથ્થો છુપાવ્યાની બાતમી ATSને મળી હતી. જેના આધારે સુરતના મહેશ વૈષ્ણવની અટકાયત કરીને 225 કિલો MD ડ્રગ્સ જપ્ત કરવામાં આવ્યું હતું.
વધુમાં જણાવ્યું કે, 'આરોપી જાન્યુઆરી મહિનાથી વડોદરામાં ડ્રગ્સ બનાવતા હતા. પિયુષ પટેલ અને તેનો સાગરીત બન્ને વડોદરામાં જ રહેતા હતા. આ રેકેટમાં મુંબઈના કેટલાંક લોકો પણ સામેલ હતા. મુંબઈના ઈબ્રાહિમ નામના વ્યક્તિની આ ડ્રગ્સ કેસમાં સંડોવણી ખુલી છે. સાથે રાકેશ અને વિજય નામના વ્યક્તિઓ પણ ડ્રગ્સ બનાવતા હોવાનો ખુલાસો થયો છે. જેથી ATSએ નેક્ટર કેમ કંપનીના 2 પાર્ટનર પીયુષ પટેલ અને મહેશ વૈષ્ણવની ધરપકડ કરી લીધી છે. આરોપીઓ એક વર્ષથી ડ્રગ્સનો ધંધો કરતા હતા. આરોપીઓ કોરોનાની હાઈડ્રોક્લોરોક્વિન દવાની આડમાં નશીલા ડ્રગ્સ બનાવતા હતા. જ્યાર બાદ કંપનીમાં જ ડ્રગ્સ છૂટાછવાયા મૂકી રખાતા.'
સાવલીમાંથી ઝડપાયેલા ડ્રગ્સનું સુરત કનેક્શન
વધુમાં તમને જણાવી દઇએ કે, વડોદરાના સાવલીમાંથી ઝડપાયેલા રૂ. 1125 કરોડના ડ્રગ્સમાં સુરત કનેક્શન સામે આવ્યું છે. આ ઘટનામાં સુરતના મોટા વરાછાના મહેશ વૈષ્ણવ નામના શખ્સને પોલીસે ઝડપી પાડ્યો છે. 2 દિવસ પહેલાં જ મહેશ વૈષ્ણવને મધરાત્રે પોલીસ ઉઠાવી ગઇ હતી. તમને જણાવી દઇએ કે, મહેશ વૈષ્ણવ મોટા વરાછાના માર્વેલ લક્ઝુરિયા ફ્લેટમાં રહે છે. મહેશ વૈષ્ણવ મૂળ ધોરાજીનો વતની છે.
ગઇકાલે સાવલીના મોક્સી ગામમાંથી ATSએ ઝડપ્યું હતું
ઉલ્લેખનીય છે કે, ગુજરાતના દરિયાઈ માર્ગે છેલ્લા ઘણા સમયથી આવી રહેલા ડ્રગ્સ પર ATSની બાજ નજર હતી. પરંતુ ઘર આંગણે વડોદરામાં જ એક ફેક્ટરીમાં બની રહેલા ડ્રગ્સ પર હવે 6 મહિના બાદ ગુજરાત ATSએ 1125 કરોડ રૂપિયાની કિંમતનું 225 કિલો જેટલું ડ્રગ્સ ઝડપી પાડ્યું છે, ગુજરાત ATSએ વડોદરાના સાવલીના મોકસી ગામની નેક્ટર કેમ કંપનીમાં રેડ કરીને 225 કિલો જેટલું એમડી ડ્રગ્સ ઝડપી પાડ્યું છે. ATSની ટીમે ડ્રગ્સનું વજન કર્યું હતું. ત્યાર બાદ ડ્રગ્સ જપ્ત કરીને ગાડીઓમાં ભરવામાં આવ્યું હતું. તો વડોદરા બાદ ભરૂચમાં પણ પનોલી GIDCમાંથી મોટી માત્રામાં ડ્રગ્સ ઝડપાયું છે. રિસર્ચ એન્ડ ડેવલોપમેન્ટ કંપનીમાંથી કરોડો રૂપિયાનું MD ડ્રગ્સ ઝડપાયું હતુ. જેની કિંમત 80થી 100 કરોડ રૂપિયા હોવાનું સામે આવ્યું છે. આમ રાજ્યમાં અલગ સ્થળેથી કરોડો રૂપિયાનું ડ્રગ્સ ઝડપી કાયદેસરની કાર્યવાહી હાથ ધરવામાં આવી છે.