મિશન 2022 / મધ્ય અને સૌરાષ્ટ્ર ઝોનની વિધાનસભા સીટના પ્રભારીઓના નામ જાહેર, બેઠકોનો ચિતાર મેળવવા ભાજપનો એક્શન પ્લાન

• મધ્ય-સૌરાષ્ટ્ર ઝોનની વિધાનસભા સીટના પ્રભારીઓના નામ જાહેર
• ગુજરાત વિધાનસભાની ચૂંટણી જીતવા ભાજપે કમરકસી લીધી
• મધ્ય ગુજરાતના 7 જિલ્લાની 40 બેઠકોના પ્રભારીઓની નિયુક્તિ

ગુજરાત વિધાનસભાની ચૂંટણીને લઇને ભાજપનું મંથન શરૂ થઇ ગયું છે. વિધાનસભાની બેઠકોનો ચિતાર મેળવવા માટે ભાજપે કવાયત તેજ કરી છે. ભાજપે 182 બેઠકો પૈકી 101 બેઠકોના પ્રભારી નિયુક્તિની જાહેરાત કરી છે. કચ્છ, સૌરાષ્ટ્ર અને મધ્ય-ઉત્તર ગુજરાતની બેઠકોવાઇઝ પ્રભારીની નિયુક્તિ કરી છે. મધ્ય ગુજરાતના 7 જિલ્લાની 40 બેઠકોના પ્રભારીઓની નિયુક્તિ કરાઈ છે. કચ્છ જિલ્લાની 6 બેઠકોનાં પ્રભારીની નિયુક્તિ કરાઈ તો ઉતર ગુજરાતના 5 જિલ્લાના પ્રભારીને નિયુક્ત કરવામાં આવ્યા છે. જ્યારે અમદાવાદ જિલ્લા-શહેરની 18 બેઠકોના પ્રભારી નિયુક્ત કરાયા છે. પ્રભારીની નિયુક્તિ બાદ વોર્ડ વાઇઝ પ્રવાસનું પણ સૂચન કરવામાં આવ્યું છે. વોર્ડ મુજબ પ્રવાસ યોજીને નબળા વોર્ડમાં તારણો શોધવાનો ટાસ્ક આપવામાં આવ્યો છે.

વડોદરા શહેર-જિલ્લાની 10 બેઠકો પર પણ પ્રભારીઓની નિમણૂંક

મહત્વનું છે કે, 18મી તારીખે PM મોદીએ વડોદરા ખાતે મધ્ય ગુજરાતની જંગી જાહેર સભા સંબોધ્યા બાદ બુધવારના રોજ ભાજપ દ્વારા મધ્ય ગુજરાતની 40 બેઠકોના પ્રભારીઓની નિમણૂંક કરવામાં આવી. વડોદરા શહેર-જિલ્લાની 10 બેઠકો પર પણ પ્રભારીઓની નિમણૂંક કરાઇ. PMની વડોદરાની સભામાં જંગી મેદની બાદ ભાજપે મધ્ય ગુજરાતમાં વિધાનસભાની તૈયારીઓ આરંભી દીધી છે.

પ્રદેશ અધ્યક્ષ શ્રી @CRPaatil દ્વારા મધ્ય અને સૌરાષ્ટ્ર ઝોનની વિધાનસભા બેઠકોના પ્રભારીશ્રીઓના નામોની જાહેરાત કરવામાં આવી

નવનિયુક્ત પ્રભારીશ્રીઓને ખૂબ ખૂબ અભિનંદન અને શુભકામનાઓ pic.twitter.com/IROhB8ZTHo

— BJP Gujarat (@BJP4Gujarat) June 21, 2022

ભાજપ સાથે વર્ષોથી સંકળાયેલા નેતાઓનો અનુભવ ચૂંટણીમાં કામે લગાડવા માટે ભાજપ દ્વારા આયોજન કરાયું હોવાનું સૂત્રો જણાવી રહ્યાં છે. જેના ભાગરૂપે હાલમાં કોઇ મોટી જવાબદારી ન નિભાવતા હોય તેવાં નેતાઓને વિધાનસભાની બેઠકના પ્રભારી બનાવી સક્રિય કરવાની કવાયત શરૂ કરવામાં આવી છે.

નોંધનીય છે કે, ગુજરાતની તમામ 182 બેઠકો જીતવાના લક્ષ્યાંક સાથે મેદાનમાં ઉતરનાર ભાજપે વિધાનસભા બેઠકોના મુરતિયાઓની પસંદગી માટેની કવાયત શરૂ કરી દીધી છે. તમને જણાવી દઇએ કે, ભાજપે અગાઉ ઉત્તર ઝોન અને સૌરાષ્ટ્ર ઝોનના પ્રભારીઓની નિમણૂંક કરી હતી અને હવે મધ્ય ઝોનના પ્રભારીઓની નિમણૂંક કરી છે.

મધ્ય ઝોનના 40 વિધાનસભાની સીટ માટે પ્રભારીઓની નિમણૂંક કરાઇ

મધ્ય ઝોનના આણંદ જિલ્લાની 7 સીટ, ખેડા જિલ્લાની 6 સીટ, મહીસાગર જિલ્લાની 3 સીટ, દાહોદની 6 સીટ, પંચમહાલ જિલ્લાની 5 સીટ, વડોદરા જિલ્લાની 5 બેઠક, વડોદરા શહેરની 5 બેઠકો અને છોટાઉદેપુર જિલ્લાની 3 બેઠકના પ્રભારીઓની નિમણૂંક કરી છે.