ગુજરાત વિધાનસભાની પેટાચૂંટણીની તારીખો જાહેર થઇ ગઇ છે. 3 નવેમ્બરે ગુજરાત વિધાનસભાની 8 બેઠકોની પેટાચૂંટણી યોજાશે. જ્યારે 10 નવેમ્બરે મતગણતરી થશે. ત્યારે હવે આ પેટાચૂંટણીમાં ત્રિ-પાંખિયો જંગ જામશે.
ગુજરાત વિધાનસભા પેટાચૂંટણીમાં જામશે ત્રિ-પાંખિયો જંગ
વિધાનસભાની પેટાચૂંટણીમાં ત્રિ-પાંખિયો જંગ જામશે. ગુજરાતમાં ભાજપ-કોંગ્રેસ અને NCP વચ્ચે ટક્કર થશે. કારણ કે NCP કોંગ્રેસ સાથે ગઠબંધનમાં ચૂંટણી નહીં લડે. NCP તમામ 8 બેઠક પર પોતાના ઉમેદવાર ઉતારશે. વર્તમાન મુદ્દાઓને ચૂંટણી પ્રચારમાં આવરી લેવાની રણનીતિ ઘડાઈ છે. NCPને પેટાચૂંટણીમાં ફાયદો થશે તેવો NCPના નેતાઓએ દાવો કર્યો છે. શું હવે આગામી ગુજરાતની ચૂંટણીઓમાં પણ કોંગ્રેસ અને NCP એકસાથે નહીં લડે? એ એક મોટો પ્રશ્ન છે. તો હવે NCPએ પોતાના દમ પર ચૂંટણી લડવાની જાહેરાત કરતા કોંગ્રેસની ચિંતામાં વધારો જોવા મળી રહ્યો છે.
પેટાચૂંટણી જાહેર થતા હવે પક્ષો દ્વારા ઉમેદવાર પસંદગી માટે મથામણ શરૂ થઇ છે. કોંગ્રેસ, ભાજપ અને NCP દ્વારા 8 બેઠકો માટે ઉમેદવાર પસંદગી પ્રક્રિયા શરૂ કરવામાં આવી છે. ત્યારે ભાજપ,કોંગ્રેસ અને NCP ત્રણેય પક્ષો આઠેય બેઠકો પર પોતપોતાની જીત થવાના દાવા કરી રહ્યા છે. તેવામાં હવે પેટાચૂંટણીને લઇ રાજકીય પક્ષોમાં બેઠકોનો ધમધમાટ શરૂ થઇ ચૂક્યો છે. ટુંક સમયમાં પક્ષો પોતાના ઉમેદવારોની યાદી જાહેર કરશે.
ગુજરાત વિધાનસભાની પેટાચૂંટણીની તારીખ જાહેર
8 બેઠકો પર ગુજરાત વિધાનસભાની પેટાચૂંટણી 3 નવેમ્બરે યોજાશે. 9 ઓક્ટોબરથી ઉમેદવારી માટે ફોર્મ ભરી શકાશે. 16 ઓક્ટોબર ફોર્મ ભરવાની છેલ્લી તારીખ છે. તો 19 ઓક્ટોબર ફોર્મ ખેંચવાની છેલ્લી તારીખ છે. જ્યારે 3 નવેમ્બરે મતદાન થશે અને 10 નવેમ્બરે પરિણામ જાહેર થશે.
કઇ બેઠકો પર યોજાશે ચૂંટણી
રાજ્યમાં 8 બેઠક અબડાસા, લીંબડી, મોરબી, ધારી, ગઢડા, કરજણ, ડાંગ અને કપરાડા બેઠક પર મતદાન યોજાશે.