પેટાચૂંટણી / ગુજરાતની 8 બેઠકો પર આજે મતદાન, 81 ઉમેદવાર પોતાની કિસ્મત અજમાવશે

• આજે રાજ્યની 8 વિધાનસભા બેઠકો પર પેટાચૂંટણી
• ગુજરાતમાં પ્રથમ વખત કોવિડના નિયમો હેઠળ મતદાન યોજાશે
• 8 બેઠકો પર કુલ 81 ઉમેદવારો મેદાનમાં

આજે રાજ્યની 8 વિધાનસભા બેઠકો પર પેટાચૂંટણી માટે મતદાન યોજાશે. ધારી, લીંબડી, મોરબી, અબડાસા, કરજણ, ગઢડા, ડાંગ અને કપરાડા વિધાનસભા બેઠક પર પેટાચૂંટણી માટે મતદાન છે. સવારે 7થી સાંજે 6 વાગ્યા સુધી મતદાન ચાલશે. 8 બેઠકો પર 18 લાખ 75 હજાર મતદાતા મતદાન કરશે. 8 બેઠક પર 3024 જેટલા મતદાન કેન્દ્ર બનાવવામાં આવ્યા છે. 8 બેઠકો પર કુલ 81 ઉમેદવારો  મેદાનમાં છે. ત્યારે 419 માઈક્રો ઓબ્ઝર્વર અધિકારી તૈનાત કરી દેવામાં આવ્યા છે. અધિકારીઓએ જણાવ્યું કે, મતદાન પ્રક્રિયાના 900 મતદાન કેન્દ્રોથી લાઇવ વેબકાસ્ટ કરવામાં આવશે.

ગુજરાતમાં પ્રથમ વખત કોવિડના નિયમો હેઠળ યોજાશે મતદાન

આપને જણાવી દઈએ કે, ગુજરાતમાં પ્રથમ વખત કોવિડના નિયમો હેઠળ મતદાન યોજાશે. મતદાન પહેલા તમામ મતદાન કેન્દ્રો સેનેટાઇઝ કરવામાં આવ્યા છે.  સ્વાસ્થ્ય વિભાગ દ્વારા ચૂંટણી સ્ટાફ માટે 41 હજાર N95 માસ્ક, 82 હજાર ડિસ્પોઝેબલ માસ્ક અને 41 હજાર ફેસશીલ્ડની વ્યવસ્થા કરવામાં આવી છે. કોરોનાને લઈને 3400 થર્મલ ગનની વ્યવસ્થા કરવામાં આવી છે. આ સાથે મતદારો માટે 21 લાખ ગ્લવ્ઝ ચૂંટણી આયોગને સોંપ્યા છે. માસ્ક ન પહેરીને આવનારા લોકો માટે પોલીસને 3 લાખ માસ્કનું વિતરણ કરાયું છે. કોરોના સંક્રમિત અથવા શંકાસ્પદ મતદારો માટે 8 હજાર PPE કિટ પણ આયોગે ઉપલબ્ધ કરાવી છે.

ભાજપ અને કોંગ્રેસના પેટાચૂંટણીના ઉમેદવારોની યાદી

આ 8 બેઠકો પર 8 નવેમ્બરે મતદાન

ગુજરાત વિધાનસભાની પેટાચૂંટણી રાજ્યની અબડાસા, લીંબડી, મોરબી, ધારી, ગઢડા, કરજણ, ડાંગ અને કપરાડા કુલ 8 બેઠક 3 નવેમ્બરે(મંગળવાર) યોજાશે અને 10 નવેમ્બરે પરિણામ જાહેર થશે.

8 MLAએ રાજીનામાં આપતા યોજાશે પેટાચૂંટણી

8 બેઠકો પર ધારાસભ્યોએ રાજીનામાં આપતા પેટાચૂંટણી યોજાવા જઇ રહી છે. જેમાં અબડાસાથી પ્રદ્યુમનસિંહ જાડેજા, મોરબીથીબ્રિજેશ મેરજા, કપરાડાથી અક્ષય પટેલ, ગઢડાથી પ્રવીણ મારૂ, ધારીથી જે.વી કાકડીયા, કપરાડાથી જિતુ ચૌધરી, ડાંગથી મંગળ ગાવિત અને લીંબડીથી સોમા પટેલનું રાજીનામું આપ્યું હતું. આ ધારાસભ્યોના રાજીનામાના કારણે 20 સપ્ટેમ્બરે ચૂંટણી પંચે આ બેઠકો પર પેટાચૂંટણીની જાહેરાત કરી હતી.