ગુજરાત ખાનગી યુનિવર્સિટી સુધારા બિલ રજૂ કરતા શિક્ષણ મંત્રી જીતુ વાઘાણીએ કહ્યું કે, રાજ્યના યુવાનોને વિશ્વકક્ષાનું ગુણવત્તાયુકત શિક્ષણ સરકારી યુનિવર્સિટીઓની સાથે વધુ 11 ખાનગી યુનિવર્સિટીઓ દ્વારા ઘર આંગણે મળતું થશે.
ગુજરાત ખાનગી યુનિવર્સિટી સુધારા વિધેયક ૨૦૨૨ વિધાનસભા ગૃહમાં સર્વાનુમતે પસાર
ગાંધીનગર, જુનાગઢ, અમદાવાદ, પાટણ, સુરત, ખેડા અને ભાવનગર જિલ્લામાં ૧૧ ખાનગી યુનિવર્સિટીઓ કાર્યરત થશે
રાજ્યના યુવાનોને ઉચ્ચ શિક્ષણ મેળવવા મોંઘીદાટ ફી ભરીને ગુજરાત બહાર ક્યાંય જવું નહિ
ગુજરાતમાં દિવસેને દિવસે શિક્ષણની સુવિધામાં સતત વધારો થઈ રહ્યો છે. સાથે વિદ્યાર્થીઓની સંખ્યા પણ વધી રહી છે. જ્યારે યુનિવર્સિટીમાં બેઠકની સંખ્યા ઘટી રહી છે. અનેક વિદ્યાર્થીઓને પોતાના મનપસંદ કોર્સમાં એડમિશન મળતું નથી. ત્યારે ગુજરાત વિધાનસભાના 14માં વિધાનસભા સત્રના અંતિમ દિવસે રાજ્ય સરકાર દ્વારા ગુજરાતમાં ખાનગી યુનિવર્સિટી સુધારા વિધેયક 2022 પસાર કરવામાં આવ્યું છે.
ગુજરાત વિધાનસભા ગૃહમાં ગુજરાત ખાનગી યુનિવર્સિટી સુધારા વિધેયક ૨૦૨૨ પર શિક્ષણ મંત્રી જીતુ વાઘાણીએ સ્પષ્ટપણે જણાવ્યું કે, ગુજરાતના વિદ્યાર્થીઓને નવી શિક્ષણ નીતિ અનુરૂપ વિશ્વકક્ષાનું ગુણવત્તાયુકત અને સમયની માંગ આધારિત ઉચ્ચ શિક્ષણ પુરૂં પાડવા મુખ્યમંત્રી ભૂપેન્દ્રભાઈ પટેલની આ રાજ્ય સરકાર પ્રતિબદ્ધ છે.
બજેટ સત્રના છેલ્લા દિવસે ખાનગી યુનિ બિલ સર્વાનુમતે પસાર કરાયુંઃ વાઘાણી
આગામી સમયમાં ગુજરાતના વિદ્યાર્થીઓ દેશ દુનિયામાં સ્પર્ધા કરે એ માટે બિલ જરૂરી છે. રાજ્યમાં શિક્ષણ માટેનું વાતાવરણ બન્યું છે. 13 લાખ વિદ્યાર્થીઓ સરકારી ગ્રાન્ટેડ યુનિ.માં અભ્યાસ કરે છે. ખાનગી યુનિવર્સિટી સ્વતંત્ર નહીં પરંતુ સરકાર દ્વારા નિયંત્રિત છે. બજેટ સત્રના છેલ્લા દિવસે ખાનગી યુનિ બિલ સર્વાનુમતે પસાર કરાયું છે. રાજ્ય સરકારના નિયમો મુજબ જ ખાનગી યુનિ કામ કરશે.
ખાનગી યુનિવર્સિટીથી શિક્ષણનું સ્તર વધારે ઊંચું આવશેઃ વાઘાણી
શિક્ષણમંત્રીએ કહ્યું કે, લોકભારતી સણોસરા ખાનગી યુનિવર્સિટી બને તો વધારે સારું કામ કરી શકે. 11 યુનિવર્સિટીઓને ખાનગીનો દરજ્જો શરતોને આધિન અપાયો છે. શિક્ષણમંત્રીઓ સાથેની કમિટી નીતિ વિષયક નિર્ણયો માટે બનાવી છે. દર મહિને સમિતિની બેઠક મળશે. ખાનગી યુનિવર્સિટીનું ઓડિટ સમિતિ હેઠળ થશે. ખાનગી યુનિવર્સિટીથી શિક્ષણનું સ્તર વધારે ઊંચું આવશે. યુનિવર્સીટીના રેન્કિંગમાં વધારો થાય એ દિશામાં કામ કરાશે. 10 વર્ષના રોડ મેપ સાથે સરકાર કામ કરી રહી છે.
શિક્ષણ મંત્રીએ સ્પષ્ટપણે જણાવ્યું કે પ્રધાનમંત્રી શ્રી નરેન્દ્રભાઈ મોદીએ દેશની એજ્યુકેશન સિસ્ટમમાં સમયાનુકૂલ બદલાવ લાવવા ગહન વિચાર મંથન બાદ નવી શિક્ષણ નીતિ જાહેર કરીને તેનો અમલ શરૂ કરાવ્યો છે.
૧૧ નવી ખાનગી યુનિવર્સિટીઓ રાજ્યમાં શરૂ થશેઃ વાઘાણી
શિક્ષણ મંત્રીએ ઉમેર્યુ કે, વિકાસના રોલ મોડેલ બની ગયેલા ગુજરાતના વિદ્યાર્થીઓ સમયથી બે કદમ આગળ ચાલી વિશ્વની સ્પર્ધામાં ઊભા રહી શકે તેવી નેમ સાથે આ સુધારા વિધેયક દ્વારા વધુ ૧૧ ખાનગી યુનિવર્સિટીઓ રાજ્યમાં કાર્યરત કરવાની સુગમતા થઇ છે. વિધાનસભા ગૃહમાં આજે પસાર થયેલા ગુજરાત ખાનગી યુનિવર્સિટી સુધારા વિધેયક ર૦રરને પરિણામે હવે રાજ્યમાં નવી ૧૧ ખાનગી યુનિવર્સિટીઓ ઉમેરાશે.
શિક્ષણ મંત્રીએ વધુમાં જણાવ્યું કે, ગુજરાતમાં વર્ષ ૨૦૦૨માં ૧૧ યુનિવર્સિટીઝ હતી જે વધીને બાવન(૫૨) ખાનગી યુનિવર્સિટીઓ સાથે અત્યારે ૯૧ યુનિવર્સિટીઓ થઇ ગઇ છે. જેમા હજુ પણ ૧૧ નવી યુનિવર્સિટીનો વધારો થશે. ગુજરાત ખાનગી યુનિવર્સિટી સુધારા વિધેયક ૨૦૨૨ના પરિણામે હવે, ગાંધીનગર યુનિવર્સિટી-ગાંધીનગર ઉપરાંત SKIPS યુનિવર્સિટી-ગાંધીનગર, સ્વામીનારાયણ યુનિવર્સિટી-ગાંધીનગર, ડૉ. સુભાષ યુનિવર્સિટી-જુનાગઢ, નોબલ યુનિવર્સિટી-જુનાગઢ, ટ્રાન્સસ્ટેડીયા યુનિવર્સિટી-અમદાવાદ, અદાણી યુનિવર્સિટી-અમદાવાદ, એમ. કે. યુનિવર્સિટી- પાટણ, વિદ્યાદીપ યુનિવર્સિટી-સુરત, મગનભાઇ અદેનવાલા મહાગુજરાત યુનિવર્સિટી-ખેડા અને લોકભારતી યુનિવર્સિટી ફોર રૂરલ ઇનોવેશન-ભાવનગર એમ વધુ ૧૧ નવી ખાનગી યુનિવર્સિટીઓ રાજ્યમાં શરૂ થશે.
રાજ્યની ઘણી બધી પ્રાઇવેટ યુનિવર્સીટી રેન્કિંગ અને રેટિંગમાં અગ્ર સ્થાન ધરાવે છેઃ વાઘાણી
શિક્ષણ મંત્રીએ જણાવ્યુ કે, રાજ્યની ઘણી બધી પ્રાઇવેટ યુનિવર્સીટી રેન્કિંગ અને રેટિંગમાં અગ્ર સ્થાન ધરાવે છે. ગુજરાત સ્ટેટ ઇન્સ્ટીટયુશનલ રેટિંગ ફ્રેમવર્ક વર્ષ ૨૦૧૯-૨૦ દરમિયાન આર્કીટેક્ચર કેટેગરીમાં સેપ્ટ યુનિવર્સીટી અને ફાર્મસી કેટેગરીમાં ઇન્સ્ટીટયુટ ઓફ ફાર્મસી, નિરમા યુનિવર્સીટીએ ૦૫ સ્ટારમાંથી ૦૫ સ્ટાર મેળવેલ છે. વર્ષ ૨૦૨૦-૨૧ દરમિયાન GSIRFમાં યુનિવર્સિટી કેટેગરીમાં પંડિત દીનદયાળ એનર્જી યુનિવર્સીટીએ 73મો ક્રમાંક મેળવ્યો છે.
શિક્ષણ મંત્રીએ સ્પષ્ટપણે કહ્યું કે, સરકારી અને ખાનગી યુનિવર્સિટીઓના રાજ્યમાં વધી રહેલા આ વ્યાપને પરિણામે ગુજરાતના યુવાઓને ઘર આંગણે અદ્યતન ઉચ્ચ શિક્ષણ મળતું થશે. જેના પરિણામે ભારતને વિશ્વગુરૂ અને જ્ઞાન યુગની અધિષ્ઠાતા બનાવવાના પ્રધાનમંત્રીશ્રીના સંકલ્પમાં ગુજરાત ગ્લોબલ એજ્યુકેશન હબ તરીકે કદમથી કદમ મિલાવવા પણ સજ્જ બનશે.
ગુજરાત ખાનગી યુનિવર્સિટી સુધારા વિધેયક ૨૦૨૨ વિધાનસભા ગૃહમાં સર્વાનુમતે પસાર થયું હતું.