હનીટ્રેપ / દેશવિરોધી પ્રવૃત્તિમાં સંડોવણીની આશંકા, યૂપી અને ગુજરાત ATS દ્વારા એક શખ્સની અટકાયત

પાકિસ્તાન સાથેનાં નાપાક કનેક્શનની કડીઓ સંદર્ભે આજે સાંજે ઉત્તરપ્રદેશ અને ગુજરાત ATS (Anti-Terrorism Squad) એ અબડાસાના બાલાપર બુડધ્રોમાંથી એક શખ્સને ઉઠાવી લીધો હોવાનું બહાર આવ્યું છે. પાકિસ્તાન (Pakistan) સાથે કનેક્શનને લઈને ATS દ્વારા એક યુવકની ધરપકડ કરવામાં આવી છે. યૂપી અને ગુજરાત ATS દ્વારા સંયુક્ત ઓપરેશન કરીને શખ્સની ધરપકડ (Arrested) કરાઈ છે. ઉત્તરપ્રદેશમાં બહાર આવેલાં એક દેશવિરોધી ષડયંત્રમાં બાલાપરના યુવકને સંડોવતી કડીઓ સ્પષ્ટ થતાં તેને આજે ઉઠાવી લેવાયો હોવાનો આધારભૂત સૂત્રો દાવો કરી રહ્યાં છે. 

કચ્છનાં અબડાસાનાં બાલાપર બુડધ્રોમાંથી ATSએ એક શખ્સની ધરપકડ કરી છે. આ શખ્સની ધરપકડ કરીને ATSએ નખત્રાણામાં રહેતા તેના મિત્રની પણ પૂછપરછ કરી છે. નખત્રાણામાં રહેતા તેનાં મિત્રને પણ ઉઠાવાયો હોવાનું સૂત્રોએ જણાવ્યું છે. મળતી માહિતી મુજબ યૂપીમાં બહાર આવેલા દેશવિરોધી ષડયંત્રમાં યુવકની સંડોવણી બહાર આવી હતી.

જો કે, નખત્રાણાનો યુવક તેનો મિત્ર હોવાનું અને સીધી રીતે તેની કશી સંડોવણી ના હોવાનું બહાર આવવા પામ્યું હોવાનું ચર્ચાય છે. આ સમગ્ર બાબત અંગે કચ્છ ખબરે ગુજરાત ATSનાં વડા હિમાંશુ શુક્લાનો સંપર્ક કરતાં તેમણે જણાવ્યું હતું કે, ‘અન્ય રાજ્યનાં એક કેસમાં યુવકની સંડોવણીની કડીઓ મળતાં તે રાજ્યની એજન્સીએ તેને ઉઠાવી પૂછતાછ શરૂ કરી છે.’

આ મામલો દેશની આંતરિક સુરક્ષાને લગતો હોઈ તેમણે હાલ પૂરતી વધુ કોઈ વિગત આપવાની શુક્લાએ અસમર્થતા દર્શાવી હતી. સૂત્રો જણાવે છે કે, બાલાપર બુડધ્રોનાં જે યુવકને ઉઠાવાયો છે તેની અગાઉ પણ પૂછતાછ કરાઈ હતી પરંતુ ત્યારે કશું સાબિત થઈ શક્યું ન હોતું. કોઈ મહત્વની કડી મળતાં જ યુપી પોલીસે તેને ફરી ઉપાડી પૂછપરછ શરૂ કરી હોવાનું મનાય છે.

આ મામલે ATS દ્વારા શંકાનાં આધારે યુવકની પૂછપરછ કરવામાં આવી હતી. પૂછપરછ દરમિયાન આ શખ્સ ISI સાથે સંકળાયેલો હોવાની ATSને શંકા થઈ હતી. શંકાનાં આધારે ATSએ શખ્સની પૂછપરછ કરી છે. આ શખ્સ ISI સાથે મળીને જવાનોને હનીટ્રેપ (Honeytrap) માં ફસાવતો હોવાની આશંકા સેવાઈ રહી છે. હાલમાં ATS દ્વારા શખ્સની ધરપકડ કરીને આગળની વધુ કાર્યવાહી હાથ ધરવામાં આવી છે.