રાજ્યમાં હવામાન વિભાગની આગાહીને લઇને આજે સચરાચર મેઘમહેર થઇ રહી છે. વરસાદના નવા રાઉન્ડમાં આજે ક્યાંક ધોધમાર તો કયાંય છુટોછવાયો વરસાદ થયો છે. રાજ્યના 139 તાલુકામાં વરસાદ થયો હતો.અમદાવાદ, ગાંધીનગર, કચ્છ, અરવલ્લી, તાપી, ડાંગ, જામનગર, રાજકોટ, પોરબંદર સહિતના વિસ્તારોમાં મેઘાએ વ્હાલ વરસાવ્યું હતું. જેમાં સોનગઢમાં 2.5 ઈંચ વરસાદ વરસાદ થયો છે, જ્યારે ઉમરપાડા અને સાગબારામાં સવા 2 ઈંચ વરસાદ થયો છે. સાથે વ્યારા, બાવળા અને લખપતમાં પોણા 2 ઈંચ વરસાદ થયો છે. ઉપરાંત ખેડા, સુબિર, ખેરગામ, વાંસદા અને ઉચ્છલમાં 1.5 ઈંચ વરસાદ તથા વાપી, ધાનેરા, કામરેજ અને પાદરામાં સવા ઈંચ વરસાદ થયો છે. સાથે માંડવી અને હાંસોટમાં 1-1 ઈંચ વરસાદ પાડ્યો હતો. વરસાદી વાતાવરણને લઇને ઉકાઈ ડેમમાંથી તાપી નદીમાં પાણી છોડાતા હરિપુરા લો-લેવલ કોઝ-વે પરના 12 જેટલા ગામ સંપર્કવિહોણાં બન્યા હતા.
12 જેટલા ગામ સંપર્ક વિહોણાં બન્યા
ઉકાઈ ડેમમાંથી તાપી નદીમાં પાણી છોડાયું હતું. ડેમમાંથી 1.75 લાખ ક્યુસેક પાણી છોડાતા હરિપુરા લો-લેવલ કોઝ-વે પાણીમાં ગરકાવ થયો હતો. આથી કોઝ-વેની સામે પાર આવેલા 12 જેટલા ગામ સંપર્ક વિહોણાં બન્યા હતા.જેને પગલે સ્થાનિક લોકોને ઈમરજન્સી સેવા માટે 30 કિલોમીટર જેટલો રસ્તો ફરવો પડે તેવી નોબત આવી હતી. આ ઉપરાંત મહેસાણાના ધરોઈ ડેમમાં 27 હજાર 500 ક્યૂસેક પાણીની આવક થઇ હતી. નવા નીરની આવકને લઇને ડેમની સપાટી 605.90 ફૂટે પહોંચી હતી. ધરોઈ ડેમની ભયજનક જળ સપાટી 622 ફૂટ છે. ઉપરાંત વડોદરામાં વહેલી સવારથી ધીમીધારે વરસાદ થતાં સયાજીગંજ, ગોત્રી, ફતેગંજ વિસ્તારમાં વરસાદ પાડ્યો હતો. તો નર્મદા જિલ્લામાં પણ પાંચ તાલુકામાં સરેરાશ 1.5 ઈંચ વરસાદ થયો હતો.
રાજકોટ શહેરમાં ધોધમાર વરસાદ
સૌરાષ્ટ્રના મોટા ભાગના વિસ્તારોમાં વરસાદ પાડ્યો હતો. જેમાં રાજકોટ શહેર તથા લોધિકા તાલુકા અને મેટોડા GIDC વિસ્તારમાં વરસાદ પાડ્યો હતો. જેને પગલે શહેરના અનેક વિસ્તારમાં વરસાદી પાણી ભરાયા હતા. રાજકોટના યાજ્ઞિક રોડ, કાલાવાડ રોડ, મવડી રોડ, 150 ફૂટ રિંગરોડ, જુબેલી બાગ, પેડક રોડ, માધાપર ચોકડી, ગોંડલ ચોકડી, મવડી ચોકડી, ત્રિકોણ બાગ, જામનગર રોડ, નાના માવા સર્કલ, આનંદ બંગલા ચોક, ઢેબર રોડ વિસ્તાર, ગોંડલ રોડ, મોરબી રોડ, વેલનાથ પરા સહિતના વિસ્તારોમાં વરસાદ પાડ્યો હતો. વરસાદને કારણે મુખ્યમાર્ગો પર પાણી ભરાયા હતા. આથી લોકોને પરેશાની ભોગવવાનો વારો આવ્યો હતો.દાહોદમાં પણ આજે વરસાદને લઇને ઝાલોદનો કાળી ડેમ-2 ઓવરફ્લો થયો હતો. જેને પગલે ડેમના નજીકના સાબળી, રળીયાતી, ભુરા ,ગુલતેરા સહિતાના ગામોને 11 ગામોને એલર્ટ કરાયા હતા. કાળી-2 ડેમ હાલની સ્થિતિ 98.39 ટકા થઇ છે. હાલ ડેમની સ્થિતિ 256.90 મીટર પર છે.
દ્વારકાના દરિયામાં ઊંચા મોજા ઉછળ્યાં
વધુમાં દ્વારકા, જામનગર સહિત હાલાર પંથકમાં પણ મેઘમહેર થઇ હતી. બપોર બાદ વીજળીના કડાકા ભડાકા સાથે વરસાદનું આગમન થયું હતું. વધુમાં જિલ્લાના ધ્રોલ અને કાલાવડ તાલુકામાં વરસાદી ઝાપટા પડ્યા હતા. વધુમાં દ્વારકાં જિલ્લામાં પપણ વરસાદી માહોલને લઇને દ્વારકાના દરિયા કિનારે ભારે કરંટ જોવા મળ્યા હતા. ગોમતીઘાટ અને આસપાસના વિસ્તારમાં 10 ફૂટ ઊંચા મોજા ઉછળ્યા હતા.તો બીજી તરફ વલસાડના દરિયાકિનારે ઊંચા મોજા ઉછળ્યા હતા. દરિયામાં ભારે કરંટને પગલે પોલીસ બંદોબસ્ત ગોઠવી દવામાં આવ્યો હતો અને પ્રવાસીઓને તિથલ બીચ ઉપર જવાની મનાઈ ફરમાવી દેવામાં આવી હતી. પોરબંદર શહેર ઉપરાંત બરડામાં પણ ધોધમાર વરસાદ ખાબક્યો હતો. બરડાના ભેટકડી, અડવાણા સહિતના વિસ્તારમાં ગાજવીજ સાથે વરસાદ આવ્યો હતો. ઉપરાંત ગીરના જંગલમાં ઉપરવાસમાં વરસાદ પાડ્યો હતો. આથી કોડીનારના ફાચરિયા ગામે ફરી પાણી ભરાયા હતા. ભારે વરસાદને લઈને ફાચરીયાથી અરણેજ જતો રસ્તો પાણીમાં ગરકાવ થતાં લોકોને આવનજાવનમાં મુશ્કેલીનો સામનો કરવાનો વારો આવ્યો હતો.
વલસાડમાં તોતિંગ વૃક્ષ ત્રાટકતા દુકાન, ટ્રાન્સફોર્મર, અને ટેમ્પોને નુકસાન
સૌરાષ્ટ્ર સહિત વલસાડ જિલ્લામાં પણ વરસાદનું આગામન થયું હતું. વરસાદને પગલે વલસાડમાં દુર્ઘટના પણ ઘટી હતી. જેમાં ભારે પવનના કારણે વૃક્ષ ધરાશાયી થયું હતું. 100 વર્ષ જૂનું વડનું ઝાડ ધરાશાયી થતા નાશભાગ મચી જવા પામી હતી. તોતિંગ વૃક્ષ ત્રાટકતા દુકાન, ટ્રાન્સફોર્મર, અને ટેમ્પોને નુકસાન થયું હતું. એજ રીતે ગીર સોમનાથના પ્રાચી તીર્થમાં પણ વરસાદી માહોલ જોવા મળ્યો હતો. જેમાં ભારે પવન સાથે વરસાદ થતા વૃક્ષ જમીનદોસ્ત થયું હતું. પ્રાચીથી કુંભારીયા ગામ તરફ જતા રસ્તા પર વૃક્ષ ધરાશાયી થતાં વાહન વ્યવહારને અસર થવા પામી હતી.વધુમાં દરિયામાં તોફાની મોજાઓને કારણે વલસાડના ઉમરગામના માછીમારોની બોટ મહારાષ્ટ્રના ગાવદેવી નજીક દરિયામાં ફસાઈ હતી. જેને લઇને બોટમાં સવાર 10 માછીમારોનું કોસ્ટગાર્ડ દ્વારા રેસ્ક્યૂ કરવામાં આવ્યું હતું.
છેલ્લાં 13 વર્ષે આ વર્ષે પાણીની આવક સૌથી વધુ નોંધાઈ
ત્યારે ખેડૂતો અને પાણી માટે વલખાં મારતા અંતરિયાળ ગામો માટે ખુશીના સમાચાર એ છે કે ચોમાસના અંતને હજુ તો દોઢ મહિનાની વાર છે ત્યારે આજ દિન સુધીમાં રાજ્યમાં 80% વરસાદ પડી ગયો છે. સારા વરસાદને પગલે છેલ્લાં 13 વર્ષે આ વર્ષે પાણીની આવક સૌથી વધુ નોંધાઈ છે.
કચ્છ, મહીસાગર, પંચમહાલ, દાહોદ સહિતના જિલ્લામાં વરસાદની આગાહી
આજે રાજ્યમાં દ.ગુજરાત અને ઉ.ગુજરાત તેમજ સૌરાષ્ટ્રમાં પણ ભારે વરસાદની આગાહી હવામાન વિભાગે આગાહી કરી છે. જ્યારે 12 ઓગસ્ટના રોજ રાજ્યમાં બનાસકાંઠા, વલસાડ અને દમણમાં મેઘો બઘડાટી બોલાવી શકે તેવા સંકેત હવામાન ખાતાએ આપ્યા છે. 12 ઓગસ્ટ બાદ ગુજરાતમાં વરસાદનું જોર ઘટશે તેવા પણ વરતારા છે. કચ્છ, મહીસાગર, પંચમહાલ, દાહોદ, સુરત, તાપી, ડાંગમાં નવસારી, ખેડા, વડોદરા,જામનગર, રાજકોટ, પોરબંદર, દેવભૂમિ દ્વારકા, અમદાવાદ, ગાંધીનગર, અરવલ્લીમાં વરસાદની આગાહી કરવામાં આવી હતી.