ગાંધીનગર / ભાજપનો મોટો નિર્ણય: ધારાસભ્યોએ દિવસ દરમિયાનની કામગીરીનો રિપોર્ટ C.R પાટીલને સોંપવો પડશે

• ભાજપ ધારાસભ્ય દળની બેઠકમાં લેવાયો નિર્ણય
• ધારાસભ્યોએ કામગીરીનો રિપોર્ટ પાર્ટીને કરવો પડશે
• વિધાયકદળની બેઠકમાં કામગીરી મુદ્દે લેવાયો નિર્ણય

ગાંધીનગર વિધાસભામાં ભાજપના ધારસભ્યોની બેઠકમાં પાર્ટીની કામગીરી અંગે મહત્વના નિર્ણય કરાયા છે. તમામ ભાજપના ધારાસભ્યોએ પોતાની કામગીરીનો રિપોર્ટ પાર્ટીમાં રજૂ કરવો પડશે. દિવસ દરમિયાનની કામગીરીનો રિપોર્ટ આપવો પડશે. ધારાસભ્યોએ કોરોના કામગીરી કે વિકાસની કામગીરીનો રિપોર્ટ આપવો પડશે. અને આ રિપોર્ટ ફોટો અને વિડીયો સાથે કમલમ જમા કરાવવો પડશે. મહત્વનું છે કે, 2022ની ચૂંટણીને લઈ ભાજપની કામગીરી શરૂ થઈ ચૂકી છે.

તો ભાજપ ધારાસભ્યોની બેઠકને લઇ બીજા વધુ એક સમાચાર સામે આવ્યા છે. જેમાં પ્રદેશ પ્રમુખ સી.આર.પાટીલ ધારાસભ્યો સાથે  બેઠક કરશે. તમામ ધારાસભ્યો સાથે વન ટુ વન બેઠક કરશે. આ નિર્ણય પણ ભાજપના ધારાસભ્યની બેઠકમાં લેવાયો છે. વિધાનસભા વિસ્તારના પ્રશ્નો અંગે ચર્ચા કરશે.ગ્રાઉન્ડ સ્તરે પક્ષને મજબૂત બનાવવા સૂચનો અપાશે.

બેઠક વચ્ચે વધુ એક નિર્ણય સામે આવ્યો છે. જેમાં ભાજપ તમામ ધારાસભ્યને ટેબ્લેટ ફ્રીમાં આપશે. ભાજપ રૂ.66 લાખના ખર્ચે ટેબ્લેટની ખરીદી કરશે. સરકારની કામગીરીના પ્રચાર પ્રસાર માટે ટેબ્લેટ અપાશે. સિનિયર નેતાઓને પણ ભાજપ તરફથી મળશે ટેબલેટ. કોરોનાની કામગીરી, વાવાઝોડાની કામગીરી અંગે પણ પ્રચાર કરશે. ધારાસભ્યો સોશિયલ મીડિયામાં પ્રચાર પ્રસાર કરશે. ધારાસભ્ય દળની બેઠકમાં ભાજપ પ્રદેશ પ્રમુખ સી.આર પાટીલે જાહેરાત કરી છે. 

ગુજરાતમાં નેતૃત્વ પરિવર્તનની અટકળોનો અંત

ગુજરાતના રાજકારણને લઈને મહત્વના સમાચાર સામે આવ્યા છે. સૂત્રોની માહિતી પ્રમાણે ગુજરાતમાં કોઈપણ પ્રકારે નેતૃત્વનું પરિવર્તન થશે નહીં. જેના કારણે નેતૃત્વ અંગેની રાજકીય અટકળોનો અંત આવ્યો છે. ગુજરાત ભાજપના પ્રભારી ભુપેન્દ્ર યાદવની મુલાકાત બાદ અટકળો ચાલતી હતી. અને ભૂપેન્દ્ર યાદવ દ્વારા એક પછી એક બેઠકના કારણે ગુજરાતમાં નેતૃત્વનું પરિવર્તન થશે તેવી વાતોને વેગ મળ્યો હતો. આજે વિધાનસભા ખાતે ભાજપના ધારાસભ્યોની બેઠકમાં મહત્વના સૂચનો કરાયા છે. આ બેઠકમાં સરકાર અને સંગઠન તાલમેલ સાથે વધુ મજબૂત બનાવવા સૂચનો થયા છે. 

મહત્વનું છે કે, આજે ગાંધીનગર ખાતે વિધાનસભા હોલમાં ભાજપના ધારાસભ્યોની બેઠક યોજાઈ હતી. જેમાં CM વિજય રૂપાણી અને DyCM નીતિન પટેલ પણ વિધાનસભા હોલ પહોંચ્યા હતા. બેઠકમાં પ્રદેશ પ્રભારી ભૂપેન્દ્ર યાદવ, ભાજપ પ્રદેશ પ્રમુખ સી.આર.પાટીલની પણ હાજરી હતી. ભાજપ સંગઠનના આગેવાનો પણ બેઠકમાં હાજર રહ્યા હતા.  

રાજકીય ગરમાવા વચ્ચે ભાજપ ધારાસભ્યોની બેઠક સૂચક મનાઈ રહી હતી. વર્ષ 2022 વિધાનસભાની ચૂંટણીને લઈ બેઠકમાં મહત્વપૂર્ણ ચર્ચાઓ થશે. ભાજપના તમામ ધારાસભ્યોને બેઠકમાં હાજર રહેવા આદેશ પણ અપાયા હતા. 

કમલમ્ ખાતે યોજાઈ હતી બેઠક

ગુજરાત વિધાનસભામાં બેઠક અગાઉ કમલમમાં ભાજપના આગેવાનોની બેઠક યોજાઈ હતી. ભાજપના કિશાન મોરચાની બેઠક યોજાઈ હતી. જેમાં પ્રભારી ભુપેન્દ્ર યાદવના અધ્યક્ષ સ્થાને બેઠક થઈ હતી. અને બાબુ જેબલિયા, સંગઠનમંત્રી ભીખુભાઈ દલસાણિયા હાજર રહ્યા હતા. આ સાથે બક્ષીપંચ મોરચાનાં પદાધિકારીઓ સાથે પણ ભૂપેન્દ્ર યાદવની બેઠક યોજાઈ હતી. સાથે પ્રભારીએ કમલમ ખાતે સંગઠન મહામંત્રીની પણ મુલાકાત કરી હતી.