બેદરકારી / અમદાવાદમાં ખાડો બન્યુ મોતનું કારણ, GMDC ઓવર બ્રિજ પાસે ખાડાએ એક યુવતીનો ભોગ લીધો

અમદાવાદ સહિત રાજ્યમાં ટ્રાફિકના કાયદા કડક બનાવાઈ રહ્યા છે ત્યારે ખાડાનગરી અમદાવાદનો એક દિલધડક કિસ્સો સામે આવ્યો છે. શુક્રવારે મોડી રાતે ગરબા પતાવીને પોતાને ઘેર પરત ફરી રહેલી યુવતીઓમાંથી એક યુવતીનો રોડ ઉપરના ખાડાએ ભોગ લીધો છે. ત્યારે રોડ રસ્તા મામલે તંત્ર સામે પ્રશ્નો ઉઠાવાઈ રહ્યા છે. હેલમેટ અને PUC માટે દંડતુ તંત્ર જીવલેણ ખાડા માટે કોને દંડશે? એવા પ્રશ્નો પણ ઉઠી રહ્યા છે. 

શુ હતો બનાવ
શુક્રવારે રાતે ગરબા પતાવીને 18 વર્ષની વૈભવી પરમાર અને પ્રિંયકા સેનમા ઘરે પરત ફરી રહ્યા હતા. આ યુવતીઓ સ્કુટર ઉપર મોડી રાતે પરત આવી રહી હતી ત્યારે GMDC ગ્રાઊન્ડ ઓવરબ્રિજ પાસે એક ખાડો પડ્યો છે જેમાં અજાણતા જ બંને છોકરીઓ સ્કુટર લઈને ખાબકી પડી હતી ત્યારે વૈભવીને ગંભીર ઈજાઓ પહોંચી હતી. પ્રિંયકાને પણ સામાન્ય ઈજાઓ થઈ હતી. સ્કુટર પ્રિયંકા ચલાવતી હતી. બંનેને સારવાર માટે તુરંત જ હોસ્પિટલ ખસેડવામાં આવી હતી જેમાં વૈભવીનું ગંભીર ઈજાઓને કારણે મોત થયુ છે. જ્યારે પ્રિયંકા હજુ સારવાર લઈ રહી છે. 
  
શું કહે છે પોલીસ
આ અંગે પોલીસે તુરંત જ તપાસનો દોર પોતાના હાથમાં લઈ લીધો છે અને ડિવિઝન ટ્રાફિક પોલીસ સ્ટેશનમાં આઈપીસીની કલમ 305 A અંતર્ગત કેસ રજિસ્ટર કરવામાં આવ્યો છે. 
પોલીસ તંત્રનું કહેવુ છે કે આ ખાડા અંગે તપાસ થશે અને મનપાને આ અંગે જાણ કરવામાં આવશે. જો તપાસમાં ખાડાના કારણે યુવતીનું મોત થયુ હશે તો મનપાને પણ બક્ષવામાં નહીં આવે