ઘરે રસોઈ બનાવવા માટે ગેસના સિલિન્ડરનો ઉપયોગ કરો છો તો ગેસ સિલિન્ડરની ડિલિવરી બાદ તેનું વજન કરાવવાનું ભૂલતા નહિ. ગઈ કાલે શહેરના ચાણક્યપુરી વિસ્તારમાં આવેલ હરસિદ્ધિ ગેસ એજન્સીના માલિક અને તેમના ડિલિવરી બોય દ્વારા ગેસના સિલિન્ડરમાંથી મોટા પાયે ગેસની ચોરી કરવાનું કૌભાંડ બહાર આવ્યું છે.
પોલીસસૂત્રોના જણાવ્યા અનુસાર ચાણક્યપુરી ખાતે આવેલ ચેહરનગરની ચાલી, સેક્ટર-૩ પાસે ભરેલા ગેસના સિલિન્ડરમાંથી ગેસની ચોરી થતી હોવાની બાતમી મળતાં સોલા પોલીસ સ્ટેશનના સ્ટાફ દ્વારા દરોડો પાડીને તપાસ કરતાં ભરેલા સિલિન્ડરમાંથી ખાલી સિલિન્ડરમાં પાઇપ દ્વારા ગેસ ભરી રહેલા ચાર શખ્સને ઝડપી પાડવામાં આવ્યા હતા.
ગેસ એજન્સીનો માલિક જ આચરતો કૌભાંડ
પોલીસે ચાર શખ્સની પૂછપરછ કરતાં તેમણે તેમનાં નામ કાળુભાઇ મકવાણા, દિનેશભાઇ પરમાર, ખેંગારભાઈ આશાપુરા અને ભાવેશ આશાપુરા હોવાનું જણાવ્યું હતું. પોલીસે વધુ ગેસ સિલિન્ડર વિષે પૂછતાં આરોપીઓએ ચાંદલોડિયા ખાતે આવેલ હરસિદ્ધિ ગેસ સર્વિસ એજન્સીનાં ગેસ સિલિન્ડર હોવાનું જણાવ્યું હતું. ગેસ એજન્સીના માલિકની સૂચનાથી તે ગેસ સિલિન્ડરમાંથી ચોરી કરતો હોવાનું ડિલિવરી બોયે કબૂલ્યું હતું.
LPG ગેસના બાટલા ભરાયા
દરોડામાં ઘરેલુ વપરાશ માટેના એલપીજી ગેસના ઇન્ડિયન કંપનીનાં ખાલી તેમજ ભરેલાં કુલ 64 ગેસ સિલિન્ડર મળી આવ્યાં હતાં, જેમાંથી 9 ગેસ સિલિન્ડર ખાલી તેમજ ૫૫ ગેસ સિલિન્ડર ભરેલાં હતાં. આરોપીઓ ભરેલાં (સીલ પેક) સિલિન્ડરમાંથી નોઝલ મારફતે ખાલી સિલિન્ડરમાં ગેસ ભરતા હતા. પોલીસ દ્વારા સ્થળ પરથી 2 લોડિંગ રિક્ષા તથા પેડલ રિક્ષા, 2 નોઝલ, ખાલી તેમજ ભરેલાં ગેસ સિલિન્ડર સિહત 2.16 લાખનો મુદ્દામાલ કબજે કરવામાં આવ્યો હતો.
પાંચ વ્યક્તિઓ સામે ઈપીકોની કલમ મુજબ ગુનો
પોલીસે હરસિદ્ધિ ગેસ એજન્સીના માલિક તેમજ કૌભાંડમાં સામેલ અને વિતરણ કાર્ય કરતા કર્મચારીઓ સહિત પાંચ વ્યક્તિઓ સામે ઇપીકોની કલમ-285, 379, 406, 420, 114, 120 (બી) તથા આવશ્યક ચીજવસ્તુ અધિિનયમ કલમ-3 તથા 7 મુજબ કાયદેસરની કાર્યવાહી કરી સોલા પોલીસ સ્ટેશનમાં ગુનો દાખલ કર્યો છે અને વધુ તપાસ હાથ ધરી છે.
પોલીસે 100 સિલિન્ડર, બે લોડિંગ રિક્ષા ઝડપી પાડી
ઉલ્લેખનીય છે કે બે મહિના પહેલાં ચાંદલોડિયાના જનતાનગર ક્રોસિંગ પાસેના સીમંધર પ્લાઝાના મકાનમાં આવેલ સંતોષ ગેસ એજન્સીના ગોડાઉનમાંથી ગેસ સિલિન્ડરમાંથી ચોરી કરવાનું કૌભાંડ પકડાયું હતું, જેમાં પોલીસે દરોડો પાડીને ઘરેલુ અને કોમર્શિયલ વપરાશનાં ખાલી અને ભરેલાં 100 સિલિન્ડર તેમજ બે લોડિંગ રિક્ષા જ્પ્ત કરી હતી.
ગેસ ચોરી કરી બ્લેકમાં વેચે છે
ગેસ એજન્સીઓ તેમના ડિલિવરી બોય દ્વારા ભરેલા સિલિન્ડરમાંથી ખાલી સિલિન્ડરમાં ગેસ રીફીિલંગ કરી ગેસની ચોરી કરવા માટે વજન કરતાં સિલિન્ડરદીઠ 1 કિલોથી 5 કિલો સુધી ગેસ કાઢી લેતા હોય છે. ત્યારબાદ એજન્સીના માણસો ગ્રાહકોને તે વેચી અને બ્લેક માર્કેટિંગ હોય છે. ત્યારબાદ તેના દ્વારા મળેલાં નાણાં સરખા ભાગે વહેંચી લેતા હતા. શહેરમાં ગેસ એજન્સીઓ છે, જે આ રીતે ચોરી કરે છે, જો પોલીસ અને તોલમાપ તેમનાં ગોડાઉન પર દરોડા પાડે તો ઘણું મોટું કૌભાંડ બહાર આવી શકે તેમ છે.