છેતરપિંડી / આયુષ્યમાન કાર્ડ કૌભાંડઃ જયંતિ રવિએ કહ્યું- '10 હજાર કાર્ડ બ્લોક કરાયા, આ રીતે બનાવ્યા બારોબાર કાર્ડ...'

• ગુજરાતમાંથી નકલી આયુષ્યમાનનું મોટું કૌભાંડ સામે આવ્યું
• ફોલ્ટ કંટ્રોલ માટે દિલ્હી સરકારની સાથે સંપર્કમાં છીએઃ જયંતિ રવિ
• 17 કેસમાં તમામના કાર્ડ રદ કરવામાં આવ્યા છે અને 10 હજાર કાર્ડ બ્લોક કરાયાઃ જયંતિ રવિ

આયુષ્યમાન યોજના હેઠળ અંદાજિત 2 લાખથી વધારે નકલી કાર્ડ બનાવવામાં આવ્યા છે. આ છેતરપિંડીની ઓળખાણ નેશનલ હેલ્થ ઓથોરિટીની IT સીસ્ટમથી જાણવા મળી છે. જો કે, આ આંકડો હજુ પણ વધી શકે છે. નકલી કાર્ડ બનાવીને પૈસા કમાવવાનો ધંધો સૌથી વધારે ગુજરાત, ઉત્તરપ્રદેશ, છત્તીસગઢ, મહારાષ્ટ્રા, હરિયાણા, ઉત્તરાખંડ અને ઝારખંડમાં સામે આવ્યો છે. જેમાં જે લોકો આ યોજનાને પાત્ર પણ નથી તેમણે પણ આ કાર્ડ બનાવી લીધા છે.

10 હજાર કાર્ડ બ્લોક કરવામાં આવ્યા છેઃ જયંતિ રવી 

આ સમગ્ર મામલે આરોગ્ય વિભાગના અગ્ર સચિવ જયંતિ રવિએ નિવેદન આપ્યું છે. જયંતિ રવિએ કહ્યું કે, 24 જૂને અમારી પાસે માહિતી આવી હતી. 27 જૂને તમામ કલેક્ટરને કાર્ડ વિશે સૂચના આપી હતી. નેશનલ ફોર્ડ યુનિટને પણ આ બાબતે જાણ કરાઈ છે. નકલી આયુષ્યમાન કાર્ડ મામલે રાજકોટમાં 8 લોકોની અટકાયત કરવામાં આવી છે. જ્યારે વિવિધ એજન્સીના 6 લોકોને છુટા કર્યા છે. તેમજ 17 કેસમાં તમામના કાર્ડ રદ કરવામાં આવ્યા છે અને 10 હજાર કાર્ડ બ્લોક કરાયા છે.

આ ઉપરાંત તેમણે કહ્યું કે, ગુજરાત સરકારની યોજનામાં 5 સભ્યની લિમીટ છે. જ્યારે કેન્દ્ર સરકારની યોજનામાં લાભાર્થીની લિમિટ નથી. સોફ્ટવેરમાં ખામી હોવાથી આ પ્રકારની સમસ્યા ઉભી થઇ છે. આથી ફોલ્ટ કંટ્રોલ માટે દિલ્હી સરકારની સાથે સંપર્કમાં છીએ. જો કે ખોટા આવકના દાખલાના આધારે કાર્ડ બનાવ્યા હશે તો પણ આરોપીઓ સામે કાર્યવાહી થશે.

તમામ રાજ્યો પાસેથી આંકડા મંગાવાયા છેઃ પ્રવીણ ગેડા

આ મામલે NHAના ડેપ્યુટી CEO પ્રવીણ ગેડામે કહ્યું હતું કે, તમામ રાજ્યોમાંથી પૂર્ણ આંકડાઓ મંગાવવામાં આવ્યા છે. આ તમામ આંકડાઓ આવ્યા બાદ સાચી માહિતી ખબર પડી જશે. જો કે, આ છેતરપિંડિને પકડવા માટે આર્ટિફિશિયલ ઈન્ટેલીજન્સની પણ મદદ લેવામાં આવશે.