અત્યારે શોર્ટ એન્ડ સ્ટાઇલિશ હેરનો જમાનો છે. યુવતીઓમાં લાંબા રાખવાની જગ્યાએ શોર્ટ અને સ્ટાઇલિશ વાળ રાખવાનો વધારે ક્રેઝ છે. જો કે અરવલ્લીમાં એક યુવતીએ લાંબા વાળ રાખી ગિનિસ બૂક ઓફ વર્લ્ડમાં સ્થાન બનાવી દીધું છે.
નિલાંશી પટેલને ગિનિસ બુક ઓફ વર્લ્ડ રેકોર્ડમાં સ્થાન
6 ફૂટ લાંબા વાળ રાખી તોડ્યો પોતાનો જ રેકોર્ડ
ધોરણ-12માં અભ્યાસ કરે છે નિલાંશી પટેલ
મોડાસાના સાયરા ગામમાં રહેતી નિલાંશી પટેલે 6 ફૂટ લાંબા એટલે કે 190 સેન્ટી મીટર જેટલા વાળ રાખી ટીનએજ કેટેગરીમાં વિશ્વ રેકોર્ડ સર્જી દીધો છે. નિલાંશીએ 3 વર્ષની ઉમરથી જ વાળની કાળજી રાખી અને વિશ્વરેકોર્ડ સર્જી દીધો છે. નિલાંશી પટેલે 2018માં નવેમ્બરમાં 170.5 સેન્ટીમીટર લાંબા વાળ સાથે ગિનિશ બૂક ઓફ વર્લ્ડ રેકોર્ડમાં સ્થાન મેળવ્યું હતું. તેના એક વર્ષ બાદ પોતાનો જ રેકોર્ડ તોડ્યો છે.
આ વાળાના કારણે પ્રસિદ્ધિ મળીઃ નિલાંશી
નિલાંશીના લાંબા વાળ જોઈએને સૌકોઈને કુતુહુલ થાય છે. ત્યારે આ અંગે નિલાંશીએ કહ્યું કે મારે લાંબા વાળના કારણે મારે મિત્રો પણ વધ્યા છે અને શાળામાં મારા મિત્રો મારી વાળની જાળવણી કરવામાં મદદ કરે છે. આ વાળના કારણે તેને પ્રસિદ્ધિ મળી છે.
નિલાંશી ટેબલ ટેનીસ અને સ્વીમિંગમાં પણ નિપુણતા
દરેક સ્ત્રીને લાંબા વાળ ગમતા હોય છે પણ તેની માવજત કઠીન હોય તેથી અન્ય સ્ત્રીઓ પોતાના વાળ લાંબા રાખી શકાતી નથી. ત્યારે નિલાંશી લાંબા વાળ રાખીને પોતાના વિસ્તારમાં આકર્ષણનું કેન્દ્ર બની છે. બાળપણથી લાંબા વાળ રાખવાનો શોખ ધરાવતી નિલાંશી ટેબલ ટેનીસ અને સ્વીમિંગમાં પણ નિપુણતા ધરાવે છે. જેમાં તે રાષ્ટ્રીયકક્ષાએ ભાગ પણ લઇ ચુકી છે.
મને ગર્વ છે મારી દીકરી પરઃ નિલાંશીની માતા
તો નિલાંશીના માતા કામિનીબેન પણ નિલાંશીની આ સિદ્ધીથી ગર્વ અનુભવે છે. તેમણે કહ્યું હતું કે, હું જ્યારે પણ બહાર જાઉ છું તો લોકો મને પૂછે છે કે તમને નિલાંશીના માતા છો. ત્યારે આ સાંભળી મને ગર્વ અનુભવ થાય છે. સાથે જ કામિની બેને કહ્યું કે હાલ લોકોમાં દીકરાનો લગાવ વધારે હોય છે. પરંતુ મને મારી દીકરી પર ગર્વ છે અને લોકોએ દીકરા અને દીકરીમાં કોઇ ભેદભાવ ન રાખવો જોઇએ.