સુરત: ગુજરાતની રત્નનગરી તરીકે ઓળખાતા સુરતને ફરીથી એક વખત ગીનીશ બુકમાં સ્થાન મળ્યું છે. સુરતે ફરી એક વખત હીરાની ચમકથી વિશ્વને આશ્ચર્યચકીત કર્યું છે. સુરતની લોટસ રિંગને ગીનીઝ બુક ઓફ વર્લ્ડ રેકોર્ડમાં સ્થાન મળ્યું છે. આ રિંગને 6 690 હીરા જડીને રૂપિયા 24 કરોડના ખર્ચે તૈયાર કરવામાં આવી છે. હનુમંત ડાયમંડ કંપનીએ મેક ઈન ઈન્ડિયાના ઉદ્દેશ્ય સાથે 18 કેરેટ ગોલ્ડની આ ચમકદાર રિંગ બનાવી હતી. આ લોટસ રિંગને બનાવવા માટે 18થી 20 કારીગરોને એક વર્ષનો સમય લાગ્યો હતો.
આ અંગૂઠીની ખાસિયત છે કે આમાં 6690 કટ ડાયમંડ લગાડવામાં આવ્યા છે. રીંગમાં 18 કેરેટ રોઝ ગોલ્ડ અને 24 ટકા અલોયનો ઉમેરો કરવામા આવ્યો છે. જેનું વજન 58.176 ગ્રામનું છે. આ સિવાય 48 જેટલી લોટસ પેટલ છે. સુરતના વિશાલ અને ખુશ્બૂ અગ્રવાલે આ અંગૂઠી બનાવી છે. અગ્રવાલ દંપતીએ આ અંગૂઠીને બનાવતા એક વર્ષનો સમય લાગ્યો છે. અગ્રવાલ દંપતીએ જણાવ્યું છે કે વૈશ્વિક મંચ ઉપર ભારતની એક ખાસ ઓળખ આપવા મેક ઇન ઇન્ડિયા ને પાવર આપવા ઇન્ડિયન થીમ પર આ અંગૂઠી બનાવવામાં આવી છે.
આ અંગૂઠી બનાવનાર વિશાલ અગ્રવાલે જણાવ્યું કે તેઓને વિશ્વાસ ન હતો કે તેઓ આવી કોઈ રિંગ બનાવી લેશે. અમેરિકામાં વધારે યુનિક અને આઉટ ઓફ ધ બોક્સ જ્વેલરી જોવા મળે છે. ત્યારે વિચાર આવ્યો કે ઇન્ટરનેશનલ માર્કેટમાં ભારતની પણ ડિઝાઇન હોવી જોઈએ. પત્ની ખુશ્બુ સાથે આ માટે એક વર્ષ સુધી કામ કર્યું. તેઓ એક એવી અંગૂઠી બનાવવા માંગતા હતા જે ભારત ની ઓળખ બને.
લોટસ રિંગની ડિઝાઇન કરી આ રિંગ તૈયાર કરવામાં આવી. જેને માટે સુરત સહિત મુંબઇના નિષ્ણાતો ની મદદ લેવામાં આવી છે. અગાઉ મયુર ડિઝાઇનમાં રાજસ્થાનના સેવીઓ નામક વ્યક્તિ દ્વારા 3800 ડાયમંડ યુક્ત રિંગ બનાવવામાં આવી હતી. જેનો રેકોર્ડ સુરતે તોડ્યો છે અને ગીનીશ બુક ઓફ વર્ડ રેકોર્ડમાં પોતાનું નામ નોંધાવ્યું છે.