સુરત / સ્વચ્છતા સર્વેક્ષણ 2023 માટેની માર્ગદર્શિકા બહાર પડાઈ, હવેથી સર્વેમાં સૌ પ્રથમ સિટીઝન ફિડબૅક લેવાશે

• સ્વચ્છતા સર્વેક્ષણ 2023 માટેની માર્ગદર્શિકા બહાર પડાઈ
• સર્વે હવે 7500ને બદલે 9500 માર્કસનો હશે
• સર્વેમાં સૌ પ્રથમ સિટીઝન ફિડબૅક લેવામાં આવશે

સ્વચ્છતા સર્વેક્ષણમાં માર્કસનો વધારો કરાતા સર્વે હવે 7500ને બદલે 9500 માર્કસનો હશે. શહેર સ્વચ્છતા સર્વેક્ષણમાં 2 હજાર માર્કસનો વધારો કરાયો છે. રેન્કિંગ પેરામીટર્સમાં પણ કેટલાક ફેરફારો કરવામાં આવ્યા છે. નવા માપદંડમાં 4 તબક્કામાં હાથ ધરવામાં આવનારા સર્વેમાં સૌ પ્રથમ સિટીઝન ફિડબૅક લેવામાં આવશે. અગાઉ છેલ્લા તબક્કામાં નાગરિક ફિડબૅકની જોગવાઈ હતી.

ગટરના આવરણ, સફાઈ જેવા સેવા સ્તરના કાર્ય માટે 48% માર્કસ નક્કી કરાયા

તમને જણાવી દઇએ કે, આગામી સર્વેક્ષણમાં કચરો એકત્ર કરવા, ગટરના આવરણ, સફાઈ તેમજ જૈવિક ખાતર બનાવવાની પ્રક્રિયા જેવા સેવા સ્તરના કાર્ય માટે 48% માર્કસ નક્કી કરવામાં આવ્યા છે. આ સાથે સર્વેક્ષણ ટીમ જાહેર સ્થળોએ ગમે ત્યાં ગુટખા, પાન-માવા અને તંબાકુ ખાઇને થૂંકવાનું પણ મૂલ્યાંકન કરશે. એટલે કે થૂંકતા હોવાના ચિત્રથી સુરતના રેન્કિંગમાં ઘટાડો થઈ શકે છે.

મહત્ત્વના સિટિઝન વૉઇઝ એટલે કે હવેથી પબ્લિક ફિડબૅક સૌ પ્રથમ કરવામાં આવશે. 2022માં સિટિઝન વોઇઝ 2250 માર્કસ હતા તે વધારીને 2475 કરાયા. સર્ટિફિકેશનમાં પણ વધારો કરાયો છે જે 2250 હતા તેને વધારીને 2500 કરાયા. નવા માપદંડ મુજબ જ્યાં ગટરનું કવર 100 ટકા આવવું જોઈએ ત્યાં વેસ્ટ મેનેજમેન્ટના 1830 પોઈન્ટ નક્કી કરાયા છે. જે ગયા વર્ષે 1200 માર્ક્સ હતા. એટલે કે પાલિકા શહેરમાંથી પેદા થતાં કચરાનું કેવી રીતે વ્યવસ્થાપન કરે છે તેની પર ખાસ ધ્યાન અપાશે. આ વખતે ગાર્બેજ કલેક્શન પર માર્કસ લગભગ બમણા થઈ ગયા છે.

ગાર્બેજ કલેક્શન સર્વિસ માટેના માર્કસમાં પણ વધારો કરાયો

આ સિવાય ગયા વર્ષે જ્યાં ગાર્બેજ કલેક્શન સર્વિસ માટે 900 માર્કસ નક્કી કરવામાં આવ્યાં હતાં. તેને આ વખતે વધારીને 1750 માર્કસ કરવામાં આવ્યા છે. પાણી પુરવઠા વ્યવસ્થાપન અને સફાઈ કામદારોની સલામતી માટે અને પાણી માટે 945 માર્ક્સ નક્કી કરવામાં આવ્યા છે. ગયા વર્ષે આ માટે 900 માર્કસ નક્કી કરવામાં આવ્યા હતા.