GST વિભાગે રાજ્યના 15થી વધુ પેટ્રોલ પંપો વિરૂદ્ધ તપાસ હાથ ધરતા પંપ માલિકો પૂરતો ટેક્સ ન ભરતા હોવાનું સોફ્ટવેરમાં ઝડપાયું.
ગુજરાતના 19 પેટ્રોલપંપ સામે GSTની તપાસ
પૂરતો ટેક્સ ન ભરાતો હોવાનું સોફ્ટવેરમાં ઝડપાયું
પંપ માલિકો પાસેથી હિસાબી ચોપડા અને ડિજિટલ ડેટા જપ્ત
તાજેતરમાં સ્ટેટ GST વિભાગે શહેરના 6 પેટ્રોલ પમ્પ સામે તપાસ શરૂ કરી છે. પેટ્રોલ પંપના માલિકો ભરવા પાત્ર ટેક્સ પૂરેપૂરો ન ભરતા હોવાનું ઇન્ટેલિજન્સના સોફ્ટવેરમાં ઝડપાયું હતું. સ્ટેટ GST ડિપાર્ટમેન્ટે આ ઉપરાંત રાજ્યના અન્ય 19 પંપ સામે તપાસ પણ હાથ ધરી છે. પંપ માલિકો પાસેથી હિસાબી ચોપડા અને ડિજિટલ ડેટા પણ જપ્ત કરાયા છે.
સ્ટેટ GST વિભાગના સિસ્ટમ બેઝડ એનાલિસિસ તેમજ માર્કેટ ઈન્ટેલિજન્સ દ્વારા આ તપાસ હાથ ધરવામાં આવી હતી. જેમાં કેટલાંક પેટ્રોલ પંપોની પેટ્રોલ-ડીઝલના જથ્થાની આવક સામે ટેક્સની રકમમાં તફાવત જોવા મળ્યો હતો. આ તફાવતને લઇને પેટ્રોલ પંપના માલિકો કેવા પ્રકારની ટેક્સ ચોરી કરી રહ્યાં છે તે સમજવા માટે રાજ્યના લગભગ 25 પેટ્રોલ પંપો ઉપર તપાસ હાથ ધરાઈ હતી.
આ તપાસ દરમિયાન પંપો પર પેટ્રોલ વેચવામાં આવે છે તેનો હિસાબની નોંધ કરવામાં આવે છે કે નહીં તે તપાસવામાં આવ્યું છે. આ તપાસમાં પેટ્રોલ પંપના સંચાલકો પાસેથી હિસાબી ચોપડા તેમજ ડિજિટલ ડેટા રિકવર કરવામાં આવ્યા. આ ડેટાના આધારે ટેકસ ચોરી કરવામાં આવી હશે તો કાયદેસરની કાર્યવાહી હાથ ધરવામાં આવશે.
ઉલ્લેખનીય છે કે, રાજ્યમાં ઘણીવાર GST વિભાગ દ્વારા બેનામી વ્યવહાર કરતી કંપનીઓ સામે કાર્યવાહી કરવામાં આવતી હોય છે. મહત્વનું છે કે, થોડાંક દિવસો પહેલાં સ્ટેટ GST ડિપાર્ટમેન્ટ દ્વારા રાજ્યના અમદાવાદ અને સાસણગીરની હોટલ અને રિસોર્ટ પર દરોડા પાડવામાં આવ્યા હતા. જેમાં GST વિભાગે 2 કરોડ 14 લાખની વસૂલાત કરી હતી.
સ્ટેટ GST ડિપાર્ટમેન્ટ દ્વારા રાજ્યના અમદાવાદ અને સાસણગીરની હોટલ અને રિસોર્ટ પર દરોડા પાડવામાં આવ્યા હતા. 17 જગ્યાએ પાડવામાં આવેલા આ દરોડામાં કરચોરી કરતા રૂ. 12 કરોડનું ટર્ન ઓવર સામે આવ્યું છે. જેની ઉપર રૂ. 3 કરોડ 4 લાખની કરચોરી પકડવામાં આવી હતી. આ કરચોરીમાંથી સ્ટેટ GST અધિકારીઓએ રૂપિયા 2.14 કરોડની વસૂલાત કરી છે.
આ અગાઉ સાસણ ગીર પંથકની 29 હોટલ અને રિસોર્ટમાં GSTની ટીમે સપાટો બોલાવ્યો હતો
આ પહેલાં સાસણ ગીર પંથકની 29 હોટલ અને રિસોર્ટમાં GSTની ટીમે સપાટો બોલાવ્યો હતો. અગાઉ રાજકોટ વિંગની 30 ટીમોએ સર્ચ ઓપરેશન હાથ ધર્યુ હતું. જેમાં જ્યારથી GST લાગુ કરાયું ત્યારથી અત્યાર સુધીના તમામ રેકોર્ડ તપાસવામાં આવી હતી. ઉનાળુ વેકેશન ટાણે જ્યારે રિસોર્ટમાં પ્રવાસીઓનો ધસારો જોવા મળી રહ્યો છે એવાં સમયે જ GST વિભાગે ટેક્સ ચોરી બહાર લાવવા દરોડા પાડવામાં આવ્યા હતાં.