રેડ / રાજ્યના 282 સ્થળો પર GST વિભાગના દરોડા, 6 હજાર 30 કરોડના બોગસ વ્યવહારો ઝડપાયા

અમદાવાદમાં 84, સુરતમાં 62, મોરબીમાં 55 સ્થળોએ દરોડા યથાવત્ છે. ભાવનગરમાં 17, વાપીમાં 16, ગાંધીધામમાં 13 સ્થળોએ દરોડા પાડવામાં આવ્યા છે. રાજકોટમાં 10, ગાંધીનગરમાં 9, વડોદરામાં 7 અને અન્ય 9 સ્થળોએ પણ દરોડા પાડવામાં આવ્યા છે.

મોટાભાગના શહેરમાં દરોડા

રાજ્યના મોટાભાગના શહેરોમાં સ્ટેટ GSTના અધિકારીઓ દ્વારા કાર્યવાહી કરવામાં આવી છે. સ્ટેટ GST વિભાગના અધિકારીઓએ મોરબી, રાજકોટ, ગાંધીધામમાં દરોડા પાડ્યા છે. રાજકોટમાં 10 જેટલી જગ્યા પર સ્ટેટ GSTની ટીમનું સર્ચ ઓપરેશન હાથ ધર્યુ. જ્યારે મોરબીના 55 સ્થળ પર વહેલી સવારથી કાર્યવાહી કરવામાં આવી રહી છે. ગાંધીધામમાં 10થી વધુ જગ્યા પર દરોડાની કાર્યવાહી કરી છે. સ્ટેટ GST વિભાગના દરોડાની કાર્યવાહીથી વેપારીઓમાં ફફડાટ જોવા મળ્યો છે.

કોંગી આગેવાન જયેશ કાલરીયાને ત્યાં દરોડા

થોડા દિવસ અગાઉ મોરબીના બે કેમિકલના ધંધાર્થીને ત્યા સ્ટેટ GST વિભાગે દરોડા પાડ્યા હતા કોંગી આગેવાન જયેશ કાલરીયાને ત્યાં GST વિભાગે દરોડા પાડ્યા હતા. પીપળી રોડ પરની ટેકનો સીરામીક નામની પેઢી પર દરોડા પાડીને હિસાબી સાહિત્ય જપ્ત કરવામાં આવ્યું હતું. બંને પેઢી સીરામીક કેમિકલનું વેચાણ કરી રહી છે. અનેક સીરામીકને બિલ વગર માલ મોકલ્યું હોવાની વિગત પણ સામે આવી છે.