મંદ પડેલી અર્થવ્યવસ્થાની ધીમી ગતિ વચ્ચે આજે નાણાંમંત્રી નિર્મલા સીતારમણની અધ્યક્ષતામાં ગુડ્ઝ એન્ડ સર્વિસ ટેક્સ (GST) કાઉન્સિલની એક મહત્વપૂર્ણ બેઠક ગોવામાં યોજાવવાની છે. જેમાં ઓટો સેક્ટરને રાહત મળવાની આશા છે અને સાથે જ હોટલ ઈન્ડસ્ટ્રીમાં પણ થોડી રાહત મળશે તેવા સંકેત છે.
હોટલ ઈન્ડસ્ટ્રીને મળી શકે છે GST કાઉન્સિલની બેઠકમાં રાહત
મંદ પડી ચૂકેલી અર્થવ્યવસ્થાની ગતિ વધારવા માટે આજે ગોવામાં GST કાઉન્સિલની ખાસ બેઠક યોજાશે. આ કાઉન્સિલની 37મી બેઠક હશે. તેમાં અનેક વસ્તુઓના રેટ ઘટે તેવી આશા છે. ખાસ કરીને બિસ્કિટ, માચિસ અને હોટલ ઈન્ડસ્ટ્રીને રાહત મળવાની આશા છે. પરંતુ ઓટો સેક્ટરમાં રાહત મળવાનું થોડું મુશ્કેલ લાગી રહ્યું છે.
GSTમાં ઘટાડાની માંગ
આ જીએસટી કાઉન્સિલની બેઠકમાં ઓટોમોબાઈલ, બિસ્કિટ, માચિસ, આઉટડોર કેટરિંગ સેગમેન્ટના GST રેટમાં બદલાવની વાત રજૂ કરવામાં આવી છે. માનવામાં આવી રહ્યું છે કે ફક્ત હોયલ ઈન્ડસ્ટ્રીને રાહત મળી શકે છે. જ્યારે ઓટો ઈન્ડસ્ટ્રીમાં કાર પર લાગતા 28 ટકાના જીએસટીને ઘટાડીને 18 ટકા કરવાની માંગ છે. ઈન્ડસ્ટ્રીની આ માંગ પર અનેક રાજ્ય સરકારની સાથે સહમત નથી. સાથે માચિસ ઉદ્યોગને પણ જીએસટી દરમાં મુશ્કેલી હોવાથી તેમાં રાહત મળવાની શક્યતા છે.
ઓટો સેક્ટરમાં રાહતની સંભાવના ઓછી
GST કાઉન્સિલની ફિટમેન્ટ કમિટીનું માનવું છે કે ઓટો સેક્ટરમાં રેટ ઘટાડવાથી GST કલેક્શન પર અસર થશે. કેમકે આ સેક્ટરથી વાર્ષિક 50-60 હજાર કરોડ રૂપિયાના જીએસટીનું કલેક્શન થાય છે. સૂત્રો જણાવે છે કે જીએસટી પરિષદની એડજેસ્ટમેન્ટ કમિટીએ મહેસૂલની સ્થિતિને જવાબદાર ગણાવીને બિસ્કિટથી લઈને કાર ઉદ્યોગમાં જીએસટીના ઘટાડાની માંગને નકારી દીધી છે.
હોટલ ઈન્ડસ્ટ્રીને મળી શકે છે રાહત
હોટલ ઈન્ડસ્ટ્રીને જીએસટીની બેઠકમાં રાહત મળવાની આશા છે. હાલમાં 7500 રૂપિયા એક નાઈટના સ્ટેનો ચાર્જ કરનારી લક્ઝરી હોટલ પર 28 ટકા જીએસટી લાગતો હતો. ઉલ્લેખનીય છે કે ટૂરિઝમને વધારવા માટે પીએમ મોદીની વાતને ધ્યાનમાં રાખીને 10-12 હજાર રૂપિયા એક રાતના સ્ટેનો ચાર્જ કરનારી હોટલો માટે જીએસટી રેટ ઘટાડીને 18 ટકા કરવામાં આવશે. સાથે જ આઉટડોર કેટરર્સ પર પણ 18 ટકા ટેક્સ લાગે છે અને તેમને પણ રાહત મળી શકે છે.
GST કલેક્શન અપેક્ષા કરતાં રહ્યું ઓછું
ફિટમેન્ટ કમિટીના જણાવ્યા અનુસાર, ઓગસ્ટ 2019 માં એકંદરે જીએસટી સંગ્રહ 98,202 કરોડ રૂપિયા રહ્યો હતો, જે ગયા વર્ષના સમાન મહિનામાં 93,960 કરોડની તુલનાએ 4.51 ટકા વધારે હતો. જો કે આ જીએસટી કલેક્શન લેવલ દર વર્ષના આધારે ઊંચું હતું. તેમ છતાં તે સરકારની અપેક્ષા મુજબ 1 લાખ કરોડ રૂપિયાથી ઓછું હતું.