ગુજરાત એસટી નિગમના કર્મચારીઓ હડતાળ ઉપર હોવાથી રાજ્યભરના 8 હજારથી વધુ એસ.ટી.બસના રૂટને અસર થઈ છે. જેને લઈને લાખો મુસાફરો અટવાયા છે. ત્યારે જિલ્લા પ્રાથમિક શિક્ષણ સંધ દ્વારા પણ હડતાળ પાડવામાં આવી છે.
શિક્ષકોના પડતર પ્રશ્નો મુદ્દે રાજ્યના સવા બે લાખ શિક્ષકો આજથી હડતાળ પર ઉતર્યા છે. મહત્વનું છે કે, ગુજરાત રાજ્ય પ્રાથમિક શિક્ષક સંઘ દ્વારા 1997થી ફિક્સ પગારના શિક્ષકોની નોકરીને સળંગ ગણવાની માંગણી કરવામાં આવી છે.
આ ઉપરાંત અલગ ગ્રેડ પે અને નવી ભરતી થયેલા શિક્ષકોને જૂની પેન્શન યોજનાનો લાભ મળે, તથા સાતમા પગાર પંચની ભલામણોનો અમલ વગેરેની પણ માંગણી કરવામાં આવી છે.
મળતી માહિતી મુજબ ગુજરાત એસટી નિગમના કર્મચારીઓએ સાતમા પગાર પંચ અને પડતર માંગણીઓને લઈ હડતાળ કરી છે. તેમજ સરકાર જ્યાં સુધી માંગણી નહીં સ્વીકારે ત્યાં સુધી અચોક્ક્સ મુદ્દતની હડતાળ યથાવત રાખવાનો નિર્ણય યુનિયન દ્વારા કરવામાં આવ્યો છે. આમ GSRTC અને શિક્ષકોના આંદોલનને લઈને સરકારની મુશ્કેલીમાં વધારો થયો છે.