પ્રેરણા / ગુજરાતના આ ગામના સંપની તાકાત તમને ચકિત કરી દેશે, કરી બતાવ્યું આ કામ

• હિંમતનગરના નવાપુરાના ગામ લોકોનું અનોખું કાર્ય
• ભૂગર્ભ જળ ખેંચવાના બદલે ભૂગર્ભ જળની કરાઇ બચત

સાબરકાંઠાના હિંમતનગર નજીક આવેલા નવાપુરા ગામ છેલ્લા 20 વર્ષથી દિન-પ્રતિદિન પ્રગતિના સોપાનો સર કરી રહ્યું છે ત્યારે આ વખતે  પણ નવાપુરા ગામના સ્થાનિકોએ કરેલો સંકલ્પ સમગ્ર દેશ માટે મહત્વનો બની રહેશે. ગામના ખેડૂતોએ `સંઘ શક્તિ કલૌયુગેની યુક્તિને સાર્થક કરી બતાવી છે. 

લોકોના સહિયારા પુરુષાર્થની સૂઝથી આ ગામ મોડલ ગામ 

ગામ લોકોએ ગામની નજીકમાંથી પસાર થઈ રહેલી કેનાલનું પાણી ગામમાં એક  જગ્યાએ એકઠું કરવા વિશાળ ભૂગર્ભ  હોજ તૈયાર કર્યો છે અને 440 હોર્સ પાવરની મોટરની જગ્યાએ માત્ર પાંચ હોર્સ પાવરની મોટરથી ગામમાં તમામ જગ્યાએ ટપક સિંચાઈ પદ્ધતિ અપનાવીને પિયતનું પાણી પહોંચાડવાની  શરૂઆત કરી છે. આ ગામના લોકોએ વાદવિવાદની જગ્યાએ વિકાસ તરફ ઉધ્વર્ગમન કર્યું છે. ગામ લોકોના સહિયારા પુરુષાર્થની સૂઝથી આ ગામ મોડલ ગામ બની ગયું  છે.

પાણીને એક જગ્યાએ કરાયું એકઠું

રાજ્ય સરકારની મંજૂરી મેળવીને ગામના લોકોએ કેનાલમાં વહી જતું પાણીને એક જગ્યાએ એકઠું  કરવા ભૂગર્ભ સંપ બનાવ્યો છે. જ્યાં  એક જગ્યાએ પાણી એકઠું કરીને વિવિધ 45 લાઈનો  દ્વારાતમામ ખેડૂતોના ખેતરોમાં લાઇન દ્વારા  પાણી પહોંચાડવામાં આવી રહ્યું છે. ખેડૂતો દ્વારા આ પ્રકારનો  પ્રયાસ સમગ્ર દેશમાં પ્રથમવાર કરાયો છે.   

ગામલોકોનો પ્રયાસ વહીવટીતંત્રએ બિરદાવ્યો

ગામલોકોના આ પ્રયાસને સાબરકાંઠા જિલ્લા વહીવટીતંત્રએ પણ બિરદાવ્યો છે. એટલું જ નહીં ગામને જરૂરી તમામ સહયોગ આપવાની પણ ખાતરી આપી છે. સાબરકાંઠા જિલ્લા નાયબ કલેક્ટરે ખેડૂતોની આ પહેલનું જાતનિરીક્ષણ કર્યું હતું. ગામના વિકાસની નોંધ રાજ્યકક્ષા સુધી પહોંચાડવાની પણ વાત કરી છે.  

ગામલોકોએ કરેલી આ પહેલને રાજ્ય સરકાર દ્વારા સન્માનિત કરવામાં આવે અને  રાજ્યમાં અન્ય જગ્યાએ પણ આ મોડલ લાગુ પાડવામા આવે તો પાણી, વીજળી અને મહેનતમાં બચત થાય  તેમ છે..