કુદરતના કાળા કોપની. એવો કાળો કોપ જેણે મોતના દર્શન તો કરાવી જ દીધા. પરંતુ લાખો લોકોને વર્ષો સુધી ન ઊભા થઈ શકે તેવા ડામ આપ્યા છે. આપણે વાત જામનગર જિલ્લામાં પડેલા જળબંબાકાર વરસાદની છે. વરસાદ એવી આફત બનીને વરસ્યો કે, લોકો ન ઘર બચાવી શક્યા, ન ઘરનો સામાન, કે ન તો પોતાના મુંગા પશુઓને, બસ કાંઈ બચાવી શક્યા તો માત્રને માત્ર ખુદનો જીવ. ત્યારે આ તારાજીએ કેવો વિનાશ સર્જયો છે. અને લોકોને કેવા વર્ષોના ડામ આપ્યા છે. તેની વાસ્તવિક્તા જાણવા વીટીવી ન્યૂઝ અનેક પડકારો વચ્ચે ગ્રાઉન્ડ ઝીરો પર પહોંચ્યુ તો ખરી પણ ત્યાંની કરુણતા જોઈ રિપોર્ટ આપવા પણ દિલ પર પથ્થર મૂકવો પડે છે. જામનગરના આલિયા અને અરિયલ ગામનો આખો દેખા હાલ ખૂબ દયનિય છે.
પોતાના જીવ સિવાય કાંઈ નથી ન રહ્યું
માત્ર કલાકોનો જ ખેલ. અને કલાકોમાં જે બદલાયું. તેની ભાગ્યેય કોઈએ કલ્પના નહોતી કરી. જ્યાં દુકાળના ભણકાર વાગતા હતા, ત્યાં લીલો દુકાળ ખાબક્યો. જ્યાં પાકને નવજીવન મળ્યું હતું. ત્યાં પાક મુળમાંથી ઉખડી દરિયે પહોંચી ગયો. જે ઘર આસરો હતો. તે ઘરનો પથ્થર પણ નથી રહ્યો. જામનગરમાં 24 કલાકમાં જે તારાજી સર્જાઈ. જે એકા-એક 27 ઈંચ જેટલો વરસાદ ખાબક્યો. તેણે લોકોને જીવતા જીવત મૃત્યુના દર્શન કરાવી દીધા. વરસાદી તારાજીના પ્રકોપ બાદ જે વિનાશ સર્જાયો છે.લોકોની જે સ્થિતિ થઈ છે. તેને જાણવા માટે અમારી ટીમ ગ્રાઉન્ડ ઝીરો પર પહોંચી. જે દ્રશ્યો અમારી આંખો સામે હતા. તે હચમચાવનારા હતા. તો લોકોની સ્થિતિ તેનાથી પણ ખરાબ હતી.અમારી ટીમ એવા ગામડા સુધી પહોંચી જ્યાં લોકો પાસે પોતાનો જીવ સિવાય કાંઈ નથી બચ્યું.
ઘરમાં કાદવ સિવાઈ કાંઈ નહીં
અરિયલ ગામ: આંખોમાં આસું છે. ચિંતા પોતાના 8 મહિનાના બાળકની. ચિંતા પોતે નહીં પરંતુ પોતાના બાળકો શું ખાશે તેની છે. ચિંતા એ છે કે, હવે ઘર ચલાવવું કેવી રીતે. કારણ કે, ન તો ઘરવખરી બચી. ન તો પૈસા કે દાગીના. તેવામાં અનાજ-કરિયાણું ક્યાંથી લાવવું. માથા પર છત નથી તો છત કેવી રીતે બનાવવી. અનેક પડકારો લોકો સામે આવીને ઉભા રહી ગયા છે. અમારી ટીમ આગળ વધી અન્ય ગામડાઓ સુધી પહોંચી તો ત્યાં પણ લોકોની હાલત સૌથી ખરાબ જોવા મળી. જે ઘર બચી ગયા છે. તેની હાલત તો જાણે કાદવમાં ઉભા હોય તેવી થઈ ગઈ છે. લોકો વિચારમાં પડી ગયા છે કે, કેવી રીતે આ કાદવમાંથી બહાર નિકળશું. કારણ કે, ઘરમાં કાદવ સિવાઈ કાંઈ બચ્યું જ નથી.
127 ગામડાઓમાં 24 કલાક માટે તો જાણે અંધારપટ છવાઈ ગયો હતો. કારણ કે, જ્યાં જુઓ ત્યાં બસ વરસાદી પાણીએ કબજો કર્યો હતો. અમારી ટીમ જેમ-જેમ આગળ અન્ય ગામડાઓ સુધી પહોંચી સ્થિતિ દરેક ગામડાઓમાં બદથી બત્તર જોવા મળી. લોકો બસ એક જ આંસમાં બેઠા છે કે, કોઈ આવે અને તેમને આ હોનારતમાંથી ઉગારે.