ભારતમાં બે મહિનાથી ચાલી રહેલા ખેડૂત આંદોલનની હવે વિશ્વભરમાં ચર્ચા શરૂ થઈ ગઈ છે. ગઇકાલે પોપ સ્ટાર રિહાનાએ આંદોલનને લઈને એક ટ્વિટ કર્યું હતું જે બાદથી હવે વધુ સેલેબ્રિટી આ આંદોલનને લઈને પ્રતિક્રિયા આપી રહ્યા છે.
વિશ્વના અનેક સેલેબ્રિટી હવે આંદોલનના સમર્થનમાં
રિહાનાના ટ્વિટ બાદ ગ્રેટા થનબર્ગ આંદોલનના સમર્થનમાં
અમેરિકાની સંસ્થાઓએ પણ પ્રતિક્રિયા આપી
પર્યાવરણ પર કામ કરનારી ભારતીય સામાજિક કાર્યકર્તા લિસીપ્રિયા કંગુજમ છેલ્લા ઘણા દિવસથી આંદોલનનું સમર્થન કરી રહી છે અને તેણે પણ આંદોલનને સમર્થન કરવા માટે દુનિયાભરને અપીલ કરી છે. પર્યાવરણ એક્ટિવિસ્ટ ગ્રેટા થનબર્ગે પણ આ વિષય પર ચર્ચા કરવાની અપીલ કરી છે. નોંધનીય છે કે લિસીપ્રિયા કંગુજમ ત્યારે ચર્ચામાં આવી હતી જ્યારે તેણે પીએમ મોદી દ્વારા આપવામાં આવેલ સન્માનને ઠુકરાવી દીધો હતો.
ગ્રેટાએ ટ્વિટ કરીને કહ્યું કે ભારતમાં થઈ રહેલા આંદોલનમાં અમે અડગતાથી ખેડૂતોની સાથે ઊભા છે. નોંધનીય છે કે ગ્રેટાએ આ પહેલા ભારતના NEET પરીક્ષાનો વિરોધ કરી રહેલા વિધ્યાર્થીઓનું સમર્થન કર્યું હતું.
રિહાનાના ટ્વિટ બાદ આંતરરાષ્ટ્રીય સંસ્થા હ્યુમન રાઇટ્સ વોચ, ઇન્ટરનેશનલ ઈન્ટરનેટ રાઇટ્સ સાથે જોડાયેલી સંસ્થા, અમેરિકન મોડલ અમાન્ડા સેર્ની સહિતની ઘણી બધી સંસ્થાઓ અને હસ્તીઓએ આંદોલનને સમર્થન આપ્યું છે.
નોંધનીય છે કે ભારતમાં છેલ્લા સમયથી ખેડૂતો આંદોલન કરી રહ્યા છે અને કાયદા રદ કરવા મામલે બંને પક્ષો વચ્ચે વિવાદ વધી રહ્યો છે ત્યારે ખેડૂત આગેવાનો વધુને વધુ કડક વલણ અપનાવી રહ્યા છે.