શહેરને આટી મારે તેવુ ગામ: તમામ ઘરે 100 ટકા પાણીનું છે કનેક્શન, શિક્ષણથી લઈને સ્વાસ્થ્યની પણ સુવિધા
ગુજરાતનું સમરસ ગામ
1963થી એકપણ વખત ચૂંટણી નહીં
સમરસ રીતે સરપંચની થાય છે નિમણૂક
ચૂંટણી એટલે આપણા માટે તો એક તહેવાર. કારણ કે, ચૂંટણી આવે એટલે નેતાઓની રેલીઓ યોજાય, સભાઓ યોજાય, નેતાઓના આંટાફેરા વધી જાય અને લોકોને રિઝવવા માટે પાર્ટીઓ પણ થાય. પરંતુ આજે અમદાવાદના એક એવા ગામની વાત કરવી છે જ્યાં 1963 આજદીન સુધી ચૂંટણી જ નથી થઈ. અહીં કોઈપણ પ્રકારની ચૂંટણી વીના જ ગામમાં સરપંચ બને છે. અને વર્ષોની પરંપરા આજે પણ ચાલતી આવે છે.
સાણંદ તાલુકાનું વાસણા ગામ 1963 થી આજદીન સુધી સમરસ
ચૂંટણી આવે એટલે બે રાજકીય પક્ષો સામ-સામે આવે. વિકાસના વાયદાઓ થાય. બે વ્યક્તિ સામ-સામે મેદાનમાં ઉતરે અને હાર-જીત માટેનો સંગ્રામ યોજાય. પરંતુ તમે વીટીવી પર જે વાસણા ગામને જોઈ રહ્યા છો. ત્યાં 1963 થી આજદીન સુધી એકપણ વખત ગ્રામપંચાયતની ચૂંટણી નથી થઈ. કારણ કે, અહીં ગામના લોકો ભાગલાવાદી નીતિમાં નહીં પરંતુ ભાઈચારીની નીતિમા માને છે. અને ચૂંટણી સમયે ગામના સર્વે લોકો ભેગા મળીને સર્વસંમત્તિથી સરપંચની નિમણુક કરે છે. જોકે વાસણા ગામમાં રાજપૂત સમાજની 95 ટકા વસ્તી છે. જ્યારે SC અને ST સમુદાયની 5 ટકા વસ્તી છે. જોકે આપણને ક્યારેક એક જ સમાજમાં પણ બે ફાંટા જોવા મળતા હોય છે. પરંતુ વાસણા ગામમાં તો ભાઈચારો એટલો છે કે, ગામમાં ચૂંટણી સમયે બે ફાંટા પડવા તો દૂર પરંતુ લોકોમાં ઝઘડા પણ નથી થતા.
ગામ તમામ સુવિધાઓથી સજ્જ
વાસણામાં ગ્રામમાં પંચાયતની ચૂંટણી તો સમરસ થાય છે. પરંતુ તેની સાથે-સાથે ગામમાં સુવિધાઓની પણ કોઈ કમી નથી. જેથી આ ગામની વારંવાર સરકારમાં પણ નોંધ લેવાય છે. ગામમાં સુવિધાઓ અંગે વાત કરવામાં આવે તો. ગામના તમામ રસ્તા અને શેરીઓ આર.સી.સી.થી બનેલા છે. ગામમાં 100 ટકા પાણીનું કનેક્શન છે. સંપૂર્ણ રીતે શૌચાલય યુક્ત અને ગંદકી મુક્ત ગામ છે. ગામના દરેક ખુણે CCTV કેમેરા અને લાઉડ સ્પીકર પણ લગાવવામાં આવ્યા છે. ગામમાં શિક્ષણ માટે અધતન શાળા બિલ્ડિંગ અને યુવાનો માટે પુસ્તકાલય પણ આવેલું છે. ગામની ફરતી કંપાઉન્ડસ, તળાવ અને બગીચો પણ ગામલોકો દ્વારા બનાવાયો છે. એટલું જ નહીં પાણી સંગ્રહ કરીને તેનો સિંચાઈ માટે ઉપયોગ થઈ શકે તેવી પણ વ્યવસ્થા કરવામાં આવી છે. આમ આ ગામ તમામ સુવિધાઓથી સજ્જ છે. અને તે પણ કોઈપણ પ્રકારની રાજનીતિ વીના.
પૂર્વ રાષ્ટ્રપતિ એ.પી.જે અબ્દુલ કલામના હસ્તે એવોર્ડ
ગામના લોકોની કામગીરી અને સુવિધાઓ તો આકર્ષક છે જ. પરંતુ 1963 ની એકપણ વખત ચૂંટણી ન યોજાનાર ગામને અનેક એવોર્ડ પણ મળી ચૂક્યા છે. જેમાં 2006માં વાસણા ગામને સમરસ ગ્રામપંચાયત એવોર્ડ મળ્યો છે. 2006માં પૂર્વ રાષ્ટ્રપતિ એ.પી.જે અબ્દુલ કલામના હસ્તે નિમર્લ ગ્રામ પંચાયત્ત પુરસ્કાર મળ્યો હતો. જ્યારે 2011 થી 2021 સુધી સમરસ ગામનો એવોર્ડ મળ્યો છે. આમ વાસણા ગામને સમરસ ગામના એવોર્ડની સાથે-સાથે અનેક એવોર્ડ મળ્યા છે. મહત્વનું છે કે, ટૂંક મસયમાં જ ગ્રામપંચાયતની 5 વર્ષની અવધી પૂર્ણ થવાની છે. તેવામાં આ ગામના લોકો સરપંચ પાસેથી હજારો લીટર પાણીના સંગ્રહની સુવિધાઓ માટે આશા સેવીને બેઠા છે.
આપણે ત્યાં એક કહેવત છે કે, ગામ હોય ત્યાં ઉકરડા હોય. પરંતુ વાસણા ગામે તો તે કહેવતને જ ખોટી પાડી દીધી છે. એટલું નહીં ગામની સુંદરતા અને વિકાસ એટલો છે કે, શહેર પણ ગામ પાસે ટુંકું પડે છે. તેવામાં જો પ્રત્યેક ગામ વાસણા ગામની જેમ પોતાના ગામના વિકાસ માટે આગળ આવે તો તમમાં ગામડા શહેર ચઢીયાતા બની શકે છે.