ગામ વિકાસ કરે તો ગુજરાતની કાયાપલટ થાય, આ ગામ તો જુઓ તમામે તમામ સુવિધાઓથી છે સજ્જ
આ છે સાબરકાંઠાનું દરામલી ગામ
ગામમાં છે શહેરની તમામ સુવિધા
વિકાસની સતત ભરી રહ્યું છે હરણફાળ
ગુજરાતના ગામો હવે શહેર સાથે હરિફાઈ કરી રહ્યા છે.ત્યારે સાબરકાંઠા જિલ્લાના દરામલી ગામનું યાદીમાં જરૂર નામ આવે.આ ગામનો ખુબ વિકાસ થયો છે.અને ગામમાં શહેર જેવી તમામ સુવિધાઓ આપવામા આવી છે જે આંખે ઉડીને વળગે તેવી છે.
દરામલી ગામનો વિકાસ શહેરને પણ ઝાંખો પાડે
આગામી સમયમાં ગુજરાતમાં ગ્રામ સ્વરાજની ચૂંટણીઓ યોજાવાની છે.ત્યારે મોટાભાગના ગામડાઓમાં વિકાસની વાતો ચાલતી હોય છે.ત્યારે ગામે ગત વર્ષોમાં કેવા ઉમેદવારોને પસંદ કર્યા હતા અને તેમણે ગામનો કેવો વિકાસ કર્યો તે સૌકોઈ જાણવા માગે છે.આ દરામલી ગામનો વિકાસ શહેર જેવો થયો છે.દરામલી ગામ છેલ્લા દસ વર્ષથી સમરસ ગામ બનવાની સાથે-સાથે ભારતનું સૌપ્રથમ સ્કીલ વિલેજ ગામડું બની ચૂક્યું છે. દરામલી ગામમાં આજની તારીખે 10 વર્ષ પહેલાં શરૂ થયેલી સુવિધાઓ યથાવત છે ગામમાં વાઇફાઇ, 100 ટકા ઘરોમાં શૌચાલયો, સારા રસ્તા, ગટરલાઈનો, તમામ ચોરા પર સ્પીકર અને અન્ય તમામ સુવિધાઓ છે.
ગામમાં કેસલેસ પદ્ધતિથી તમામ કામગીરી
દરામલી ગામમાં પ્રવેશ કરવાની સાથે જ સમગ્ર ગામની સુંદરતા તેમજ સ્વચ્છતા દેખાય છે.મોટાભાગના ગામડાઓમાં હાલપણ રોડ રસ્તા પર ગટરના પાણી રેલાતા હોય અને ગામમાં દુર્ઘંધ મારતી હોય છે.ત્યારે દરામલી ગામ આજે પણ સુંદરતાનો પર્યાય બની રહ્યું છે.ગામની કોઈ પણ રજૂઆત હોય દરેક ગ્રામજનને સરળતાથી સાંભળી શકાય તે માટે સ્પીકર સિસ્ટમ લગાવેલ છે.સાથેસાથે ગામમાં કેસલેસ પદ્ધતિથી તમામ કામગીરી કરાય છે.ગામમાં ખાનગી બેંકની પણ સુવિધાઓ કરવામાં આવી છે.જોકે સૌથી મોટી વાત છે કે, દરામલી ગામમાં આરોગ્ય માટે આયુષ્યમાન ભારત અંતર્ગત તમામ સુવિધાઓ સાથેનું આરોગ્ય કેન્દ્ર પણ છે.જેના કારણે અડધી રાત્રે કોઈપણ ગામના લોકોને મુશ્કેલી પડે તો તેની સારવાર થઈ શકે છે.આસપાસના ગામના લોકો આ ગામ જેવી સુવિધા કરવા પોતાના સરપંચને દબાણ કરી રહ્યા છે.
કઈ કઈ સુવિધાઓ છે ગામમાં?
જોકે મોટાભાગના ગામડાઓમાં આજની તારીખે પણ સૌ ટકા રોડ, ગટર, પાણી તેમ જ લાઈટની સુવિધાઓ હોતી નથી.ત્યારે દરામલી ગામે સમરસ ગામ બની વિકાસની હરણફાળ ભરી છે.આ ગામના દ્રશ્યો જોઈને તમે અંદાજો લગાવી શકો છો કે ગામે ખરેખર ખુબ વિકાસ કર્યો છે.આ ગામ ભારતના સૌપ્રથમ સ્કીલ વિલેજ ગામ બનવાની સાથેસાથે ગ્રામ્ય વિકાસ માટે પાયાની સુવિધાઓ ઉભી કરી છે.ગામમાં સ્થાનિકોના વિકાસ માટે કોમ્યુનિટી હોલથી લઈ શહેરી સિસ્ટમ અનુરૂપ સુવિધાઓ વિકસાવી છે.સામાન્ય રીતે આજના શહેરીકરણના યુગમાં લોકો શહેર તરફ રહેવાનું પસંદ કરી રહ્યા છે ત્યારે દરામલી ગામમાં શહેર જેવી તમામ સુવિધાઓ છે.બાળકોને પણ સારુ શિક્ષણ મળી રહે છે જેના કારણે લોકો શહેર તરફ જવાનું ટાળી રહ્યા છે.
આમ આ ગામના લોકોની વાત સાંભળીને તમે સમજી ગયા હશો કે સારા માણસના હાથમાં સુકાન હોય તો શું ન કરી શકે.આ ગામના દ્રશ્યો જોઈને ગામમાં સુશાસન છે તેવુ સ્પષ્ટ પણે દેખાઈ રહ્યું છે.આ પ્રકારે તમામ ગામ વિકાસ કરે તો ગુજરાતની કાયાપલટ થઈ શકે છે.