મેમો આપવાનો ટાર્ગેટ પૂરો ના થાય કે ફરજ દરમિયાન ગંભીર બેદરકારી હોય કે પછી પોલીસની ડ્યૂટીમાં કોઈ કચાશ રહી જાય તો ઉચ્ચ અધિકારીઓ રૂ.૫૦૦થી લઈને આખા પગાર જેટલો દંડ ફટકારે છે.
પોલીસ અધિકારીઓની હિટલરશાહી
એક ભૂલ બદલ પણ પગાર જેટલો દંડ!
અમદાવાદના પોલીસ કર્મચારીઓ દર વર્ષે લાખો રૂપિયા દંડ ભરવા મજબૂર
ટ્રાફિક સિગ્નલનો ભંગ કરીને જાઓ અથવા હેલ્મેટ કે સીટ બેલ્ટ પહેર્યો ના હોય અને કારમાં બ્લેક ફિલ્મ હોય ત્યારે પોલીસ કર્મચારીઓ વાહનચાલકોને દંડ કરે છે. આ સિવાય હાલ કોરોના મહામારી ચાલી રહી છે ત્યારે માસ્ક નહીં પહેરનારને પણ પોલીસ દંડ કરતી હોય છે. પોલીસની આ કામગીરીને લોકો પોતપોતાની નજરે જુએ છે, જેમાં કેટલાક લોકો તોડબાજ તો કેટલાક લોકો લાંચિયા પોલીસ કર્મચારીઓ કહે છે. શું લોકોને ખબર છે કે જ્યારે પોલીસ વાહનચાલકો પાસેથી દંડ ના લે તો પોલીસના ઉચ્ચ અધિકારીઓ તેમને પ૦૦થી લઈને પગાર જેટલો દંડ કરે છે.
પોલીસ કર્મચારીઓ ૩૬પ દિવસ કોઈ પણ પ્રકારની ચિંતા કર્યા વગર શહેરની સુરક્ષા કરે છે, જેના કારણે અમદાવાદીઓ રાતે શાંતિથી સૂઈ શકે છે. કોરોના વાઈરસની મહામારી હોય કે પછી કોઈ પણ તહેવાર હોય, પોલીસ કર્મચારીઓ ખડેપગે પોતાની ડ્યૂટી કરે છે. કોઈ પણ પોલીસ કર્મચારી પોતાની ડ્યૂટી પર હોય ત્યારે તેમનાથી ક્યાંક ને ક્યાંક નાની-મોટી ભૂલ થતી હોય છે, જેના પરિણામરૂપે ઉચ્ચ અધિકારીઓ તેમને દંડ કરતા હોય છે અથવા તો સસ્પેન્ડ કરતા હોય છે.
દંડ વસૂલ કરવા માટે પોલીસને આપવામાં આવે છે ટાર્ગેટ
પોલીસ પર કામનું ભારણ હોવાના કારણે મોટા ભાગના પોલીસ કર્મચારીઓ ડિપ્રેશનમાં પણ આવી ગયા છે ત્યારે ઉચ્ચ અધિકારીઓના પ્રેશરના કારણે પોતાની ડ્યૂટીમાં કોઈ ને કોઈ ભૂલ કરે છે. દિવાળી નજીક આવી રહી છે ત્યારે પોલીસને કેટલીક સ્પેશિયલ જવાબદારીઓ પણ આપવામાં આવી છે, જેમાં ભીડભાડવાળી જગ્યા પર ફૂટ પેટ્રોલિંગ, વાહન ચેકિંગ જેવા અનેક મુદ્દા છે. સાંજ થાય એટલે પોલીસ રોડ પર તહેનાત થઈ જાય છે અને લોકોને દંડવાનું શરૂ કરી દે છે. માસ્ક ના પહેર્યું હોય, સીટ બેલ્ટ ના બાંધ્યો હોય કે ટ્રાફિકના કોઈ પણ નિયમનો ભંગ કર્યો હોય તો પોલીસ વાહનચાલક પાસેથી તગડો દંડ વસૂલ કરે છે.
દંડ વસૂલ કરવા માટે પોલીસને એક ટાર્ગેટ આપ્યો છે, જો પોલીસ કર્મચારીઓ તે ટાર્ગેટને પૂરો ના કરી શકે તો ઉચ્ચ અધિકારીઓ તેમને આકરા શબ્દોમાં ઠપકો આપે છે, નહીં તો તેમને દંડ કરે છે અને દંડનો મેમો પણ આપવામાં આવે છે. ગુજરાત પોલીસ મેન્યુઅલ પ્રમાણે જો કોઈ પોલીસ કર્મચારીની કોઈ પણ પ્રકારની ભૂલ થઈ ગઈ હોય તો તેમને વધુમાં વધુ પ૦ રૂપિયાનો દંડ થાય તેવી જોગવાઈ છે, પરંતુ છેલ્લા કેટલાય સમયથી આ નિયમની ઐસીતૈસી થઈ રહી છે. ઉચ્ચ અધિકારીઓ પોલીસ કર્મચારીઓને પ૦૦ રૂપિયાથી લઇને પગાર સુધીનો દંડ કરી રહ્યા છે.
મેચમાં કોહલી પાસે દોડી આવેલા યુવકના લીધે પીએસઆઇને પગાર જેટલો દંડ થયો
અમદાવાદના નરેન્દ્ર મોદી મોટેરા સ્ટેડિયમ પર થોડા સમય પહેલાં રમાયેલી ભારત-ઇંગ્લેન્ડ વચ્ચેની ટેસ્ટના પ્રથમ દિવસે એક યુવક બબલ તોડી મેદાનમાં વિરાટ કોહલીને મળવા દોડી ગયો હતો. કોહલીને મળવા દોડી ગયેલા આ પ્રેક્ષકની મેદાનમાં ઘૂસણખોરીના કારણે મેચમાં વિઘ્ન સર્જાયું હતું, જોકે બાઉન્સરોએ આ યુવકને પકડી પોલીસના હવાલે કર્યો હતો. આ ઘટના તમામને ખબર હતી, પરંતુ ત્યારબાદ શું થયું તે કોઈને ખબર નથી. યુવક જે જગ્યાએથી ગ્રાઉન્ડમાં ઘૂસ્યો હતો ત્યાં ફરજ બજાવતા એક પીએસઆઇની બેદરકારી માનીને અધિકારીઓએ તેમને પગાર જેટલો દંડ કર્યો છે.
પે-ગ્રેડ મામલે આંદોલન કરી રહી છે પોલીસ
પે-ગ્રેડ મામલે છેલ્લા ઘણા સમયથી વિવાદ ચાલી રહ્યો છે, જેમાં ગૃહપ્રધાન હર્ષ સંઘવી અને પોલીસના ઉચ્ચ અધિકારીઓની મિિટંગનો પણ દોર શરૂ થયો છે. પે-ગ્રેડ મામલે આંદોલન વધુ ને વધુ ઉગ્ર બને તેવી શક્યતા છે. આ આંદોલને રાજકીય સ્વરૂપ પકડી લીધું છે, જેમાં પોિલિટકલ પાર્ટી તેમજ એનજીઓ પોલીસના સમર્થનમાં આવ્યાં છે. ગાંધીનગર સહિત અમદાવાદ, સુરત તથા રાજકોટમાં પણ પોલીસના સમર્થનમાં અનેક સંગઠન આગળ આવી રહ્યાં છે. વિરોધ પક્ષના નેતા પરેશ ધાનાણીએ પણ મુખ્યપ્રધાનને પત્ર લખી પોલીસની માગને સ્વીકારવા માટે રજૂઆત કરી છે, જ્યારે બીજી તરફ ગાંધીનગરમાં પોલીસ કર્મચારી તથા તેમના પરિવાર પણ પહોંચી ગયા છે, જ્યારે નવરંગપુરાનાં મહિલા કોન્સ્ટેબલે ચાલુ નોકરીએ જ અન્નજળનો ત્યાગ કરી દીધો છે.