સમર્થન / લોકસભામાં ત્રિપલ તલાક બિલ રજૂ, કોંગ્રેસે કર્યો વિરોધ

ઉલ્લેખનીય છે કે સરકારે પાછલા કાર્યકાળમાં પણ ત્રિપલ તલાક બિલ રજૂ કર્યું હતું.  જોકે રાજ્યસભામાં તે પાસ નહોતું થઈ શક્યું. મોદી સરકારના આ બિલને એક તરફ સમર્થન મળી રહ્યું છે તો બીજી તરફ તેનો વિરોધ પણ થઈ રહ્યો છે. ત્યારે તમને જણાવી દઇએ કે લોકસભામાં ત્રિપલ તલાક બિલનાં સમર્થનમાં જે વોટિંગ થયું તેમાં ત્રિપલ તલાકનાં સમર્થનનાં પક્ષમાં 186 મત પડ્યાં અને આ બિલનાં વિરોધમાં 74 મત પડ્યાં. ગત વર્ષે ડિસેમ્બરમાં આ બિલ લોકસભામાં પાસ થઈ ગયું હતું. જો કે રાજ્યસભામાં સંખ્યાબળ ઓછું હોવાથી બિલ પાસ ન થઈ શક્યું.

વિપક્ષની માગ હતી કે તેને પુનઃ નિરીક્ષણ માટે સંસદની પસંદગી સમિતિ પાસે મોકલવામાં આવે જોકે સરકારે તે માંગ ફગાવી દીધી હતી. જો કે આ વખતે પણ ભલે નીતિશ કુમારની જેડીયુ બિહારમાં ભાજપની સાથે ગઠબંધનમાં હોય પણ ત્રિપલ તલાક મામલે રાજ્યસભામાં NDAને સમર્થન નહીં કરે. જ્યારે કોંગ્રેસ પણ ત્રિપલ તલાક મામલે વિરોધનું એલાન કરી ચૂક્યું છે. કોંગ્રેસનું કહેવું છે કે બિલમાં કેટલાક મામલે ચર્ચાની જરૂર છે.

કોંગ્રેસના નેતા અભિષેક મનુ સંઘવીએ કહ્યું કે ત્રિપલ તલાક બિલ પર કોંગ્રેસે કેટલાક બુનિયાદી મુદ્દા ઉઠાવ્યાં છે, જેના પર સરકાર કેટલાક પર રાજી છે. અભિષેક મનુ સંઘવીએ કહ્યું કે જો સરકારે પહેલાથી અમારી વાત માની લીધી હોત તો ઘણો સમય બચી જાત. ઉલ્લેખનીય છે કે કેન્દ્રીય કેબિનેટે બુધવારે જ મુસ્લિમ મહિલા વિધેયક, 2019ને મંજૂરી આપી દીધી છે. આ ફેબ્રુઆરીમાં લાવવામાં આવેલા અધ્યાદેશની જગ્યા લેશે.