મહામારી / ટેક હોમ સેલેરીમાં ઘટાડો, PF માં વધારો, કેન્દ્રના નિર્ણયથી કર્મચારીઓ પર પડશે આ અસરો, ફટાફટ જાણી લેજો

• આગામી એક-બે મહિનામાં ચાર નવા લેબર કોડનો અમલ થવાની શક્યતા
• કેન્દ્ર સરકારે ચાર લેબર કોડનો અમલ કરવાની તૈયારી આદરી
• ટેક હોમ સેલેરી ઘટી જશે, જોકે પીએફમાં યોગદાન વધી જશે

નવા લેબર કોડ લાગુ પડવાને કારણે કર્મચારીઓના મૂળ પગાર અને ભવિષ્ય નિધિની ગણતરીની રીતમાં ઘણો ફેરફાર આવી જશે. કેન્દ્રીય શ્રમ અને રોજગાર મંત્રાલય ચાર લેબર કોડ, ઓદ્યોગિક સંબંધ, વેતન, સામાજિક સુરક્ષા, વ્યાવસાયિક અને સ્વાસ્થ્ય સુરક્ષા તથા કાર્યસ્થિતિને 1 એપ્રિલ 2021 થી લાગુ પાડવાની હતી. મંત્રાલયે આ લેબર કોડને અંતિમ રુપ પણ આપી દીધું હતું પરંતુ તેનો અમલ થઈ શક્યો નહોતો. કારણ કે ઘણા રાજ્યો આ નિયમોને અધિસૂચિત કરવાની સ્થિતિમાં નહોતા. 

રાજ્યોએ લેબર કોડને અંતિમ ઓપ આપી ન શક્યા હોવાને કારણે કેન્દ્રે નિર્ણય અટકાવવો પડ્યો 

સૂત્રોના જણાવ્યાનુસાર ઘણા મુખ્ય રાજ્યોએ આ ચાર લેબર કોડ હેઠળ નિયમોને અંતિમ ઓપ આપ્યો નથી. કેટલાક રાજ્યો આ કાયદાઓના અમલીકરણ માટે નિયમોને અંતિમ ઓપ આપવાની પ્રક્રિયામાં છે. રાજ્યો આ નિયમોને અંતિમ સ્વરુપ આપે ત્યાં સુધી કેન્દ્ર સરકાર રાહ જોઈ શકતી નથી. તેથી આગામી એક-બે મહિનામાં આ નવા ચાર કાયદાને લાગુ પાડવાની કેન્દ્ર સરકારની યોજના છે. જોકે કંપનીઓ અને સંસ્થાઓને નવા કાયદાઓ સાથે સુસંગત બનવા થોડો સમય આપવો પડશે.

નવા લેબર કોડ અનુસાર ભથ્થાઓને 50 ટકા સુધી સીમિત રખાશે

કેટલાક રાજ્યોએ નિયમોનો ડ્રાફ્ટ બહાર પાડી દીધો છે. આ રાજ્યોમાં યુપી, બિહાર, મધ્યપ્રદેશ, હરિયાણા, ઓડિશા, પંજાબ, ગુજરાત, કર્ણાટક અને ઉત્તરાખંડ સામેલ છે. નવા લેબર કોડ અનુસાર ભથ્થાઓને 50 ટકા સુધી સીમિત રાખવામાં આવશે. અર્થાત, કર્મચારીઓના કુલ વેતનના 50 ટકા મૂળ વેતન હશે. ભવિષ્ય નિધિની ગણતરી મૂળ વેતનની ટકાવારીને આધારે થાય છે તેમાં મૂળ વેતન અને મોંઘવારી ભથ્થું સામેલ છે. 

નવા લેબર કોડમાં પીએફ યોગદાન 50 ટકાના હિસાબે નક્કી કરાશે 

હાલમાં માલિકો કર્મચારીઓના વેતનને ઘણા ભાગોમાં વિભાજીત કરી નાખે છે જેનાથી ભવિષ્ય નિધિ તથા આયકરમાં પણ યોગદાન ઘણું ઓછું રહે છે. નવા લેબર કોડમાં ભવિષ્ય નિધિ યોગદાન કુલ વેતનના 50 ટકાના હિસાબે નક્કી કરવામાં આવશે.