કોરોના વાયરસનાં કારણે દેશમાં દિવસેને દિવસે કેસમાં વધારો થઇ રહ્યો છે. સ્વાસ્થ્ય મંત્રાલય અનુસાર ભારતમાં દર ચોથા દિવસે કોરોના વાયરસના કેસ ડબલ થઇ રહ્યા છે. ભારત સરકાર દ્વારા કોરોના વાયરસ સામે લડવા માટે સતત કડક પગલાં લેવાઈ રહ્યા છે ત્યારે સરકાર પર ટેસ્ટનાં આંકડાઓને સવાલ પણ ઉભા કરવામાં આવી રહ્યા છે. ત્યારે હવે ICMRએ 7 લાખ રેપિડ એન્ટિ-બોડી ટેસ્ટિંગ કિટ્સનો ઓર્ડર આપી દીધો છે.
હોટસ્પોટ વિસ્તારોમાં વધુમાં વધુ ટેસ્ટ કરવામાં આવશે
પહેલાં તબક્કામાં 5 લાખ કિટ મળશે
ભારતમાં જે દરે કોરોના વાયરસનું ટેસ્ટિંગ કરવામાં આવે છે તે અન્ય દેશની સરખામણીમાં ખૂબ ઓછા છે. ઓછા લોકોનું ટેસ્ટિંગ થતું હોવાથી કોરોનાના સંક્રમણનો ખતરો વધી જાય છે. ત્યારે હવે સરકારે વધુમાં વધુ ટેસ્ટ કરવા માટે પ્લાન બનાવ્યો છે. દેશનાં જે વિસ્તારોમાં કોરોના વાયરસનું સંક્રમણ વધારે છે ત્યાં આ કિટની મદદથી વધુ ટેસ્ટ કરવામાં આવશે.
ICMRએ કોરોના વાયરસ સામે લડવા માટે 7 લાખ રેપિડ એન્ટિબોડી ટેસ્ટિંગ કિટ્સનો ઓર્ડર આપી દીધો છે. દેશનાં જે વિસ્તારોને હોટસ્પોટ જાહેર કર્યા છે તે વિસ્તારોમાં મોટા પ્રમાણમાં કોરોના વાયરસનો ટેસ્ટ કરવામાં આ કિટથી મદદ મળશે.
Indian Council of Medical Research (ICMR) દ્વારા જણાવવામાં આવ્યું છે કે આ ઓર્ડર તેમને અલગ અલગ તબક્કામાં પ્રાપ્ત થશે. જેમાં પહેલાં તબક્કામાં 5 લાખ કિટ મળવાની સંભાવના છે. તથા આઠમી એપ્રિલ સુધી ICMR પાસે 7 લાખ કિટ હશે.
ગુજરાતમાં પણ કોરોના વાયરસના કેસ સતત વધી રહ્યા છે. કેન્દ્ર સરકાર દ્વારા જાહેર કરવામાં આવેલ હોટસ્પોટ વિસ્તારોની યાદીમાં અમદાવાદનું પણ નામ છે. અમદાવાદના ઘણા વિસ્તારોને ક્લસ્ટર કૉરોન્ટાઇન કરવામાં આવ્યા છે તથા બિનજરૂરી લોકોની અવર જવર પર પણ રોક લગાવવામાં આવી છે.