કેન્દ્રીય આરોગ્ય અને કુટુંબ કલ્યાણ મંત્રાલયે ઇલેક્ટ્રોનિક્સ અને આઇટી મંત્રાલય સાથે 'કોવિન' ચેલેન્જ શરૂ કરવાની જાહેરાત કરી છે. આ ચેલેન્જ કોવિડ વેક્સિન ઇન્ટેલિજન્સ નેટવર્ક (CoWIN) ની સિસ્ટમ મજબૂત બનાવવા માટે શરૂ કરાઈ છે. તે એક ડિજિટલ પ્લેટફોર્મ હશે જેનો ઉપયોગ રાષ્ટ્રવ્યાપી કોરોના રસી વિતરણ પ્રણાલીને આયોજવા માટે કરવામાં આવશે. નોંધનીય છે કે આ સોફ્ટવેર અને સિસ્ટમ દેશમાં કોરોના રસીના પ્રભાવી વિતરણ માટે બનાવવામાં આવ્યું છે.
મોદી સરકારે શરૂ કરી ઓપન ચેલેન્જ
રસીકરણ કાર્યક્રમ માટે CoWIN સોફ્ટવેર બનાવ્યું
સોફ્ટવેરને મજબૂત બનાવવા માટે સરકારે જાહેર કરી ઓપન ચેલેન્જ
મળતી માહિતી મુજબ આ ગ્રાન્ડ ચેલેન્જ સ્પર્ધાના વિજેતાઓને કુલ 3.85 કરોડ રૂપિયાની ભેટ મળશે. કેન્દ્રીય મંત્રી રવિશંકર પ્રસાદે આ અંગે જણાવ્યું હતું કે, 'કોવિડ -19 સામેની અમારી લડતમાં ભારતના ઈનોવેટર્સે ખૂબ મહત્વની ભૂમિકા ભજવી છે. દેશભરમાં શરૂ થઈ રહેલા રસીકરણ કાર્યક્રમ માટે કોવિન પ્લેટફોર્મને મજબૂત બનાવવા માટે શરૂ કરાયેલા આ ગ્રાન્ડ ચેલેન્જમાં ભાગ લેવા માટે હું દેશના તમામ ઈનોવેટર્સ અને સ્ટાર્ટઅપ્સને આમંત્રણ આપું છું. '
વધુમાં રવિશંકર પ્રસાદે કહ્યું કે નવીન સ્ટાર્ટઅપ્સ અને ઉભરતા ટેક એક્સપર્ટસને આ ચેલેન્જમાં ભાગ લેવા આમંત્રણ અપાયું છે. રસ ધરાવતા લોકો આ વેબસાઇટ પર રજીસ્ટ્રેશન કરાવી શકે છે. મહત્વનું છે કે આ ચેલેન્જના રજીસ્ટ્રેશન 23 ડિસેમ્બરથી શરૂ થશે અને તેની અંતિમ તારીખ 15 જાન્યુઆરી સુધીની હશે. ટોચના પાંચ રજીસ્ટ્રેશન કરવાવાળાને CoWIN API (એપ્લિકેશન પ્રોગ્રામિંગ ઇંટરફેસ) પ્રદાન કરવામાં આવશે, જે પ્લેટફોર્મ સાથે તેમના આઇડિયાની અસરકારકતાને પ્રભાવી બનાવશે.
આ અંગે પ્રેસ ઇન્ફર્મેશન બ્યુરો PIB દ્વારા જારી કરાયેલા જાહેરનામા મુજબ, આ તબક્કા માટે પસંદ કરાયેલા તમામ લોકોને બે લાખ રૂપિયા જીતવાની તક મળશે. એકવાર અરજદારોના આઇડિયાને ઓપન API દ્વારા પ્લેટફોર્મ સાથે મર્જ કર્યા પછી, તેની મજબૂતાઈ અને માપનીયતાનું મૂલ્યાંકન કરવામાં આવશે. આ ચેલેન્જના ટોચના બે સ્પર્ધકોને અનુક્રમે 40 લાખ અને 20 લાખ રૂપિયાના ઇનામ મળશે.
સરકાર ટેકનોલોજીનો કરવા માંગે છે ભરપૂર ઉપયોગ
મહત્વનું છે કે આ સોફ્ટવેર દ્વારા સરકાર કોવિડ વેક્સિન ની વિતરણ પ્રણાલીમાં ટેકનોલોજીનો ભરપૂર ઉપયોગ કરવા માંગે છે, જે હેતુની આપૂર્તિ માટે સ્પેશિયલ આ સોફ્ટવેર અને સિસ્ટમ બનાવવામાં આવી છે અને હવે જ્યારે થોડા દિવસોમાં વેકસિનેશન પ્રોગ્રામની શરૂઆત થવાની શક્યતાઓ છે ત્યારે સરકાર આ સોફ્ટવેર ની સિક્યુરિટી અને ઉપયોગિતા ચકાસવા માટે તેની ગ્રાન્ડ ઓપન ચેલેનજનું આયોજન કરી રહી છે.