ઈ-કોમર્સ સેગમેન્ટમાં ફ્લિપકાર્ટ અને અમેઝોન જેવી કંપનીઓના વર્ચસ્વને પડકારવા સરકારે એક નવા જ પ્રકારની ઈ-શોપ ONDC ઓપન કરી છે.
નાના દુકાનદારો માટે સરકારે ઓપન કરી નવી ઈ-શોપ
અનેક નાના દુકાનદારોને થશે મોટો ફાયદો
દેશના 5 શહેરોમાં પાયલોટ પ્રોજેક્ટ શરૂ
આજના આ આધુનિક યુગમાં હવે ડિજિટલ ટ્રાન્ઝેક્શનનું પ્રમાણ વધારે વધી ગયું છે. ત્યારે હવે ડિજિટલ ઈન્ડિયા હેઠળ મોદી સરકાર તમામ ઈ-કોમર્સ કંપનીઓને ટક્કર આપવા પોતાનું એક પ્લેટફોર્મ (Govt Ecommerce Platform) લાવી રહી છે. આથી જો તમે પણ માત્ર એમેઝોન અથવા તો ફ્લિપકાર્ટ પરથી જ સામાન ખરીદો છો, તો હવે તમને સરકારી વિકલ્પ પણ મળવાનો છે. સરકારે શુક્રવારે દિલ્હી NCR, બેંગલુરુ, ભોપાલ, શિલોંગ અને કોઈમ્બતુરના પાંચ શહેરોમાં ઓપન નેટવર્ક ફોર ડિજિટલ કોમર્સ (ONDC) ના પાયલોટ તબક્કાની શરૂઆત કરી છે. સરકારને આશા છે કે આ પણ UPI જેવી ક્રાંતિ લાવવામાં મહત્વનું સાબિત થશે.
ONDCથી દેશમાં એવાં કરોડો દુકાનદારોને લાભ થશે
સરકારના આ પ્રયાસથી દુકાનદારોના વેપાર કરવાના ખર્ચમાં ઘટાડો થશે. ONDC થી દેશમાં એવાં કરોડો દુકાનદારોને લાભ થશે કે જે અત્યાર સુધી ઇ-કોમર્સ સિસ્ટમનો લાભ નથી લઇ શક્યાં. હાલમાં ઇ-કોમર્સ સેક્ટરમાં અમેઝોન-ફ્લિપકાર્ટ જેવી કંપનીઓનો દબદબો છે. આ જ કારણોસર દેશના 6 કરોડ વેપારીઓમાંથી કેટલાંક વેપારીઓ જ આ પ્લેટફોર્મ પર પોતાના ઉત્પાદન વેચી શકે છે.
ONDC માટે 9 સભ્યોની સલાહકાર પરિષદનું બંધારણ
એ માટે સરકારે નવ સભ્યોની સલાહકાર સમિતિની રચના કરી છે. તેમાં ઈન્ફોસિસના નંદન નીલેકણી અને નેશનલ હેલ્થ ઓથોરિટીના ચીફ એક્ઝિક્યુટિવ ઓફિસર (CEO) આરએસ શર્માનો પણ સમાવેશ થાય છે. સમિતિની રચનાનો હેતુ ONDCની સ્વીકાર્યતા અને તેને ઝડપથી પ્રમોટ કરવાની રીતો શોધવાનો છે.
આ 5 શહેરોમાં પાયલોટ પ્રોજેક્ટ શરૂ
ONDC ને આજે પસંદગીના ગ્રાહકો, વિક્રેતાઓ અને લોજિસ્ટિક્સ પ્રદાતાઓ માટે લોન્ચ કરવામાં આવ્યું હતું. તાજેતરમાં જ દિલ્હી NCR, બેંગલુરુ, ભોપાલ, શિલોંગ અને કોઈમ્બતુરમાં 150 રિટેલર્સને જોડવાનું લક્ષ્ય છે. આ પહેલનો હેતુ બે મોટી બહુરાષ્ટ્રીય ઈ-કોમર્સ કંપનીઓના વર્ચસ્વને રોકવાનો છે. આ કંપનીઓ દેશના અડધાથી વધુ ઈ-કોમર્સ વ્યવસાયને નિયંત્રિત કરે છે, બજારમાં પ્રવેશ મર્યાદિત કરે છે, થોડા વેચાણકર્તાઓને પ્રાધાન્ય આપે છે અને સપ્લાયર્સના માર્જિનને ઘટાડે છે.
કામ ખૂબ જ તેજીથી ચાલી રહ્યું છે
આ અંગે વિગતો આપતા ઉદ્યોગ અને આંતરિક વેપારના પ્રમોશન વિભાગ (DPIIT) ના અધિક સચિવ અનિલ અગ્રવાલે જણાવ્યું કે, ONDC એ ધોરણોનો સમૂહ છે કે જે વિક્રેતાઓ અથવા લોજિસ્ટિક્સ પ્રદાતાઓ અથવા તો પેમેન્ટ ગેટવે સ્વેચ્છાએ અપનાવી શકે છે. તાજેતરમાં જ 80 કંપનીઓ ONDC સાથે કામ કરી રહી છે અને તેઓ એકીકરણના વિવિધ તબક્કામાં છે. આ કંપનીઓ વેચાણકર્તાઓ, ખરીદદારો, લોજિસ્ટિક્સ અથવા પેમેન્ટ ગેટવે માટે પોતાની App બનાવી રહી છે.
જાણો કેવી રીતે કામ કરશે ONDC?
ONDC હેઠળ ખરીદનાર અને વેચનાર એક જ પ્લેટફોર્મ પર હોવા જરૂરી નથી. આ સાથે અન્ય પ્લેટફોર્મ પર કોઈ પણ વ્યવસાયિક વ્યવહાર (બિઝનેસ ટ્રાન્ઝેક્શન) કરવા માટે ખરીદનાર અને વિક્રેતાને એક જ પ્લેટફોર્મ પર હોવા જરૂરી છે. આ અંતર્ગત બિઝનેસ અને ગ્રાહક પોતાની પસંદગીના કોઈ પણ પ્લેટફોર્મનો ઉપયોગ કરીને વ્યવહાર કરી શકશે. એમેઝોન, ફ્લિપકાર્ટ, બિગબાસ્કેટ, ગ્રોફર્સ અને ઝોમેટો જેવાં તમામ પ્લેટફોર્મને DPIIT અને QCI દ્વારા બનાવવામાં આવેલા પ્લેટફોર્મ પર નોંધણી કરાવવાની રહેશે.