રાહત / નેચરલ ગેસના ભાવમાં 12% નો ઘટાડો, અઢી વર્ષમાં પહેલી વખત ઘટી કિંમતો

• ગ્રાહકોને મળી શકે છે નેચરલ ગેસની કિંમતોમાં ઘટાડાના ફાયદો
• ફેસ્ટિવલ સિઝનમાં ઘટી શકે છે કુકિંગથી લઇને સીએનજી ગેસની કિંમતો

સરકારે અઢી વર્ષમાં પ્રથમ વાર ડોમેસ્ટિક નેચરલ ગેસના ભાવમાં ૧૨ ટકા કરતાં વધુ ઘટાડો કર્યો છે. પેટ્રોલિયમ મંત્રાલયના પેટ્રોલિયમ પ્લાનિંગ એન્ડ એનાલિસિસ સેલ (પીપીએસઇ)ના જણાવ્યા અનુસાર સરકારી કંપનીઓ ઓએનજીસી અને ઓઇલ ઇન્ડિયા લિ. દ્વારા ઉત્પાદિત નેચરલ ગેસની કિંમત ૩.૯૬ ડોલરથી ઘટીને પ્રતિ મિલિયન બ્રિટિશ થર્મલ યુનિટ (એમબીટીયુ) ૩.૨૩ ડોલર પર આવી ગઇ છે. આ ઘટાડાયેલી કિંમત ૧ ઓક્ટોબરથી લાગુ થઇને છ માસ સુધી રહેશે. 

આ બંને સરકારી કંપનીઓનું ભારતના વર્તમાન ગેસ ઉત્પાદનમાં મોટું યોગદાન છે.  એ જ રીતે સરકારે મુશ્કેલ ક્ષેત્રોમાંથી ઉત્પાદિત ગેસના ભાવ ૯.૩૨ ડોલરથી ઘટાડીને પ્રતિ એમબીટીયુ ૮.૪૩ ડોલર કર્યા છે, જેવા કે રિલાયન્સ ઇન્ડસ્ટ્રીઝના અર્ધવિકસિત કેજી ડી૬ બ્લોક માટેના ભાવમાં કોઇ ફેરફાર કર્યો નથી.

નેચરલ ગેસના ભાવમાં ૧૨ ટકાનો ઘટાડો થતાં હવે સીએનજી અને પીએનજી પણ સસ્તા થશે. નેચરલ ગેસનો સીએનજીમાં કન્વર્ટ કરીને ઇંધણ તરીકે વાહનોમાં અને કૂકિંગ ગેસમાં કન્વર્ટ કરીને ઘરમાં ઉપયોગ કરાય છે. નેચરલ ગેસની કિંમત દર છ મહિને ૧ એપ્રિલ અને ૧ ઓક્ટોબરના રોજ નિર્ધારિત થાય છે.

ઘરેલુ સ્તરે ઉત્પાદિત નેચરલ ગેસની કિંમત ઘટવાથી હવે સીએનજી અને ઘરમાં રસોઇ માટે ઉપયોગમાં લેવાતા પાઇપ્ડ નેચરલ ગેસ (પીએનજી)ની કિંમત પણ ઘટશે. આ ઉપરાંત નેચરલ ગેસનો ઉપયોગ ખાતરના ઉત્પાદન અને વીજળી બનાવવામાં થાય છે અને તેના પરિણામે ખાતર અને પેટ્રોકેમિકલ્સને બનાવવાના ફીડ સ્ટોક ખર્ચમાં પણ ઘટાડો થશે. 

નેચરલ ગેસની કિંમત છેલ્લે ૧ એપ્રિલના રોજ વધારવામાં આવી હતી. મોદી સરકાર સત્તારૂઢ થયા બાદ પુરોગામી યુપીએ સરકાર દ્વારા મંજૂર ગેસ પ્રાઇસિંગ ફોર્મ્યુલાને રદ કરી હતી.