દારૂબંધી / અમારે એવા પૈસા નથી જોઈતા : દારૂબંધી પર નીતિન પટેલના નિવેદનના રાજ્યપાલે કર્યા વખાણ, જાણો શું કહ્યું

• ગુજરાતમાં દારૂબંધીને રાજ્યપાલનું સમર્થન
• રાજ્યપાલ આચાર્ય દેવવ્રતે DyCMની વાતને આપ્યું સમર્થન
• દારબંધીના ધજાગરા ઉડાવતા બે કિસ્સા સામે આવ્યા

ગુજરાત રાજ્યમાં દારૂબંધી હોવા છતાં અનેકવાર દારૂની રેમછેલ જોવા મળે છે ત્યારે દારૂબંધી પર નાયબ મુખ્યમંત્રીએ આપેલા નિવેદન પર ગુજરાતના રાજ્યપાલ આચાર્ય દેવવ્રત દ્વારા સર્મથન આપવામાં આવ્યું છે. 

રાજ્યપાલ આચાર્ય દેવવ્રતે DyCMની વાતને આપ્યું સમર્થન

રાજ્યપાલ આચાર્ય દેવવ્રતે કહ્યું કે ગુજરાતમાં સહિષ્ણૂતા અને ભાઈચારો છે તેનું કારણ દારબંધી છે, રાજ્યપાલે નીતિન પટેલની વાતને રજૂ કરતા કહ્યું કે કોઈએ DyCMને પુછ્યુ હતું કે અન્ય રાજ્યોમાં દારૂના ટેક્સથી કરોડોની આવક થઈ રહી છે, તમે કેમ નથી શરૂ કરતા દારૂ તો નીતિન પટેલના જવાબમાં કહ્યું કે અમારે એવા પૈસા નથી જોઈતા, જેને લઈ રાજ્યપાલે DyCMને અભિનંદન પાઠવ્યા હતા. રાજ્યપાલે વધુમાં જણાવ્યું કે વ્યસન સમાજમાં નુકસાન કરે છે, દારૂ સમાજને બગાડવાનું કામ કરે છે સારું છે ગુજરાતમાં દારૂ બંધી છે.

દારૂબંધી માટે સરકાર ટેક્ષની આવક જતી કરશે : DyCM  

મહત્વનું છે કે દારૂબંધી માટે ટેક્સની આવક ગુમાવવા પણ તૈયાર તેવું DyCM નીતિન પટેલે થોડા દિવસ અગાઉ નિવેદન આપ્યું હતું. રાજ્યમાં દારૂબંધી વિશે નીતિન પટેલે એવું પણ કહ્યું હતું કે આપણું ગુજરાત દારૂબંધીને વરેલું છે, દારૂબંધી માટે રાજ્યએ મોટી આવક જતી કરવી પડે તો પણ અમે જતી કરવા તૈયાર છે. રાજ્યનું ગૃહવિભાગ દારૂબંધીના નિયમોના ઉલ્લંઘન પ્રત્યે કડક વલણ અપનાવે છે. આપ સૌને ખ્યાલ છે કે ગૃહ વિભાગની એક સિસ્ટમ છે કે જે - તે પોલીસ સ્ટેશનની હદમાંથી દારૂ પકડાય તો ત્યાંના પોલીસ ઈન્સ્પેક્ટરની બદલી કરી દેવામાં આવે છે. તેમણે નિવેદન દરમિયાન ભાર આપીને કહ્યું હતું કે સરકાર દારૂબંધી માટે ટેક્ષની આવક પણ જતી કરવા તૈયાર છે. 

ભાવનગર મનપા કર્મીની ઓફિસમાંથી મળ્યો દારૂ

ઉલ્લેખનિય કે ગુજરાતમાં દારૂબંધીની માત્ર પોકળ વાતો થતી હોય તેવો કિસ્સો સામે આવતા હોય છે ત્યારે આજે વધુ બે કિસ્સોઓ સામે આવ્યો છે જેમાં ભાવનગરના મનપા કર્ચમારીની ઓફિસમાંથી દારૂની બોટલ મળી આવી છે, આ કર્મચારી અકવાળા તળાવ ખાતે આવેલી ઓફિસમાં ફરજ બજાવે છે, મહાનગરપાલિકાના કર્મચારીની ઓફિસમાં દારૂની બોટલનો ફોટો અને વીડિયો હાલ વાયરલ થયો છે. 

અરવલ્લીમાં BJPના પૂર્વ MLA પુત્ર સામે વિદેશી દારૂના વેચાણ મામલે ફરિયાદ 

જ્યારે વધુ એક અન્ય કિસ્સામાં અરવલ્લીમાં ભાજપના પૂર્વ ધારાસભ્યના પુત્ર સામે વિદેશી દારૂના વેચાણ મામલે ફરિયાદ નોંધાઈ છે. પૂર્વ ધારાસભ્ય ઉદેસિંહ ઝાલાના પુત્ર મનુસિંહ ઝાલા સામે પ્રોહિબિશન એક્ટ હેઠળ ગુનો દાખલ કરાયો છે.  મહત્વનું છે કે પોલીસે જીવાકલાની મુવાડી ગામે ધારાસભ્યના પુત્ર દ્વારા ચલાવાતા દારૂના અડ્ડા પર દરોડા પાડી  5 હજારના વિદેશી દારૂ સાથે ઝડપી પાડ્યો છે. જ્યારે  BJPના પૂર્વ MLA પુત્ર મનુસિંહ ઝાલા ફરાર થઈ જતા પ્રોહિબિશન એક્ટ હેઠળ ગુનો દાખલ કરાયો છે, મહત્વનું છે કે બુટલેગરના ભાઈ વિષ્ણુસિંહ ઝાલા ભાજપના જિલ્લા પંચાયતના નેતા હોવાનું પણ મનાઈ છે.