સરકારી વાહનો-મશીનરીઓનો ગેરકાયદેસર દુરૂપયોગ મામલો રફેદફે કરવા પ્રયાસ

જામનગરઃ સરકારી વાહનો અને મશીનરીઓના ગેરકાયદેસર દુરૂપયોગની ઘટનાઓ સામે આવી છે. ત્યારે આ જ મોંઘાદાટ વાહનોનો સામાન્ય કામમાં ઉપયોગ થતો હોવાની વિગતો જામનગરથી બહાર આવી છે. જામનગર જિલ્લા જેલ પોલીસને સરકારે ફાળવેલ લાખો રૂપિયાની બોલેરો ગાડીમાં સિમેન્ટની ડિલેવરી કરવામાં આવતુ હોવા અંગે સ્ટીંગ ઓપરેશન પાર પાડવામાં આવ્યું હતું. હાજર જેલના સ્ટાફે એક તબકકે મામલો રફેદફે કરવાની પણ લાલચ આપી હતી. જોકે વિટીવીએ મીડીયા ધર્મ બજાવી સરકારી ગાડીના ગેરઉપયોગને ખુલ્લો પાડ્યો છે.

ગુજરાત રાજ્ય સરકાર દ્વારા તમામ વિભાગોના ઉચ્ચ અધિકારીઓને લાખો રૂપિયાના ખર્ચે મોંઘાદાટ વાહનો પુરા પાડ્યા છે. અવાર-નવાર આ વાહનોમાં સરકારી ખર્ચે સરકારીબાબુઓ દ્વારા સહેલગાહ અને અન્ય સાધનોની  અંગત આપ-લે થતી હોવાની વિગતો બહાર આવતી હોય છે. રીંગણા લઉ બે-ચાર લઇ લોને 10-12 એમ સરકારીબાબુઓ શેખચલીના વિચારોને પોતાની સરકારી ફરજમાં મુકી અવાર નવાર વાહનોનો ગેરઉપયોગ કરતા હોય છે.

અધિકારીઓ ઉપરાંત તેના પરિવારજનોએ પણ જાહેર સ્થળોએ આજ વાહનોમાં મુસાફરી કરતા જોવા મળે છે. ત્યારે જામનગર જિલ્લા જેલ પ્રશાસનની લાખેણી બોલેરો ગાડીનો ગેરઉપયોગ થતો હોવાની મળેલ ચોકકસ વિગતોના આધારે આજે શહેરના ધણશેરી વિસ્તારમાં સ્ટીંગ ઓપરેશન હાથ ધરવામાં આવ્યુ હતું.

જેમાં જેલ પોલીસને ફાળવવામાં આવેલ જીજે-10જી-0846 નંબરની બોલેરો ગાડીમાં એક ખાનગી સિમેન્ટની એજન્સીમાંથી સિમેન્ટની બોરીઓ ભરીને જેલ તરફ રવાના થતી હોવાનું સામે આવ્યું હતું. જેલ પ્રશાસનની આ ગાડીમાં મજુરો દ્વારા સિમેન્ટની થેલીઓ ભરવામાં આવતી હતી.

ત્યારે જ વિટીવી દ્વારા આ સ્ટીંગ ઓપરેશનને પાર પાડવામાં આવ્યું હતું. પોતાની પોલ ખુલી પડી જતાં બોલેરો ગાડીના વર્ધી ચાલક અને અન્ય એક સરકારી અધિકારી મોટરસાઇકલ લઇ એક કર્મચારી આવી પહોચ્યો હતો.

આ દરમિયાન આ કર્મચારીઓએ જેલ પ્રશાસનની અન્ય એક ગાડીને બોલાવી લઇ મામલો રફેદફે કરવા પ્રયાસો કર્યા હતાં. જોકે વિટીવીએ મીડીયાએ પત્રકારત્વ ધર્મ બજાવ્યો હતો. લાજવાના બદલે ગાજી જેલરે એવો નફટાઇ પૂર્વક જવાબ આપ્યો હતો કે ચોમાસુ હોવાથી અન્ય કોઇ વિકલ્પ ન બચતા આખરે સરકારી ગાડીનો ઉપયોગ કરાયો હતો.