કામ બોલે છે / શરમ કરો શરમ આ રીતે ભણશે ગુજરાત, ધોરાજીમાં 50 વર્ષથી દુકાનમાં ચાલતી શાળા પણ તંત્ર અભણ

• ધોરાજીમાં 50 વર્ષથી ચાલતી દુકાનમાં શાળા
• બે દુકાનમાં ચાલે છે ધોરણ 1થી 8
• 147 વિદ્યાર્થીઓના ભવિષ્ય સાથે ચેડા

દેશના વિકાસમાં સૌથી વધારે ફાળો કોઈ રાજ્ય આપતું હોય તો તે ગુજરાત છે.દેશના વિકાસનું એન્જિન એ ગુજરાત છે.જેના મોર્ડલને સમગ્ર દેશમાં લાગુ કરવાના દાવા થાય છે તે ગુજરાત છે.ગતિશિલ અને વિકસિત કહેવાતા ગુજરાતમાં વિકાસના ખુબ જ મોટા મોટા દાવા કરવામાં આવે છે.અને એવા દાવા કે ગુજરાત તો જાણે સ્વર્ગ છે.અહીં કોઈ સમસ્યા જ નથી..બધુ જ બરાબર છે.પણ અમે આપને એક એવી ઘટના બતાવવા જઈ રહ્યા છે તે જાણી તમે ચોંકી ઉઠશો.તમે માનશો નહીં કે આ ગુજરાત જ છેને?.

વિકસિત ગુજરાતની વરવી વાસ્તવિકતા
તમે જે ગીત સાંભળ્યું તે ગુજરાત સરકારનું ઓફિશિયલ સોન્ગ છે.તેના શબ્દો સાંભળીને તો એવું જ લાગે કે આપણું ગુજરાત દરેક મોર્ચે સુખી સંપન્ન છે.અહીં વિકાસની ગંગા વહે છે.અહીં ચારે બાજુ હરિયાળી અને બધુ જ રળિયામણું લાગે.પણ જરા હવે આ જ વિકસિત અને ગતિશિલ ગુજરાતના આ દ્રશ્યો જોઈ લો.આ એજ ગુજરાત છે જેની વાહવાહી આખા દેશમાં થાય છે.એ જ ગુજરાત છે જેના મોર્ડલની ચર્ચા દેશના તમામ રાજ્યોમાં થાય છે અને તેને લાગુ કરવાની વાતો થાય છે.આ એજ ગાંધી અને ગુજરાતના સ્થાપક રવિશંકર મહારાજનું ગુજરાત છે.શહેરના મોટા મોટા રોડ અને બિલ્ડીંગો વચ્ચે કદાચ આ શાળા.અરે આને શાળા ન કહેવાય.આને તો દુકાન શાળા કહેવાય.જે ગાંધીનગરની મસમોટી બિલ્ડીંગો અને એસી ઓફિસમાં બેસતા આપણા મંત્રીઓ, અધિકારીઓને નહીં દેખાઈ હોઈ.ભણે ગુજરાત, ગણે ગુજરાત, ગુણોત્સવ બધુ જ આ સરકારે કર્યું.સારુ પણ છે.પણ આ નાનકડી શાળાએ એવો તો શું ગુનો કર્યો હતો કે તેમાં ભણવા આવતા ભૂલકાઓને એક મકાન પણ ન બનાવી આપ્યું?.એવો તો શું વાંક આ વિદ્યાર્થીઓને કે તેમને રોડ પર ઘોંઘાટ અને પ્રદૂષણ વચ્ચે બે દુકાનોમાં ભણવું પડે છે?.વાહ રે વાહ ગુજરાતનો વિકાસ.વાહ.

50 વર્ષમાં શાળાની આ અવદશા કોઈને યાદ ન આવી
તમે દુકાનમાં ટ્યૂશન ક્લાસિસ કે અન્ય કોઈ ક્લાસિસ જોયા હશે.પણ ક્યારેય જોયું કે સાંભળ્યું પણ છે કે દુકાનમાં કોઈ સરકારી શાળા ચાલતી હોય?.માનવામાં ન આવે તેવી આ ઘટના 100 ટકા સાચી છે.અને ગુજરાતના વિકાસની આ મહાન શાળા આવેલી છે રાજકોટના ધોરાજી શહેરમાં.અને આ પાછી આજકાલથી નહીં છેલ્લા 50 વર્ષથી આવી જ રીતે દુકાનોમાં અડીખમ છે.છેને મજાની વાત?.50 વર્ષમાં અહીં એકપણ ધારાસભ્ય, સ્થાનિક નેતા, રાજ્યના શિક્ષણ મંત્રી, કે રાજ્યના મુખ્યમંત્રીને શાળાનું એક મકાન બનાવી આપવાનો વિચાર પણ ન આવ્યો?.આજ વિસ્તારમાંથી ભાજપ, કોંગ્રેસ કે અન્ય પાર્ટી.બધી જ પાર્ટીઓના જનપ્રતિનિધિઓ ચૂંટાઈને ગયા છે પણ કોઈને અહીં ભણતા ભૂલકાઓને ખ્યાલ નહીં આવ્યો હોય?.ધોરાજીના કુંભારવાડામાં આવેલી આ શાળા નંબર 14  રોડ પર બનેલી દુકાનોમાં અડધુ શટર ખુલ્લી રાખી ચાલે છે.અડધુ શટર એટલા માટે કે બહારથી ઘોંઘાટ અને ઉડતી ધૂળની ડમરીઓથી શિક્ષણ ખોરવાઈ નહીં.હવે તમને થશે કે આ બે દુકાનોમાં તો વળી કેવી રીતે શાળા ચાલતી હશે?.તો અહીં 147 વિદ્યાર્થી અભ્યાસ કરે છે.અને આઠ શિક્ષકો તેમને ભણતરના પાઠ શિખવે છે.છેને ગજબની શાળા?.શાળાના આચાર્યનું કહેવું છે કે અનેક રજૂઆતો કરી પણ પરિણામ શૂન્યનું શૂન્ય જ રહે છે.

નવી શાળા ક્યારે બનશે? કહ્યું વહીવટી કાર્યવાહી બાકી છે
અહીં ભણતા વિદ્યાર્થીઓના નસીબ ગણો કે કરમોની કઠણાઈ.જે દુકાનોમાં શિક્ષણકાર્ય ચાલી રહ્યું છે તે પણ હવે જર્જરીત થઈ ગઈ છે.હવે આ દુકાનોમાં પણ બેસતા ડર લાગે છે.વરસાદમાં પાણી અંદર આવી જાય છે.શિયાળામાં તીવ્ર ઠંડી અને ઉનાળામાં કાળઝાળ ગરમી મારી નાંખે છે.અરે ઘણીવાર તો રસ્તા પર રખડતા ઢોર પણ આ ગજબની શાળામાં ઘૂસી જાય છે.વિદ્યાર્થીઓ બિચારા બોલી બોલીને થાકી ગયા કે અમને ક્યારે નવી શાળા મળશે?. જ્યારે અમે વિકસિત ગુજરાતની આવડી મોટી સમસ્યાને લઈ તાલુકા પ્રાથમિક શિક્ષણ અધિકારીનો સંપર્ક સાધ્યો.અને નવી શાળા ક્યારે બનશે તેવું પૂછ્યું તો તેમણે જવાબ આપ્યો કે, સરકારના તમામ વિભાગને પત્રો લખી દીધા છે..નવી શાળા માટે મંજૂરી માંગી છે અને થોડી વહીવટી કાર્યવાહી પછી નવી શાળા મળશે.

આ છે ગુજરાતનું શિક્ષણ?
અધિકારી તો બિચારા શું કરે?..તેઓ તો આગળ જાણ કરે.પણ આની ખરેખર જવાબદારી તો સરકાર અને તેના શિક્ષણ વિભાગની છે.આપણી સરકાર ઉત્સવો અને મેળાવડા કરી કરોડોનું આંધણ કરે છે.પણ તેમાંથી થોડા રૂપિયા દેશના ભવિષ્યના ઘણતર માટે અહીં ન વાપરી શકે?.શિક્ષણ મંત્રી સાહેબ અમે આપને કહેવા માગીએ છીએ કે તમે તો સૌરાષ્ટ્રમાંથી જ આવો છો.તમે સત્તાધારી પાર્ટીના પ્રદેશ અધ્યક્ષ પણ રહ્યા છો..તમને જો થોડી ફુરસદ મળે તો જરા આ ગરીબ બાળકો સામે નજર નાંખજો.અને 50 વર્ષમાં જે કોઈ સરકાર કે મંત્રી ન કરી શક્યા તે કામ કરી ઈતિહાસ સર્જી દો.એક નાનકડી શાળા બનાવી દો.આમા કોઈ રાજકારણ ન કરતા કે ન તો તમે કોઈ ફાઈલોવાળો ગોળ ગોળ જવાબ આપતા.સીધુ કામ શરૂ કરી કરાવી દો.અને દેશના ભવિષ્યના ઘડતરમાં તમારી પણ જવાબદારીનું પાલન કરો.આશા રાખીશું કે વીટીવીનો આ અહેવાલ તમને આ શાળા સુધી ખેંચી લાવશે અને તમે ઝટપટ નવી શાળા બનાવી આપશો.