કૌભાંડ / સસ્તા અનાજની દુકાનનો પુરવઠો કોણ ચાઉં કરી જાય છે?

• રેશનીંગનું અનાજ બારોબાર ખાનગી વેપારીઓને વેચાય છે
• વીડિયોમાં દેખાય છે કે, કેવી રીતે ચાલે છે કારોબાર
• સરકાર રાહતદરે અનાજ આપે છે પણ પહોંચતુ નથી

મહેસાણાના વડનગરમાં સસ્તા અનાજની દુકાનમાં અનાજ સગેવગે કરવાનું કૌભાંડ સામે આવ્યું છે. સસ્તા અનાજની દુકાનનો સંચાલક ગ્રાહકોને પહેલા ઓછું અનાજ આપે છે અને ત્યાર બાદ બાકીનું અનાજ ખાનગી દુકાન સંચાલકને વેચી દે છે. 

4 કિલોનું અનાજ ચવાઇ જાય છે
ગ્રાહકોને 24 કિલો અનાજની જગ્યાએ માત્ર 20 કિલો અનાજ અપાય છે. એટલે બાકીનું 4 કિલોનું અનાજ ચવાઇ જાય છે. એક બાજુ ઓછા અનાજનો પુરવઠો સરકાર દ્વારા આવતો હોવાની બુમો પડે છે અને બીજી બાજુ જે પુરવઠો આવે છે તેને પણ બારોબાર વેચી દેવામાં આવે છે. 

શું કહે છે દુકાન સંચાલક
આ અંગે સસ્તા દુકાનના સંચાલકે કહ્યું કે અનાજ ઓછું હોવાથી સેટિંગ કરવું પડે છે. આ અંગે વધુ તપાસ કરવામાં આવી તો આ મોડી રાતે ગ્રાહકોનું અનાજ ખાનગી દુકાન સંચાલકને સગેવગે કરવામાં આવી રહ્યું હતું.

ખાનગી દુકાન માલિકની કબૂલાત
ખુદ ખાનગી દુકાનના માલિકે પણ આ વાતની કબૂલાત કરી હતી કે તેઓએ પુરવાઠાનું અનાજ ખરીદ્યું છે. સસ્તા અનાજની દુકાનના સંચાલકો લાખ મના કરે પરંતુ ખુદ અનાજ ઉતરતો અને ખાનગી દુકાનો દ્વારા આ પુરવઠાના અનાજની ડિલિવરી લેતો વીડિયો સામે આવ્યો છે. 

ત્યારે પ્રશ્નો ઉઠી રહ્યા છે. 
ગ્રાહકોનું સસ્તું અનાજની ગેરરીતિ ક્યારે અટકાશે? સસ્તા અનાજમાં કટકી કરનારા દુકાન સંચાલકો સામે પગલા કેમ નથી લેવાતા? આવા દુકાન સંચાલકોનું લાઇસન્સ કેમ રદ નથી કરાતુ? અનાજમાં કટકી કરી ખાનગી દુકાનોમાં વેચનારાઓ સામે કાર્યવાહી ક્યારે? પુરવઠાના અનાજને ખાનગી દુકાનોમાં વેચવાનું કૌભાંડ કેટલા સમયથી ચાલે છે?