સરકાર રિયલ એસ્ટેટ સેક્ટર માટે રેન્ટલ પોલિસી લાવી શકે છે કે જેના હેઠળ સંસ્થાઓ દ્વારા ખરીદવામાં આવેલ પ્રોપર્ટીને રેન્ટ પર આપવાથી ટેક્સમાં છૂટ મળી શકશે. રેન્ટલ ઇન્કમથી થનારી આવક અને નફા પર ઇન્કમટેક્સમાં રાહત આપવાનો પણ પ્રસ્તાવ છે.
સરકાર ટૂંક સમયમાં રિયલ એસ્ટેટ સેક્ટર માટે રાહત પેકેજ લાવવાની તૈયારીમાં છે. સરકાર રિયલ એસ્ટેટ સેક્ટર માટે રેન્ટલ પોલિસી લાવી શકે છે કે જેના હેઠળ સંસ્થાઓ દ્વારા ખરીદવામાં આવેલ પ્રોપર્ટીને રેન્ટ પર આપવાથી ટેક્સમાં છૂટ મળી શકશે. રેન્ટલ ઇન્કમથી થનારી આવક અને નફા પર ઇન્કમટેક્સમાં રાહત આપવાનો પણ પ્રસ્તાવ છે. પ્રારંભિક પ્રસ્તાવ અનુસાર ૧૦ વર્ષ સુધી ઇન્કમટેક્સમાંથી મુક્તિ મળી શકે છે. રિયલ એસ્ટેટ ડેવલપર્સ ઘણા લાંબા સમયથી રેન્ટલ હાઉસિંગમાં કરમુક્તિની માગણી કરી રહ્યા છે. આ મામલામાં નાણાં મંત્રાલયે બિલ્ડર્સથી બિઝનેસ મોડલ નોટ પ્રસ્તુત કરવાનો નિર્દેશ આપ્યો છે.
વાસ્તવમાં અત્યારે રિયલ એસ્ટેટ ડેવલપર્સને નવા બનેલા ઘર કે ફ્લેટ પર રેન્ટલ ટેક્સ ચૂકવવો પડે છે. જો બિલ્ડરે ૧૦૦ મકાન બનાવ્યાં હોય અને તે વેચાય નહીં તો પણ આ મકાનો પર બિલ્ડરે સરકારને રેન્ટલ ટેક્સ ચૂકવવો પડે છે. સરકારનું માનવું છે કે આ મકાન દ્વારા બિલ્ડરને રેન્ટ તરીકે આવક થઇ રહી છે અને સંબંધિત વિસ્તારમાં પ્રવર્તમાન ભાડાને ટેક્સનો આધાર બનાવીને ટેક્સ વસૂલવામાં આવે છે.
જોકે હવે સરકાર દ્વારા આ રેન્ટલ ટેક્સમાં ૧૦ વર્ષન છૂટ આપી શકાય છે. અલબત્ત આ ફોર્મ્યુલાથી પ્રોફિટ ધરાવતી પ્રોપર્ટીને અલગ રાખવામાં આવશે. છેલ્લાં કેટલાંક વર્ષથી રિયલ એસ્ટેટ સેક્ટરમાં મંદી છે. આ કારણથી ફ્લેટ્સ વેચાતા નથી અને બિલ્ડરોને તેના પર ટેક્સ આપવો પડે છે, જે રિયલ એસ્ટેટ માટે એક મોટી સમસ્યા છે. નાણાં મંત્રાલયે બિલ્ડરો પાસેથી રેન્ટલ હાઉસિંગ બિઝનેસ મોડલ પર એક નોંધ માગી છે. નાણાં મંત્રાલય આ મામલામાં ઇન્ડસ્ટ્રી બોડી સાથે વાતચીત કરનાર છે અને ૨૦૧૯-૨૦ના બજેટમાં આ અંગેની દરખાસ્ત સામેલ કરાશે.