ખુશખબર / ખરીદી કરતી વખતે પાક્કું બિલ લઇ લેજો; સરકાર આપે છે અધધ પુરા એક કરોડની લોટરી! જાણો કેવી રીતે?

• લોટરી પ્રક્રિયાને સરળતાથી ચલાવવા માટે એક એપ્લિકેશન વિકસાવાશે
• વપરાશકર્તાઓએ રસીદ સ્કેન કરવાની રહેશે 
• માલની ખરીદી કર્યા પછી તેને આ એપ્લિકેશન પર અપલોડ કરવાની રહેશે.

આ લોટરી વિશે એક અધિકારીએ જણાવ્યું હતું કે આ અંતર્ગત ખરીદી કરનાર વ્યક્તિને એક કરોડ રૂપિયાનું ઇનામ મળી શકે છે. તેમણે કહ્યું કે આ યોજના દ્વારા લોકોને પાક્કું બીલ લેવા પ્રોત્સાહિત કરવામાં આવશે જે GST ચોરી અટકાવવામાં સરકારને મદદ કરી શકે.

એક કરોડ રૂપિયા સુધીનું ઇનામ

સેન્ટ્રલ બોર્ડ ઓફ ઈનડાયરેક્ટ ટેક્સ અને કસ્ટમ્સ (CBIC) ના અધિકારીએ ગયા મહિને માહિતી આપી હતી કે આ લોટરી યોજનામાં ₹ 10 લાખથી લઈને 1 કરોડ સુધીના ઇનામો રખાય તેવી શક્યતા છે. જીએસટી કાઉન્સિલ તેની આગામી બેઠકમાં આ અંગે નિર્ણય લઈ શકે છે. કાઉન્સિલની આગામી બેઠક 14 માર્ચે યોજાવાની છે.

કોઈ પણ રકમના બિલની હોવી જોઈએ રસીદ 

અધિકારીએ કહ્યું કે કોઈપણ રકમની રસીદ પર તમે આ લોટરી જીતી શકો છો. આનો અર્થ છે કે લેણદેણ માટે કોઈ ન્યૂનતમ અથવા મહત્તમ મર્યાદા રહેશે નહીં. આ લોટરી સિસ્ટમમાં પ્રથમ ઇનામ વિજેતાને મોટું ઇનામ આપવામાં આવશે. 

આ લોટરી પ્રક્રિયામાં કેવી રીતે ભાગ લેવો?

GSTN આ લોટરી પ્રક્રિયાને સરળતાથી ચલાવવા માટે એક એપ્લિકેશન વિકસાવી રહી છે. આ મહિના પછી આ એપ્લિકેશન, Android અને iOS વપરાશકર્તાઓ માટે ઉપલબ્ધ થશે. આ યોજનામાં ભાગ લેવા માટે વપરાશકર્તાઓએ રસીદ સ્કેન કરવાની રહેશે અને માલની ખરીદી કર્યા પછી તેને આ એપ્લિકેશન પર અપલોડ કરવાની રહેશે.

સરકાર ક્યાંથી કાઢશે રૂપિયા?

સરકાર ટેક્સના કેસો ઉઘરાવેલ દંડમાંથી આવતી રકમમાંથી આ લોટરી ચૂકવશે. જીએસટી એક્ટ મુજબ નફાખોરો સામે કાર્યવાહી થઈ શકે છે. દંડની રકમ ગ્રાહક કલ્યાણ ભંડોળમાં જમા થાય છે.