નાણામંત્રી નિર્મલા સીતારમણે કહ્યું હતું કે, સરકાર ચીનની ત્રણ મોબાઈલ ફોન કંપનીઓ દ્વારા કરચોરીના કથિત કેસોની તપાસ કરી રહી છે અને આ અંગે તેમને નોટિસ ફટકારવામાં આવી છે.
ચીનની ત્રણ કંપનીને નોટીસ ફટકારી
ઓપ્પો, વિવો અને શાઓમી પર કરચોરીનો આરોપ
ઓપ્પોને કુલ 4,389 કરોડ રૂપિયાની નોટિસ ફટકારી
નાણામંત્રી નિર્મલા સીતારમણે મંગળવારે રાજ્યસભામાં કહ્યું હતું કે, સરકાર ચીનની ત્રણ મોબાઈલ ફોન કંપનીઓ દ્વારા કરચોરીના કથિત કેસોની તપાસ કરી રહી છે અને આ અંગે તેમને નોટિસ ફટકારવામાં આવી છે. સીતારામને પ્રશ્નોત્તરીકાળ દરમિયાન પૂરક બાબતોના જવાબમાં જણાવ્યું હતું કે ચીનની ત્રણ કંપનીઓ ઓપ્પો, વિવો ઇન્ડિયા અને શાઓમીને નોટિસ ફટકારવામાં આવી છે.
2981 કરોડની કરચોરી
સીતારામણે કહ્યું કે ડિપાર્ટમેન્ટ ઓફ રેવન્યુ ઇન્ટેલિજન્સ (DRI)એ મોબાઇલ ફોન જાયન્ટ ઓપ્પોને કુલ 4,389 કરોડ રૂપિયાની કસ્ટમ ડ્યૂટી માટે નોટિસ ફટકારી છે. તેમણે કહ્યું કે, એક અનુમાન મુજબ ટેક્સ ચોરી લગભગ 2981 કરોડ રૂપિયા છે. નાણામંત્રી એ કહ્યું "કસ્ટમ્સ ડ્યુટીની ચુકવણી માટે આયાતી ઉત્પાદનોના મૂલ્યાંકનથી અમને લાગે છે કે 1,408 કરોડ રૂપિયાની કરચોરી થઈ છે. "તેઓ સ્વેચ્છાએ 450 કરોડ રૂપિયા જમા કરાવવા આગળ આવ્યા છે, જે 4,389 કરોડ રૂપિયાની માંગ કરતા ઘણા ઓછા છે.
ચીન કંપની Mi પર પણ નજર
અન્ય કંપનીઓનો ઉલ્લેખ કરતાં તેમણે કહ્યું હતું કે, શાઓમી અન્ય એક મોબાઇલ ફોન કંપની છે, જે 'એસેમ્બલ' થયેલા Mi મોબાઇલ ફોનથી સબંધિત છે. "તેમને ત્રણ શો-કોઝ નોટિસ ફટકારવામાં આવી છે અને તેમની પાસે લગભગ 653 કરોડ રૂપિયાની કસ્ટમ્સ ડ્યુટીનું દેવાળું છે. તેમને ફટકારવામાં આવેલી ત્રણ કારણદર્શક નોટિસ પર માત્ર 46 લાખ રૂપિયા જમા કરાવ્યા છે. "
વિવોએ માત્ર 60 કરોડ જમા કરાવ્યા
સીતારામણે કહ્યું કે ત્રીજી કંપની વિવો ઇન્ડિયા છે, જેના માટે 2,217 કરોડ રૂપિયાની 'ડિમાન્ડ નોટિસ' જારી કરવામાં આવી છે અને તેમણે સ્વેચ્છાએ 60 કરોડ રૂપિયા જમા કરાવ્યા છે. તેમણે જણાવ્યું હતું કે, આ સિવાય ED ની નજર એ 18 કંપનીઓ પર પણ છે, જેની સ્થાપના આ જ જૂથ વિવો દ્વારા કરવામાં આવી હતી. તેમણે કહ્યું કે કુલ 1.25 લાખ કરોડ રૂપિયાના વેચાણમાંથી પેરેન્ટ કંપની વિવોએ આ 18 કંપનીઓ દ્વારા મોટી રકમ ટ્રાન્સફર કરી હતી. ''