ગેસ ઉત્પાદન કંપનીઓને પ્રોત્સાહન આપવા માટે કેન્દ્ર સરકાર 1 એપ્રિલ 2019થી ઘરેલુ પ્રોજેક્ટના કુદરતી ગેસની કિંમતમાં વધારો કરી શકે છે. ગેસના ભાવમાં 10 ટકાનો વધારો થઈ શકે છે. જેથી HMBTU પ્રતિ એકમ 3.72 ડોલર થઈ શકે છે.
જો આવું થશે તો આ કિંમત ઓક્ટોબર 2015થી માર્ચ 2016 પછી સૌથી વધુ હશે. આ અગાઉ સરકારે 1 ઓક્ટોબર 2018માં કુદરતી ગેસના ઘરેલુ ઉત્પાદકોને આપવામાં આવતી કિંમતોને 3.06 ડોલર પ્રતિ HMBTUથી વધારીને 3.36 ડોલર પ્રતિ HMBTU કરી દેવાઈ હતી.
સૂત્રોનું માનીએ તો કેન્દ્ર સરકારના આ પગલાથી ONGC અને રિલાયન્સ ઈન્ડસ્ટ્રીઝ જેવી ગેસ ઉત્પાદન કંપનીઓને ફાયદો થશે. મહત્વનું છે કે કુદરતી ગેસના ભાવ દર છ મહિનામાં 1 એપ્રિલ અને 1 ઓક્ટોબરે નક્કી થાય છે.
સરકાર દ્વારા કુદરતી ગેસના ભાવમાં વધારો કરવાથી ભલે મોટી કંપનીઓને ફાયદો થાય પરંતુ તેનાથી સામાન્ય લોકો પર વિપરીત અસર થશે. CNG અને PNGના ભાવ વધવાથી વાહન ચલાવવા મોંઘા પડશે. ઘરમાં ભોજન બનાવવામાં વપરાતા PNG ગેસના ભાવ પણ વધશે. જેથી સામાન્ય વર્ગને ભાવ વધારાનો સામનો કરવો પડશે.