કેન્દ્રીય મંત્રી રવિશંકર પ્રસાદ દ્વારા સોમવારે એક વેબપોર્ટલ લોન્ચ કરવામાં આવ્યું છે જેની મદદથી ચોરી થયેલો ફોન બ્લોક કરીને તેને ટ્રેક કરી શકાશે. હાલમાં આ વેબ પોર્ટલ ફક્ત દિલ્હી માટે જ ઉપલબ્ધ રહેશે.
કેન્દ્રીય સંદેશાવ્યવહાર અને માહિતી ટેકનોલોજી મંત્રી રવિશંકર પ્રસાદે સોમવારે એક વિશેષ વેબ પોર્ટલનો પ્રારંભ કર્યો છે. આ વેબ પોર્ટલની મદદથી ચોરેલા મોબાઈલ ફોનને બ્લોક કરી ટ્રેક કરવામાં આવશે જેથી કોઈ પણ તેનો દુરૂપયોગ ન કરી શકે. હાલમાં આ વેબ પોર્ટલ ફક્ત દિલ્હી માટે જ ઉપલબ્ધ રહેશે.
આ પોર્ટલ સૌ પ્રથમ મુંબઈમાં સપ્ટેમ્બર 2019 માં પાઇલટ પ્રોજેક્ટ તરીકે લોન્ચ કરવામાં આવ્યું હતી. હવે દિલ્હીમાં આ વિશેષ પોર્ટલ શરૂ થયા બાદ સામાન્ય લોકો પણ પોતાના ચોરાયેલા મોબાઈલ ફોન બ્લોક કરી શકશે. આ ઉપરાંત ડેટા ચોરીનું જોખમ પણ ઓછું થશે. તેમજ પોલીસ આ પોર્ટલની મદદથી ચોરેલા ફોનને પણ આસાનીથી શોધી શકશે.
દેશના તમામ મોબાઇલ ફોન્સ માટે ડેટા બેઝ તૈયાર કરવામાં આવશે
ટેલિકમ્યુનિકેશન્સ વિભાગે આ વેબ પોર્ટલ માટે દેશના તમામ મોબાઇલ ફોન્સનો ડેટાબેસ તૈયાર કર્યો છે, જેને સેન્ટ્રલ ઇક્વિપમેન્ટ આઇડેન્ટિટી રજિસ્ટર (CEIR) નામ આપવામાં આવ્યું છે. આમાં દેશના તમામ મોબાઇલ ફોન્સનો IMEI નંબર નોંધાયેલો છે. જો તમારો ફોન ચોરાઈ ગયો છે, તો પોલીસમાં ફરિયાદ કર્યા પછી તમારો ફોન અહીંથી બ્લોક કરી શકશો.
પછી તે ફોન કોઈપણ ઓપરેટર નેટવર્ક પર કામ કરશે નહીં. આ ડેટાબેસને કારણે પોલીસ પણ આ ફોન શોધી શકશે. દેશમાં કોઈ પણ ખૂણે તેનો ઉપયોગ થઈ રહ્યો છે ત્યાં પોલીસ તેને સરળતાથી શોધી શકશે.
આ રીતે બ્લોક કરી શકાય છે ચોરાયેલો મોબાઈલ
જો તમારો ફોન ચોરાયો છે, તો પહેલા તમારે પોલીસને ફરિયાદ કરવી પડશે. તમારે આ ફરિયાદની એક નકલ તમારી પોતાની પાસે રાખવી.
આ પછી, તમારા ટેલિકોમ સર્વિસ પ્રોવાઇડરની મદદથી નવા સિમ કાર્ડ માટે અરજી કરો. જૂના નંબર માટે જ નવું સિમ કાર્ડ લો.
આ વેબ પોર્ટલ પર અરજી કરતાં પહેલાં તમારે તમારા દસ્તાવેજો તૈયાર રાખવા પડશે. તેમાં પોલીસ રિપોર્ટની એક નકલ, ઓળખ કાર્ડ હોવું જોઈશે. જો આ મોબાઈલ માટે તમારું બિલ ઉપલબ્ધ છે, તો તેને પણ સબમિટ કરો.
ત્યાર બાદ આ સાઇટ ઉપર તમારે તમારો રજિસ્ટ્રેશન નંબર ભરવો પડશે જેથી IMEI ને બ્લોક કરી શકાય તેમ જ નવા દસ્તાવેજો પણ અપલોડ કરવા પડશે.
જ્યારે તમે આ ફોર્મ સબમિટ કરો છો, ત્યારે તમને રિકવેસ્ટ ID મળશે. આ IDની મદદથી તમે તમારી રિકવેસ્ટનું સ્ટેટસ શોધી શકો છો. તેની મદદથી તમે ભવિષ્યમાં આ IMEI નંબર અનબ્લોક કરાવી શકશો.