કોરોનામાં અવિરત સેવા આપતા ઈન્ટર્નસ અને રેસિડેન્ટ્સ ડૉક્ટરો માટે સરકારે મહત્વનો નિર્ણય કર્યો છે, રૂ.5 હજારનું ખાસ કોવિડ પ્રોત્સાહન આપવાનો કરાયો નિર્ણય
ઈન્ટર્નસ અને રેસિડેન્ટ્સ ડૉક્ટર્સ માટે મહત્વનો નિર્ણય
30 જુન સુધી હવે ખાસ કોવિડ પ્રોત્સાહન અપાશે
રૂ.5 હજારનું ખાસ કોવિડ પ્રોત્સાહન આપવાનો કર્યો નિર્ણય
ઈન્ટર્નસ અને રેસિડેન્ટસ ડોક્ટર્સ માટે ગુજરાત સરકારનો મહત્વનો નિર્ણય કર્યો છે. મેડિકલ, ડેન્ટલ, ફિઝિયોથેરાપી હોમિયોપેથી અને આયુર્વેદના સ્નાતક અભ્યાસક્રમના ઇન્ટર્ન્સને પ્રોત્સાહનરૂપે 5 હજાર અપાશે. 30મી જૂન 2021 સુધી વધારાના રૂપિયા 5 હજારનું ખાસ કોવિડ પ્રોત્સાહન આપવાનો નિર્ણય સરકારે કર્યો છે. ઇન્ટર્ન્સ અને રેસિડેન્ટ ડોક્ટર્સના સ્ટાઇપેન્ડમાં 5 હજાર રૂપિયાનો વધારો કરાયો છે. હાલમાં સરકાર 13 હજાર રૂપિયા સ્ટાઇપેન્ડ ચૂકવે છે.
અગાઉ જૂનિયર તબીબોએ કરી હતી માગણી
31 માર્ચે રાજકોટમાં કોરોનાની ડ્યુટી કરતા ઇન્ટર્ન તબીબોએ રાજ્ય સરકાર પાસે સ્ટાઇપેન્ડ સિવાયનું 5 હજાર રૂપીયા વધારાનું ભથ્થુ ચુકવવાની માંગ કરી હતી. રાજકોટ, ભાવનગર અને વલસાડનાં ઇન્ટર્ન તબીબોએ ગુજરાત ઇન્ટર્ન ડોક્ટર એસોશિએશન મારફતે આરોગ્ય મંત્રી અને રાજ્યનાં નાયબ મુખ્યમંત્રી નિતીન પટેલ અને જયંતી રવિને ઇ-મેઇલ દ્વારા કોરોનાનું વધારાનું ભથ્થુ ચુકવવાની માંગ કરી હતી.
રાજકોટ મેડિકલ કોલેજનાં ઇન્ટર્ન તબીબોનું કહ્યું હતું કે, ઇન્ટર્નશીપ કરતા ડોક્ટરોનો કોરોના વોર્ડમાં ડ્યુટી ફાળવવામાં આવે છે. અગાઉ રાજ્ય સરકાર દ્વારા ઇન્ટર્ન ડોક્ટરોને 13 હજાર રૂપીયાનું સ્ટાઇપેન્ડ અને 5 હજાર રૂપીયાનું કોરોના ભથ્થુ ચુકવવામાં આવતું હતું. જોકે બેચ બદલતા કોરોનાનું ભથ્થુ જૂનિયર ઇન્ટર્ન ડોક્ટરોને પણ ચુકવવામાં આવે તેવી માંગ કરી હતી.