ગુડ ન્યુઝ / હવેથી વગર વ્યાજે આ રાજ્યના સરકારી કર્મચારીઓને મળશે એડવાન્સ સેલરી, દેશમાં પ્રથમવાર સિસ્ટમ લાગુ

• રાજસ્થાન સરકારની મોટી જાહેરાત 
• હવે કર્મચારીઓ મેળવી શકશે પોતાનો એડવાન્સ પગાર 
• એડવાન્સ સેલેરીની સુવિધા આપનાર રાજસ્થાન દેશનું સૌપ્રથમ રાજ્ય

રાજસ્થાનની ગેહલોત સરકાર દ્વારા હાલ સરકારી કર્મચારીઓને એક પછી એક ચડિયાતા લાભ આપવામાં આવી રહ્યા છે. તાજેતરમાં જ મોંઘવારી ભથ્થા અને પ્રમોશનમાં વધારો કર્યા બાદ હવે સરકાર દ્વારા કર્મચારીઓને એક જબરદસ્ત ભેટ આપવામાં આવી રહી છે. જેના ભાગરૂપે રાજસ્થાન સરકારે એવી જાહેરાત કરી છે કે હવે રાજ્યના કર્મચારીઓને પોતાનો પગાર એડવાન્સ પણ મળી શકશે. આ સિસ્ટમનો એક જુનથી એટલે કે આજથી જ અમલ કરવામાં આવ્યો છે. ખાસ વાત એ છે કે અત્યાર સુધીમાં એક પણ રાજ્યમાં એડવાન્સ પગાર આપવામાં ન આવતો હોવાથી એડવાન્સ સેલેરીની સુવિધા આપનાર રાજસ્થાન દેશનું સૌપ્રથમ રાજ્ય બની ગયું છે.

આજથી જ લાગુ કરાઈ આ સિસ્ટમ

જાહેરાત મુજબ રાજ્ય સરકારના કર્મચારીઓ પોતાનો અડધો પગાર એડવાન્સમાં લેવા માટે હકદાર છે અને સરકાર દ્વારા મહત્તમ વિસ હજાર રૂપિયા સુધી એડવાન્સ ચુકવણી કરવામાં આવશે. નાણા વિભાગ દ્વારા નોન બેન્કિંગ ફાઇનાન્સ કંપની સાથે કરાર કરવામાં આવ્યો છે અને આજથી જ આ સિસ્ટમ લાગુ કરી દેવામાં આવી છે. મહત્વનું છે કે રાજસ્થાનમાં આ વર્ષના અંત સુધીમાં વિધાનસભાની ચૂંટણી યોજાશે જેને લઇને કર્મચારીઓને એક પછી એક લાભ મળતા રાહતની લાગણી જોવા મળી રહી છે.

કોઈ વધારાના ચાર્જ નહિ ચૂકવવા પડે !

ખાસ વાત એ છે કે રાજ્ય સરકાર દ્વારા એડવાન્સ પગાર લેવા માટે કોઈ શરતો નક્કી કરાય નથી. વધુમાં એડવાન્સ પગાર લેવા માટે કોઈ ખાસ વ્યાજ પણ વસુલવામાં આવશે નહીં! માત્ર નાણાકીય સંસ્થાઓ ટ્રાન્જેક્શન ચાર્જ વસૂલી શકશે. આ સુવિધાને પગલે નાના કર્મચારીઓને વધુ ફાયદો થવાની અપેક્ષા છે. હવે તેમની જરૂરિયાતો પૂરી કરવા માટે તેમને વ્યાજે રૂપિયા લેવાની નોબત આવશે નહીં. આ અંગે કર્મચારીઓ આઈએફએમએસ પોર્ટલ પર એડવાન્સ પગાર માટે અરજી કરવાની રહેશે અને ત્યારબાદ રકમ આવ્યા બાદ પગારમાંથી કાપી લેવામાં આવશે.